مش عارف ابتدي منين و اقول ايه اصلا بس انا لازم اتكلم و اصرخ ، مش عارف ليه و لا هايفيد بأيه بس مش قادر اسكت مش قادر اسكت …عندي احساس رهيييييب بالألم
احساس بالألم لاني عارف ان برضوا العرب هاتسكت على مذبحة غزة اللي العالم مغمض عينيه عنها و دافن راسف في الرمل و اللي العرب ماتهزوش زي ماهما برضوا ماتهزوش من ايام صابرا و شاتيلا ، احساس بالألم لاني مش فاهم انا عايش ليه اذا ماكنتش عايش عشان ادافع عن اخواتي ، ازاي اكون عايش و بستمتع بالحياه لما اشوف اخويا بيتقتل و انا ممدد رجلي على الترابيزة باتفرج عليه في الاخبار و في ايدي كيس الفيشار!! طيب لما يجي الدور علينا ( و احنا عارفين و متأكدين انو جاي جاي) هايبقى ايه احساسنا و احنا بتدبح و بينتهك عرض بلدنا و ديننا و اخواتنا العرب و المسلمين و حتى المسيحين بيتفرجوا! اماااال احنا بنعمل ايه بالفلوس؟ هو فيه ايه في الدنيا كلها اهم من اخواتي؟؟؟
امبارح و الله ماعرفت انام من الالم و الحزن و الاحساس الرهيب بالعجز و الخجل و الضعف و الثورة ، احاسيس متضاربة و سؤال واحد بس بيضرب في دماغي ، هانقول لربنا كنا فييييين لما كان المسلمين و العرب بيتدبحوا قداااااام عينينا ؟؟ كنا فين ؟
الحقيقة انا مش عارف افكر و كمان مكسوف قوي اني اقول اني مصري بعد ما كانت مصر دي زمان ارض الكنانه و اللي كان بيتعملها ١٠٠٠ حساب ايام عبد الناصر و غيرو…
انا مش بتاع سياسة ، لكن انا بشر و مش قادر بأي شكل من الأشكال اتأقلم مع احساس المهانة و الذل و مش قادر اسكت بس برضوا مش قادر اتكلم ، هاقول ايه؟ و لا هاعمل ايه ؟ اللي يقول دلوقتي هو الاقوي ، المتقدم علميا و المتفوق اقتصادياً (امريكا و اسرائيل) و احنا نسكت و نتأمل في قدرتهم على الابداع و قدرتنا الخارقة على الاستهلاك ، برافو يا عرب
معلومات للي ضايع و مايعرفش: امبارح بس استشهد ٢٢٥ فلسطيني و اصيب ٧٠٠ جريح و اللي هايموت نصهم و اكتر عشان مافيش علاج ولا مستشفيات تكفين في غزة الملاصقه لرفح المصرية
حسبي الله و نعم الوكيل – حسبي الله و نعم الوكيل
