على الرغم من ان المعارضين للقانون ده كتير قوى بطريقة تخليك مكسوف تقول انك مأيدو ، بس انا فعلاً مأيده و بشكل كبير جداً كمان لكن بعد شوية تركيز كده بدأ رأيي يتغير و هقوللكو لييييه

القصة و ما فيها اني مخنوق بشكل رهيب من المرور في القاهرة، مش بس عشان الزحمة بس عشان انا بحب احافظ على العربية بتاعتي جداً و دة شئ مستحيل في القاهرة عشان مفيش اي قانون للسواقة، الموضوع كلو عباره عن عشوائية تامة و بعد شوية دراسة كدة اكتشفت ان المشكلة اني بحاول دايما اسوق باحترام و التزم بالحارة المرورية بتاعتي لكن اكتشفت ان دة من سابع المستحيلااااات لآن لازم يطلعلك حد ماشي بمنتهى البطئ في الشمال او عربية نقل بتتمخطر ف تضطر انك تنقل على حاره تانيه و دي في حد ذاتها مشكلة لآن الناس اللي على اليمين مايعرفوش ان من حقك تنقل للحاره الايمن من غير ماتستأذن لكن تلاقي كل الناس بتزمر و كانك لو جيت قدامه هيتأخر على المعاد اللي وراه ساعتين

يا جماعة انا كل اللي بحلم بيه اني اتبع القانون و نمشي في امان م لازم تبقى عملية السواقة عملية محفوفة بالمخاطر قوي كدة دة غير الضغط النفسي و العصبي الرهيب اللي بتشوفو كل يوم

طبعاً القانون الجديد المفروض انه رادع و هيمنع اي حد انه يغلط و يسوق بالطريقة المتخلفة اللي الناس بتسوق بيها و كأن اللي نازل مشوار دة بيتحدى العالم انه اصيع و اسرع سواق في العالم و لكن اللي انا شفته خلال اليومين اللي فاتو دول ان مفيش اي تغيير حصل و حتى الناس مش خايفة و كل الناس بتقوللك ان هما عاملين القانون دة عششان يلمو فلوش شنطة الاسعاف و المثلث اللي انا شايفهم مفيدين جداً على عكس ناس كتير و محدش غير طريقة السواقة و برضو فضل دوري في الطريق اني احاول بكل قدراتي العقلية و النفسيه اني اتجنب كمية الاغبياء اللي اتحطت تحتهم عربيات و احاول اوصل البيت من غير اي مشاكل نفسيه او اضرار بالعربية

و بعة ماركزت شوية لقيت ان القانون مش بيعمل اي حاجه لها علاقة بآداب المرور و الحارة المرورية و لا  حتى استخدام الكالاكس بشكل همجي و مزعج و لا اي حاجه ن الحاجات اللي بيتضايقني، كلها شوية غرامات  و عقوبات على نفس الحاجات اللي كان المرور بياكل منها عيش، هما تقريباً عايزين يخلوا العيش ده جاتوه تقريباً

يمكن انا حكمت على القانون بدري قوي بس قولولي رأيكم؟ ازززززززاي نخلي المرور في مصر محترم و نضيف و اماااااااااااااااااااان زي اوروبا؟