عشان الناس ماتنامش و عشان ده الموضوع اللي مابينيمنيش هانبتدي سريعاً سريعاً بكل المشاكل المتعلقة بالمرور و بالأخص القاهرة و انا اخترت القاهرة طبعاً عشان انا عايش فيها لكن بش بس كده لأن القاهرة بتعبر عن محصلة كل مشاكل مصر في المرور مجتمعة بسبب الزحام و الفوضوية.

تحذير هام : واضح جداً ان البوست ده هايكوون طويييييل جداً انا عمال احضره بجد بقالي فترة كبيره بس انا بفكر اقسمة على اكتر من بوست عشان الناس تقدر تتابع ، لما نشوف ايه اللي هايحصل :)

الفكرة العامة هي ان الناس كلها بعد التخرج بتضطر تروح القاهرة عشان تلاقي فرصة عمل محترمة في شركة محترمه سواء شركة مالتي ناشونال او شرحة محليه لكن الحقيقة العاريه هي ان الشغل في القاهرة و ده لأن كل الشركات دي في القاهرة و للأسف مفيش نفس الفرصة في الأسكندرية مثلاً او غيرها.

و دة بيأدي الى الزياده المهووووووله في عدد سكان القاهرة سنوياً و طبعا ده معناه مشكله اكبر في المواصلات و اكبر في الشوارع ، و المشكلة دي لها حل موجود منذ قديم الأزل لكن احنا مفكرناش نعمله و ده هاتكلم فيه في بحث منفصل.

الكفاءة (Efficiency)

الشباب بتوع هندسة زي حالاتي و المدمنين للرياضيات يعرفو يعني ايه Efficiency و بياخدوها في كل المواد لكن قليل اللي بيعرف يطبقها على الحياة العمليه ، ببساطة الكفاءة هي (الخرج/الدخل) يعني مثلاً في حاله العربيات الدخل هو كمية الوقود و الخرج هو القدرة بالحصان فطبعا كل ما الخرج زاد و الدخل يبقى ثابت الكفاء تزييد يعني كل مالعربية تطلع قدرة اعلى من غير ما استهلاك البنزين يزيد يبقى كفاءتها عاليه آو الحل التاني ان القدره تبقى ثابته و الخرج يزيد ، المهم عشان مصدعكوش تعالو نشوف اشغاليه الشارع بنفس المنطلق ، الرجل (مثلا خريج هندسة) و عايز يشتغل في مكان محترم بيتعين و يلاقي نفسو عسان يجي الشغل كل يوم بالمواصلات لازم يتشتم و يتبهدل و يري ورا كام  ميكروباص و كام سواق تاكسي يذلو ، و في الآخر مش عارف يتأخر في الشغل عشان خايف مايلاقيش اي حاجه توصلوا و يا سلام بقا لو بيلبس بدله يبقى مافيش حل انه يوصل على نفس الهيئة اللي خرج بيها من بيتو فكللل الشاب بيشترو عربيات بالتقسيط عشان يحمي نفسه من البهدله ، يبقي يا خواننا الموضوع عامل ازاي في الشوارع؟ كل شاب جديد دخل القاهرة (قريباً) جايب عربية مساحتها تقريباً ٣.٥ م * ٢.٨م يعني تقريباً ١٠ متر مربع في الشارع هو الوحيد المستفيد بيها يعني ال (foot print) بتاعت كل واحد جاي القاهرة هي ١٠ متر مربع و طبعاً ٩٩٪ من الوقت الراجل بيبقى راكب العربية لوحده يعني ال (overhead) كبير جداً و الزياده رهيييييبه عن قدرة شوارع القاهرة ، يعني الكفاءة سيئة جدا و عايزين نعليها.

فالحل الحقيقي للمشكله مش هو اننا نوسع الشوارع و نشيل الرصيف عشان نوسع الشارع لأن علميا ده هيحل المشكله لمدة سنه او اتنين بالكتيير لكن مش ده الحل الذكي ، ده هو الحل الظاهري و اللي مش ممكن تطبقه في حتت كتيييير لأن توسعه الشارع دي معناها انك تشيل العمارات او تلغي اماكن الركن و اللي هي حاجة اغبى من الاولانيه ، يبقى الخلاصة ان احنا بنحل الحل الغلط لأن احنا حللنا المشكلة غلط اساسا (انظر قاعدة الحل الغلط للمشكله الصح و اللي هي نفسها الحل الصح في المشكلة الغلط) و في الآخر نرجع نصرف فلوس بالهبل و المشكله ماتتحلش.

ايه بقا الاضرار التانيه اللي بتسببها المشكله دي؟

١- تلوث الهواء بمزيد من العادم الفتاك و برضو نصرف فلوس بالهبل و نقول ان مفيش حل

٢- زياده اسعار الوقود و زيوت السيارات و طبعا احنا لما نوفر البنزين يبقى هانصدره و ده احسن لينا كتير من اننا نستهلكوا لأننا بنخسر فيه لما بنبيعو محلي عشان مدعوم او على الأقل نوفروا و نزود الاحتياطي بتاعنا

٣- ارتفاع معدل صيانه الشوارع لان اسهلاك الشارع بسبب عدد العربيات هيزيد

٤- زياده عدد الحوادث بسبب التقارب بين السيارات و الهمجيه المفرطة في القيادة

٥- امتلاء الشوارع بالسيارات و انعدام فرص ايجاد ركنه لسيارتك و بالتالي تضطر تركن صف تاني و عربيتك تتحك

٦- انخفاض الاجتماعيه بين الشعب بسبب انعدام التواصل و عدم انخلاط طبقات الشعب المختلفة

يبقى الحل هو ؟ (عنوان الفقرة القادمة)

المواصلات العامة

المواصلات العامه المحترمة و المنظمة هي الحل الجذري لأغلب مشاكل المرور في مصر ، و ده لازم يتكلف مبالغ كبيرة جداً لكن المبالغ دي في محلها و ممكن بشوية حنكة تجاريه نوفر الفلوس بتاعت الصيانة و غيرو، خليني افهمك اكتر

دلوقتي لو افترضنا ان الميكروباص فيه منه امل (و هو مفيهوش) يعني لو الناس كلها بتركب ميكروباص يبقى الكفاءة عامله ازاي؟ كل ١٠  مواطنين جداد لو هايستخدموا ميكروباص يبقي كل ١٠ ب ميكروباص واحد جديد يعني ٤.٧ م طول و ٣ متر عرض (تقريباً) يعني  ١٤ متر مربع يعني نصيب الواحد (footprint) تقريباً ١.٤١ متر مربع ، حد عارف الفرق ؟ الزياده في الكفاءة هي نفس النسبه (١٠ / ١.٤١) = ٧٠٩٪ يعني سبع مرات احسن ، تعالى نتكلم عن التكلفه بتاعت المثال ده، دلوقتي كل ميكروباص هافترض انه ب ٢٠٠ الف جنيه و بيستفين منه ال ١٠ اشخاص مرتين في اليوم الواحد و هو بيعمل في الساعه مشوارين يعني في ال ٢٤ ساعه بيوصل ٢٤٠ مواطن مرتين يبقى لو افترضت ان الناس اللي بتستخدمه دي هاتشتريه بالتقسيط يدفع كام كل واحد في سنتين؟ ٢٠٠ الف على ٢٤ شهر على ٢٤٠ شخص يعني ٣٤ جنيه في الشهر للمواطن و هيوصلوا مرتين في اليوم يعني تقريباً ١ جنيه في اليوم يعني ٥٠ قرش في التوصيله!!!

شفتوا الرياضيات حلوة ازاي؟ طبعا انا ماحطتش تكاليف الصيانه و تكلفه السواق لكن دول مش مهم لأني افترضت ان نفس الناس بتستخدم نفس الميكروباص كل يوم و ده مش حقيقي قوي لأن فيه مواسم و اجازات و الناس مش بتركب نفس الميكرباص يعني الميكروباصات (Interleaved)

الفكره انك في خلال سنتين بس هاتلم تمن الميكروباص بالكامل و على فكرة هو اختراع فااااشل بكل المقاييس في المدن الكبيره اللي زي القاهرة و بالتالي انا بقترح انه يكون بس في الاقاليم و المدن الصغيره نسبياً على انه يمون مملوك تحت شركه واحدة و يا سلام لو تكون شركة حكومية (بعد وضع خطة لأصلاح نظم الاداره في الشركات الحكومية في بحث تاني ان شاء الله) و ده عشان مايبقاش الناس تحت رحمة مجموعة من الجهله و الحراميه و يكون السواق متعلم و على خلق و مفيش حاجة اسمها تباع من اساسه و ده هوضح هايحصل ازاي كمان شوية

طب بما انة فاشل امال نعمل ايه في القاهرة؟؟ اقوللك

القاهره عايزة اوتوبيسات مش ميكروباصات لأنها اكثر كفاءة و مافيهاش بهدله لان الوتوبيس لازم يكون كل الناس فيه قاعده او بالكتير اتنين واقفين مثلاً و ده ممممكن تحقيقه (على فكره انا حسبت عدد الاشخاص في الميكروباص ١٠ مش ١٤ عشان تعرفوا ان الحسبه تمام لو الناس راكبه مرتاحه جداً كمان) و الفكره اني عايز اخلي القاهرة عباره عن خليه مشتعلة من الاوتوبيسات و اللي هاتشتغل زي النحل يعني وصول الاوتوبيس بميعاد و يوقف مده معينه و الناس مش هاتتزاحم عليه لأنه هايكون كتييير

انا عايز اشوف زحمة القاهره بتاحت النهارده دي بس تكون اوتوبيسات بس تخيلوا الكفاءة عامله ازاي؟! الناس كلللللها هاتوصل اسرع كتيير و اريح لأن العدد المنقول اكبر كتير (لو عايزين التفسير الرياضي فممكن بس انا قولت ماطولش و اسيب البديهيات للناس تفهمها)

الحاجه التانيه هي الترام (المترو) و اللي اقصدة اكتر هو الترام اللي فوق الأرض لأن اللي تحت الأرض تكلفتة عاليه جداً بس برضو مافيش مانع نشتغل في كام خط كمان بس الأولويه الترام ، طب اشمعنه؟

لأن احنا بالفعل عندنا بنيه تحتيه (الى حد ما) للترام و فيه خطوط موجودة فعلا ، طبعاً محتاجة صيانه و تغيير في كابلات الكهرباء و حاجات كده بس احسن من مفيش، الترام الكفاءة بتاعته اكبر ما يمكن و كمان ممكن يبقى الطيق بتاعه مرصوف بحيث الاوتوبيس يمشي في نفس الحاره بتاعته و طبعا كل حاجه ماشيه زي الساعه فالاوتوبيس مش هايقاطع مع الترام بأي شكل من الاشكال ، يعني مش مهم الشوارع تبقى اديق لو حطينا فيها ترام ، المهم الترام يكون نضيف جداً و سريع و منظم. و دي شويه صور بتوضح اللي بقولو و باوريكوا انه موجود ف دول تانيه

انا هاكتفي بكده النهاردة و هكمل النقط التاليه في مرات لاحقه عشان ادي فرصه للناس تفكر و تقول افكارها عشان احطها.

تحديث: انا بس حبيت اضيف الجزء ده لأنه هيوضح الصوره أكتر

الحاجة التانيه هي تشجيع الناس على استخدام المواصلات العامة و مثلاً ده يحصل بأنك هتروح اي حته بس بتكلفه المواصلات لكن نعمل اماكن داخل القاهرة بفلوس يعني مثلاً منطقة وسط البلد الدخول لها ب ٥ جنيه و هكذا و كمان عروض على اشتراكات المواصلات يعني لو معاك كارت اشتراك في المواصلات لمدة اسبوع تاخد تخفيض ١٠٪ على تذاكر السينيما مثلاً او كدة

كمان نرجع تاني نستخدم الجعل (الدراجة) و يبقى فيه قواعد للسير بالعجل بحيث ان الموضوع يبقى آمن و سهل و كمان اماكن لركن العجل تحت حراسة محترمة فالناس تستخدم العجل في المشاوير القصيره او حتى الطويلة لو عايزة

كمان الفكرة اللي في دماغي شوفتها في سويسرا و هي ان كل المواصلات العامة تبقى تحت القطاع العام و تبقى المدينه متقسمه مناطق و تقدر تجيب التذكرة بالمده بحيث ان التذكرة مثلا صالحه لمدة ثلاث ساعات تركب فيها اللي انت عايزة

كمان ليه مانستخدمش النقل النهري؟ يعني ليه اللي عايز يروح من المعادي مثلا لشبرا بالمركب السريع اللي مفيش قدامه عوائق؟

كمان ممكن للمسافات الطويله يعني مثلاً من المنصورة للقاهرة يبقى جامد جداً

رجال المرور

المراقبة

رخص القيادة

اداب القيادة

عبور المشاة