الحقيقة ان رد الفعل كان مشجع جدا و الآراء كانت جميلة و منطقية و انا سعيد جداً خصوصا بالمشركات بتاعت الناس اللي عايشة في دول بره مصر زي اشرف و غيرو  و بجد ده بيساعدنا اننا نشوف اللي الناس بتعملوا برة و ندرس هل ده هايناسبنا ولا لأ.

الحقيقه ان موضوع المرور دة موضوع كبيير جداً و انا قررت ان شاء الله اعمله مشروع منفصل و فعلاً بدأت آخد خطوات جديه ليه لكن عايز متطوعين ، المشروع اسمه (مرور مصر) ، هاتكلم عن الافكار اللي في دماغي الخاصه بالمشروع ده في موضوع منفصل بس دلوقتي و بعد مارجعت الحمد لله من السفر ممكن اكمل شغل في السلسلة اللي هانشتغلها مع بعض ان شاء الله (لو كان الأمر بيدي) ، بعد كل موضوع اما يخلص هاخد افكاركو و اقتراحاتكوا و اعمل ملخص بيجمع الافكار اللي انا طرحتها مع افكاركم بإذن الله

رجال المرور

الحقيقة انا مش شايف داعي للعدد الكبير ده من العساكر و خصوصاً في الاماكن الكبيره و الميادين ، ممكن نستثمر الفلوس بتاعتهم في الاشارات المحترمه و كاميرات مراقبة و ده بدأ يتركب في الجيزة فعلاً لكن انا عايز اقول اني شفت الموضوع ده في الخرطوم – السودان ، و عدد الاشارات هناك رهيم و مستوى الألتزام هناك عالي جدا فعيب قوي لما نكون احنا متأخرين قوي كده.

انا لما رحت سوسرا و الله مالاقيت ولا عسكري مرور في الشارع و انا كنت في زيورخ و النظام في المرور هناك يتدرس في محاضرات، فهل احنا فعلا محتاجينهم؟

ممكن نستفيد من العساكر دول في حاجات تانيه خصوصا انهم مش معينين ، يعني هما في فترة التجنيد بتاعتهم كده كده ، نستفيد بيهم في الاماكن اللي مفيش فيها اشارات و الحواري و الشوارع الضيقة اللي مافيهاش مراقبة ، كمان احسن انهم يشتغلوا في النظافة و يشتغلوا في مراقبة المارة في الشارع بحيث اللي يرمي ورقة يدفع غرامة ١٠٠ جنيه مثلا و ممكن يكون في جزء منهم شغالين في النظافة و تجميل المدينة

كمان الضباط لازم يكونوا قدوة على الألتزام، انا باتغاظ جدا لما الاقي الضباط مظللين الشبابيك و بيسوقوا بمنتهى العشوائية و السرعة و دة عكس اي منطق في الدنيا كلها ، ازاي بتتطلب من الناس تلتزم (ده لو كان هدفه الالتزام اصلا) و انت نفسك مش ملتزم و كمات بتجاهر بدة يعني كل الناس اللي في الشارع عارفين انها عربية ضابط

المفروض رجال المرور ياخدوا تدريب على مستوى عالمي يتعلموا فيه ادب الحوار و مهارات التواصل و يفهموا كويس حقوق المواطن و حقوقهم و يبقي هدفهم الاول و الاخير الحفاظ على النظام في الشارع و تسهيل حركة المرور.

كمان لازم الناس تحترم رجل المرور و ده هايحصل طبيعي لو رجل المرور احترم الناس…