من بيت الزوجية
السلام عليكم جميعا…
دا أول بوست لي أكتبه من بيت الزوجية
انا و أحمد اتجوزنا يوم الخميس 31 يناير 2008 , والحمد لله كانت ليلة جميلة جدا عقبالكم جميعا ان شاء الله
بعد الفرح سافرنا يوم الجمعة للغردقة و قضينا هناك يومين بس اييهه دلع دلع على الآخر
الفندق كان وهمي ماشاء الله و تحس ان هم مش وراهم حاجه هناك غير انهم يضحكم في وشك و يريحوك
الغردقة مدينة جميلة للاستجمام فعلا, لكن اللي كانت ممتعة جدا بجد هى شرم الشيخ
سافرناها يوم الأحد ورجعنا الخميس
شرم بقى مدينة جمييييلة جدااااا فى شوارعها وخضرتها و فسحها
بس لو سألتم أحمد هيقولكم ان أجمل حاجه شرم هي الروسيين وانه كان نفسه يروح شرم مرة قبل الجواز رغم اني والله كنت سايباه براحته
اصل هناك مفيش مكان تقدر تغض فيه بصرك والاظرف ان احنا كنا الفرجة بتوعهم يعني خلال الاسبوع ماشفناش اكتر من 3 أسر مصريه والباقى ربنا يسهلهم بقى
هناك رحنا سفارى و كانت جامدددةة و عملنا
snorkling
أو بمعنى أصح أحمد بس اللي عمل وانا فرجت عليا الأجانب عشان مش بعرف أعوم وجالي حالة ذعر لما نزلت المية لدرجة انى كنت هغرق أحمد معايا
المهم رجعنا الحمد لله يوم الخميس على بيت الأسرة في المحلة عشان نقضي اسبوع معاهم والحمد لله رجعنا امبارح لشقتنا في القاهرة والنهاردة يعتبر عمليا أول يوم أتولى فيه زمام الأمور في بيت الزوجية
يعني من الأخر بدأت أطبخ واغسل , و دعواتكم بقى
انشاء الله احنا طالعين رحلة الكات يوم الجمعة 22 فبراير اللي هتروح دريم بارك
انا المرة الوحيدة اللي رحت فيها دريم بارك كنت في تانية ثانوي وكانت أول مرة أشوف أحمد واتكلم معاه
واديني بعد 9 سنين هروحها تاني وانا معاه بعد ما ربنا اكرمني و حققلي حلم عمري و هو اني أعيش بقيت عمري معاه
ربنا يخليهولي يا رب دايما
عقبالكم جميعا يا رب
