Do you seriously think that Egypt can be better within the next 20 years?

  • Absolutely Not! (51%)
  • Yes (49%)

Total Votes: 101

Loading ... Loading ...

عندي قدر كبير جداً من المشاعر المتضاربة و اللي بجد محتاج افضفض بيها لأي حد و دة طبعاً حصل بعد رجوعي من سويسرا في رحله تعتبر قصيرة لكن عملت فيها حاجات كتير و شوفت فيها كتييير عن البلد دي ، و طبعا اكتملت بأني زرت جوجل زيورخ و قابلت هناك عدد كبير من مهندسي جوجل

القصه ممكن ابتديها بشعور بالقهر و الظلم كان مسيطر عليا قبل السفر و ده كان سببه قصة عجييبة جداً لكن واضح انها بتحصل لناس كتيير و طبعا الشعب المسالم ساكت ، كنت رايح من المحلة للقاهرة على الطريق الزراعي المبجل و ماشي بدري الساعه 8 صباحاً و طبعاً لأني خبرة فا كنت ماشي بسرعة بطيئة عشان انا عارف ان بيبقى فيه لجان و رادار للسرعة (فلاحظ اني واخد بالي جداً) و كمان الطريق كان زحمة جداً فده يخللي السرعة بطبيعة الحال بطيئة جداااااً

المهم عند قويسنا كدا لقيت لجنة و موقفه عدد كبير جداً من العربيات اللي تقدر تقول عليها نضيفة و قام الصول موقفني و شاف الرخص و ركنت عشان الظابط يقوللي اني كنت ماشي على 98 و لازم ادفع مخالفة 150 جنيه فوري او تتسحب الرخصة و ادفع 3000 جنية في النيابه! طبعاً انا استغربت جداً جداً و ده لأني ماشي طول الوقت تقريباً على 85 و واخد بالي من السرعة جداً فقولتلوا اني و الله متأكد اني معديتش السرعة ، قاللي ماليش دعوة لازم تدفع، طبعاً دفعت و الظريف ان كان واقف ورايا طابور طويل من الناس مطلعين ال150 جنية و جاهزين و متضايقين قوي عشان انا عمال اتناقش مع الظابط و معطلهم ، المهم انا فضلت متعكنن طول الطريق و طبعاً خفضت السرعة اكتر و اكتر و لقيت بعدها اكتر من خمس لجان على الطريق بنفس الطريقة لكن الحمد لله لم يصبني الدور!

المهم خلصت المشوار اللي كان ورايا و طلعت على الطريق الدائري في القاهرة عند ماريوت كدة في اتجاهي للطريق الزراعي تاني و و ساعتها كنت بكلم مراتي في التليفون و بحكيلها المهزلة دي و طبعا انا حريص جدا على السرعة و فجأه لقيت لجنة تانية و وقفووني! انا اول ماشوفت الصول بيقوللي الرخص لو سمحت قولتلوا و الله العظيم حراااام انا لسا دافع 150 مخالفة سرعة اما مارتكبتهاش، قاللي طب هو انت شايفني كاتب حاجة و وراني الورقة اللي بيبقى كاتب فيها ارقام العربيات اللي الرادار بيبلغوا بيها ففعلاً رقمي مش موجود قمت اتطمنت و اديتلوا الرخص ، قاللي طب اركن على جنب و على مانزلت لقيت الظابط كالعادة من وراء طابور كبير من الناس بيقوللي انت كنت ماشي على 105 و انا طبعا كنت هانفجررررر

لما وصل للظابط قولتلوا اني متأكد اني ماشي على السرعة القانونية و متأكد و قولتلوا من فضلك وريني اي حاجة تثبت اني كنت مخالف لأني مكنتش! فقاللي طيب انا هاخد الرخص و هحولك للنيابة عشان انت مش عايز تدفع و ابقى روح دور على صورتك في المروور! فولتلوا هو مش المفروض انهم اعلنوا ان مخالفات السرعة هايبقا على الوصل بتاعها صورتي و انا في العربية؟ قاللي مفيش الكلام ده هتدفع و لا لأ؟!

انا بجد كنت هاتجننن ففجأه جالوا تليفون و لقيتو بيقول طب انا هابعت عربيت رمل دلوقتي ، و قال للعسكرى وقف عربيت رمل و خدها و ارجه للصينية عشان في زيت على الارض و محمد بيه عايز عربيت رمل تغطي الزيت ، قام العسكري راح و انا رجعت اكمل حواري و قولتلو طيب انا هادفع و امري لله و حسبي الله و نعم الوكيل ، قام عامللي الوصل الاهبل ده و انا لسا ماشي لقيت العسكري راجع و معاه واحد بيقول “يا باشا اورح فين يا باشا؟ الحمولة اللي معايا مش بتاعتي و صاحب العربية هايقتلني لو رميتها في الارض و انا راجل غلبان و مقدرش اتحمل تكلفت الحمولة، قام الظابط قاللو “بقة كده؟” طب هاتلي رخصك و تصريح المحجر و نادا على العسكري يشوف اي مخالفه على العربية و الطفاية و الأمن و المتانة و قال للراجل انا بقا هاطلع **** *****”

انا والله جالي شعور رهيييييييييب بالقهر و الظلم و حسيت ان لو الشرطة هي اللي بتنصب علينا؟ امال نجيب مين يحمينا من النصابين؟! و لما روحت ماما كلمت واحدة صاحبتها ابنها ظابط في المرور قالتلها انهم بيجيلهم مكالمة الصبح مفادها ان لازم تلموا مبلغ معين النهارده و اتصرفوووا! و ابنها مستحرم اللي بيعملوا من ظلم للناس و ده طبعا على حد قوله انه غصب عنه

بجد عايز اعرف؟ المفروض نعمل ايه؟ نقعد في البيت و مانركبش عربيات و لا اعمل زي اللي واقفين ورايا في الطابور و كله مطلع فلوسو و جاهز و اللي فكرني بالنكتة بتاعت “ماتزودولنا عدد اللي بيضربونا على قفانا يا ريس عشان نروح شغلنا”

طبعاً ده له علاقة بسفري لسويسرا لكن هاتفهم العلاقة عبارة عن ايه في البوست اللي جاي ان شاء الله!