ما هو السبب في مستوى المرور المتدهور من رأيك ؟

  • أخلاق المصريين (53%)
  • الحكومة (21%)
  • الجهل (18%)
  • الشوارع (5%)
  • الزحام (2%)

Total Votes: 92

Loading ... Loading ...

طبعاً عدد كبير من الناس عارفة اهتمامي الشديد جداً بالمرور و مشاكله و السبب في كده اني حاسس ان خلاصه مشاكل مصر كلها ممكن ان تعبر عنها من خلال المرور و غير انه بيأثر على نفسيتي بشكل مباشر ففعلاً اصبح المرور عبارة عن تعذيب مستمر و منتظم لأعصابي و خطر كبير جداً آتمنى يومياً النجاح في الوصول الى الشغل بأقل الخسائر الممكنه

الخسائر دي اغلبها نفسي ، يعني مثلاً عملية اني اسوق العربيه من البيت للشغل و العكس هي عباره عن عملية عبور غابة مليئة بالوحوش و المخاطر باستخدام دراجه ! لآنك لو ماتخبطش هاتتشتم او تلاقي اربعين واحد بيرقصوا في الشارع كأن هو كدة الطبيعي و طبعاً في محاولاتي المستمرة و المستميتة اني امشي في الحارة المرورية و اتبع قوانين الاولوية وللي تقريباً بحس ان محدش يعرفها غيري ف لازم الاقي واحد بيشتم عشان انا ماشي صح!

المهم، اقصة ايه بانه خلاصة مشاكل مصر ، هاقوللك….

١- الجهل ، الجهل ، الجهل – و الجهل هنا مقصدش بيه الجهل العلمي بس ، لأ اقصد بيه الجهل بكل حاجة يعني مثلاً بالجهل بحقوقك يعني محدش عارف ايه اللي من حقه و ايه اللي مش من حقه ، و الجهل بالاخلاق الحميدة اللي كنا بنسمع عنها زمان دي ، يعني انك لو زنقت علي واحد في الشارع كل اللي انت هاتستفيده انك تبقى قدامو دة هيفرق معاق ثانيتين او اقل و طبعا المخاطر و الفوضي اللي هايعملها تفوق بكتير الفايدة بس في الاخر تلاقي تفكير الناس العام هو “هو يعني انا اللي هاتيجي عليا؟”

٢- اللا مبالاه  – و دي طبعا معروفه و كل الناس بتحسها يومياً و ده بيحصل في صورة انك تلاقي الناس بتحاول تعدي و من غير مايفكر في المصلحه العامه و المنظر ده (في الصوره)  ناس كتير قوي بتشوفه في القاهره و ده حصل معايا انا شخصياً كتيييييييييييير

٣- عدم التخطيط – بمعني انك تلاقي فتحه معينه في الشارع كلللللل الناس بتلف منها و عامله ازمه كبيره او مثلاً لو حد عارف مطلع كوبري ٦ اكتوبر اللي على الكورنيش ، واخد مساحه كبيره جداً و علي الشمال كمان و الباقي من الكورنيش جزء صغير قوي و كللل الناس عايزه تعدي منه و تقريباً مفيش حد بيطلع ٦ اكتوبر من هنا ، طب ليييه ماينزلوش يشوفو الناس بتمشي اكتر ازاي و يكون الطريق مصمم ان الناس الكتييير تمشي في الحته الواسعه و الاقل في الحته الاضيق

٤- الفوضى – زي ماهي موجوده في كل حته فهي تتمثل في المرور بكل اشكالها و هي مثلاً انك تلاقي واحد ركن على الشمال في الطريق الزراعي مثلاً او عربيه نقل ماشيه علي الشمال (و ده اصبح الطبيعي اصلاً) و تيجي تحاول تنقل علي الحاره اللي علي يمينك تلاقي اللي وراك و بعيييد فجأه اندفعت فيه روح النخوة و تدفقت فيه كل الادرينالين اللي في جسمه من دافع الغيره علي الحاره بتاعته و يدوس بنزين بكل قوه عشان يخليك ماتعديش و يرعشلك و يزمر و مش بعيد تسمع اسامي مجموعة حيوانات منها الأليف و منها الشرس ، و الغريب بقا ان من حقك اصلاً انك تنقل من الشمال لليمين و هو لازم يستناك!

كذلك المنظر الظريف اللي في الصوره ده و اللي بنسميه في البرمجه الديد لوك (dead lock) و معناه ان محدش متعتع من هنا الا لو جيت شلت عربيه منهم بطياره هليكوبتر.

طبعاً في نا كتير بتقول ان الشوارع نفسها وحشو و ده حقيقي جداً جداً و على فكره ده سعات بيحطني في مواقف تضطرني اني اكسر على اللي جمبي و إلا عربيتي هي اللي هاتتكسر لكن برضو اللي بيحصل ده سببه المصريين و اللي اصبحوا يعيشون في عمق الجهل و اللامبالاه و الفوضي و التخلف…..

على فكره الزحمه مش هي السبب لأن طوكيو و نيويورك و اللي هما من ازحم دول العالم الناس مابتعملش في بعضها كدة في الشارع….بجد خسارة يا مصر ، كان نفسي اشوفك او على الأقل اقدر اخليكي احسن من كدة ، و البقيه تأتي…