جندي مجند أحمد سليمان
بسم الله الرحمن الرحيم
انا هاحكيلكو على الحكاية العجيبة بتاعتي! القصة ان انا ليا جيش لكن ببساطة عندي مجموعة من الأسباب الطبية اللي تمنع و هي إني اعاني من تمزق في الرباط الصليبي في الركبة و زيادة الوزن و إلتصاق في الفخذين و طبعاً رحت الكشف الطبي و تخيلت إن عندي من الأسباب ما ينمع إني اقع في حوار الجيش و تضيع سنة كاملة من حياتي بدون أي مغزى في نفس الوقت اللى اصحابي اغلبهم مالوش جيش و بالتالي هايكون عندة فرصة قوية انه يطور نفسة و يطحن في خلال السنة دي ، المهم رحت و اكتشفت إنهم بقو بيدخلو اللي عنده إلتصاق و اللي حتي مركب شرايح و مسامير في رجلة! ولكن بيطلعو اللي نظرة ضعيف حتى لو بيلبس نضارة و مش حاسس بالمشكلة من اساسه لكن في النهاية هو قانون و لازم نمشي علية حتى لو كان اللي عنده الرباط الصليبي هيفضل يعاني طول فترة الجيش من الألم و الورم و اللي نظرة ضعيف و لابس نضارة مش بيعاني من اي مشكلة! و لكن هو ده القانون، هل من معترض؟
المهم طبعاً قالولي ان الوزن موصلش للحد اللي يطلعوني عنده و عرفت إن الفرق هو 2 كيلو بس، يعني مفيش رحمة حتى لو كان الفرق ربع كيلو ، ده معناه إني لو زايد 2 كيلو بس هيعتبروا وزني عائق كبير لكن دلوقتي انا في منتهى الرشاقة !! حكمتك يا رب
و الراجل اللي بيقولو دكتور العظام هناك مبيعرفش يقرا الأشعة فطبعاً حولني إلى لجنة طبية عليا، انا دلوقتي مترشح ضابط احتياط و هروح إن شاء الله يوم 5-9 عشان الإرجاء و الإرجاء ده عبارة عن إنهم بينادو تواريخ ميلاد معينة يدخلوا الجيش و تواريج تعفى مؤقتا ، لكن الشئ اللطيف إنهم بقالهم سبع سنين بياخدو بتوح اقسام الحاسبات كلهم و طبعا بيشغلوهم عساكر كتابة على الكمبيوتر و كلام مالوش اي علاقة ببتاع الحاسبات
يوم 13-9 الكشف بتاح حلمية الزيتون و كشف الهيئة و العجيب انهم إختارو اول يوم رمضان يعني هيكون حر و صيام و تعذيب و ذل كمان — ربنا ينصرنا إن شاء الله
انا فعلا محتاج دعائكم جدا و ربنا يعدي الأيام دي على خير إن شاء الله
