دي رسالة بعتها صديق عزيز ليا و هو المهندس اشرف الرفاعي و حبيت اشاركها معاكم و اعرف رأيكم فيها ، علماً بأن اشرف من الناس القليلة جداً اللي انا مقتنع 100% انهم عباقرة و نوابغ (بارك الله فيه)
السلام عليكم ورحمة الله وبركاتة
قبل ما أقول رأيى أحب أقولكوا إن عمرى تمانية وتلاتين سنة وبقالى عشر سنين فى الغربة يعنى أنا تقريباً لسه فى نص التجربة وقد يتغير رأيى بعد عشرين سنة مثلاً من دلوقتى ؛ واللى هيحيهلكوا ده تطور رحلة مشاعرى بالنسبة لموضوع العودة لمصر.
الموضوع باحتصار شديد جداً إن فية مشكلة اقتصادية فى مصر – وأنا اتعلمت فى كلية الهندسة إن فيه خمس خطوات لحل أى مشكلة أولهم تعريف المشكلة. هذه الخطوات الخمسة ليس من بينها تجاهل المشكلة. يعنى علشان أنا أتجاهل المشكلة الاقتصادية فى مصر وأغنى أغانى عفاف راضى ومصر جوة قلبى والكلام دة وبس ده يبقى شىء غير واقعى. صحيح بنحب مصر وبنحب أهلنا وحبايبنا وأصحابنا ولكن طول مااحنا ضعفاء مش هنقدر نعملهم حاجه بل بالعكس هنزود مشاكلهم وهمومهم وأحزانهم بإنهم هيزعلوا علينا وعلى حالنا. يعنى اللى ربنا يرزقة بشغل برة مصر يتوكل على الله وماينساش أهلة وناسة وزى منتوا راسىين فيه مليون طريقة تقدر تساعد بيها الناس فى مصر وأولها فى رأيى الشخصى إننا نساعدهم يخرجوا من مصر على أد مانقدر.
على فكرة أنا أحد الناس اللى كنت بحب القعدة فى مصر جداً جداً جداً وأول مااتخرجت قلت مستحيل أسيب مصر رغم العروض المغرية جداً اللى كانت بتجيلى أيامها فى دول الخليج – وزى مابعض أعضاء الجروب المحترمين عارفين كنت فاتح شركة كمبيوتر فى المنصورة والشركة كانت محققة نجاح كبير والحمد لله ولكن مع الزمن وبعد أربعة سنوات اكتشفت الحقيقة المؤلمة إننا مابنحبش بعض وأى حد بينجح فى مصر الكل بيبقى عاوز يديلة على قفاة بدءاً من الحكومة ومروراً بالأصدقاء وحتى الناس اللى ماتعرفهمش ومن يومها وأنا قررت أنصح أى حد بحبة إنة يخرج من هذه المخروبة قبل فوات الأوان. ولما حبيت أخرج من مصر قبلت عرض هزيل فى الكويت بمرتب أقل من ربع أى عرض تانى اتعرض عليا لما كنت رافض فكرة السفر.
غربتى بدأت سنة 99 عندما غادرت مصر إلى الكويت. رغم إنى كنت مبسوط بحياتى الجديدة فى الكويت بسبب الدخل الأكبر وساعات العمل المحددة (مش اربعة وعشرين ساعة زى مصر) و و و و إلا إنى فى خلال أول ست شهور كنت بفكر أرجع مصر فى كل لحظة ؛ ولوكان عندى دخل يكفينى أعيش حياة كريمة فى مصر كنت رجعت تانى يوم. هل السبب فى كده كان الأهل والأصدقاء ؛ أو كان إنى وحيد أمى وأبويا ومتدلع شوية ؛ أو كان إنى كنت متأثر بأغانى عفاف راضى مصر هيه أمى ونيلها هو دمى – الله أعلم ؛ انما ده اللى كان حاصل أول ست شهور ؛ كنت قاعد شغال غصب عنى بسبب لقمة العيش.
بعد كده قررت أتعايش مع الواقع وهو إنى هعيش فى الغربة على الأقل الكام سنة الجايين وابتديت أركز على تحسين وضعى ؛ سواء المركز الوظيفى ؛ الدخل على مستوى العمل أو إنى أبتدى أتجوز وأعمل أسرة صغيرة على المستوى الشخصى. وتصادمت هذه الرؤية مع نفاق أهل الخليج المعروف وعدم التزامهم بالعقود والتعهدات ؛ فالمرتب اللى كنت طالع علية كان قليل والشركة كانت واعدانى تزوده بعد تلاتة شهور ولكن أول ماوصلت قالولى هو كده مش عاجبك أمشى. طبعاً أنا كان مش عاجبنى ولكن ماقدرتش أمشى. ولكنى بدأت أدور على شغل تانى وياحبذا لويكون برة الكويت والحمد لله ربنا رزقنى بعقد فى نيوزيلندا. ونيوزيلندا بلد فى آخر العالم بينها وبين الكويت حوالى يومين سفر بالطيارة يعنى منفى ولكنها دولة من دول العالم الأول قلت أهو الواحد يطلع يجرب حظه ويشوف الناس النضيفة اللى بيسمع عنهم فى التليفزيون.
الحياة كانت كويسة فى نيوزيلندا والناس محترمة جداً ورغم ان المرتب كان كبير إلا إنه كان بيتخصم منة جزء كبير ضرايب والباقى بيتصرف أول عن آخر ؛ يعنى كانت غربة زى قلتها وبدأت أدور على شغل تانى. لقيت شغل فى أمريكا وطلع تصريح العمل وكل شىء جاهز على السفر ولكن قبل السفر بأسبوع واحد الشركة أعلنت افلاسها وكان ده بفضل الله قبل ماأستقيل من الشركة النيوزيلندية ؛ وبعد كده جالى شغل فى انجلترا وجيت هنا سنة 2002.
قضيت خمس سنين ونص فى انجلترا حصلت خلالهم على الجنسية البريطانية الكريمة وخلفت بنتين ولكن افتكرت إنى من يوم ماخرجت من مصر مارجعتش تانى ولاحتى زيارة قصيرة فقررت بعد سبع سنين ونص إنى أنزل أسبوعين وكنت اتفقت مع مراتى إنى خلال الزيارة دى أجهز لرجوعنا نهائى لمصر لأسباب معظمها عاطفية وشخصية ولإن البنات ابتدوا يكبروا وكنا نفضل إنهم يكبروا فى مجتمع مسلم.
زى ماكنت بشوف فى التليفزيون كنت متوقع إنى أسجد وأبكى أول ماأوصل مصر بعد المدة دى كلها وفعلاً بكيت من أول ماخرجت من الطيارة لحد ماوصلت المنصور ولكن بكاء من نوع آخر:
طبعاً ماقدرتش أسجد لإن ماكانش فية حتة أسجد فيها ؛ الأرض كانت فى منتهى القذارة حاجة وسخة ماشفتهاش قبل كده غير فى السعودية أيام الحج ومتغسلتش يمكن من أيام أحمس ماطرد الهكسوس من مصر ؛ المهم نيجى للبكاء
بكيت لما شفت الحالة المزرية لمطار القاهرة “الدولى” ؛ أنا كنت ساعتها سافرت حوالى تلاتين دولة وماشفتش مطار أرضيتة بلاط ؛ من اللى هو المعفن بتاع الحمامات القديم أوى ده ؛ غير فى مطار القاهرة.
بكيت لما شفت الهرجلة فى كل مكان ؛ تخيل طيارة واحده فيها حوال متين راكب وقفونا فى طابور ساعتين علشان ندخل مصر المحروسة ؛ واللى معاه عيال تعيط والناس الكبار فى السن بقوا هيقعوا من التعب وطبعاً لافية كرسى ولاأماكن انتظار ولاحتى تقدر تقعد على الأرض من قذارتها.
بكيت أول ماخرجت من مطار القاهرة وصدمت من القذارة اللى فى كل مكان والضوضاء والزحمة وعدم النظام والهرجلة و و و .
بكيت لما شفت حال الناس اتغير وبقى معظم الناس عندهم قلة ذوق لاحدود لها وانتشار البلطجة والفهلوة واحنا اللى خرمنا التعريفة
بكيت لما شفت أحوال أصحابى وقرايبى اللى ماكانوش محظوظين وفضلوا قاعدين فى مصر
وكنت فاكر بعد سبع سنين ونص إنى هحتاج على الأقل أقعد شهرين تلاتة ولكن للأسف بعد يومين تلاتة مافيش غيرهم حسيت بالغربة وإنى عاوز ارجع انجلترا تانى. طبعاً أنا كان ورايا مهمة محددة وهى إنى أجمع أكبر قدر من المعلومات علشان نرجع مصر نهائى ؛ يعنى الحاجات العادية مكان نعيش فية ؛ شغلانة تصرف علينا ؛ مدارس كويسة للبنات و و و الخ. المهم لقيت اننا علشان نعيش فى نفس المستوى اللى احنا عايشين فيه فى انجلترا هنحتاج تقريباً نفس المبلغ ده غير طبعاً ان الدخل فى مصر هيبقى أقل بكتير. الحاجة التانية إن السبب الرئيسى لرجوعنا مصر كان سبب دينى إننا عاوزين نعيش فى دولة إسلامية والبنات يتربوا فى دولة إسلامية ولكن للأسف الواقع المرير هو ان الدول الإسلامية دول إسلامية بالإسم فقط ومعظم من فيها لايعرفون من الإسلام إلا إسمة ؛ إلا من رحم ربى طبعاً. ده غير ان المسلم بيتمتع بحريات أكبر بكتير فى البلاد الغربية إلا حاجات بسيطة زى تعدد الزوجات ولكن بصفة عامة هنا الواحد بيقدر يعمل اللى هو عاوزة. يعنى مثال بسيط أنا عندى لحية صغيرة شكلها أقرب للخنفسة منها للتدين ولكن كل مرة أنزل مصر يوقفونى ييجى نص ساعة فى الجوازات (ده طبعاً بعد الساعتين فى الطابور) علشان يشوفوا حكايتى ايه. لما بنزل مصر مابعرفش حتى أروح أصلى الصلوات الخمسة فى المسجد ؛ المرة اللى نزلت فيها اسبوعين دى لقيت أمن الدولة جايين البيت علشان صليت كذا مرة فى مسجد السلاب من يومها وأنا حرمت أروح أصلى فى المسجد. هنا طبعاً مافيش الكلام الفارغ ده والبلطجة بتاعة الشرطة اللى موجوده فى مصر دى. ده غير إنى من يوم ماخرجت من مصر مادفعتش رشوة ولله الحمد ؛ طبعاً ماحدش يقدر ينكر انك دلوقتى لازم رشوة وواسطه علشان تمشى حالك فى بلاد المسلمين. ده غير أخلاق معظم الناس هنا ؛ قد يكون السبب ان مستوى الحياة أحسن أو ان ماعندهمش المشاكل اللى عند الناس فى مصر ولكن النتيجة ان معظم الناس هنا محترمين ومعظم الناس فى مصر غير كده ؛ ومش عاوز اتكلم بأه 
لحظة البكاء الحقيقية والفرحة بالعودة للوطن حسيتها فعلاً لما رجعت انجلترا ؛ من أول ماخرجت بالطيارة حسيت بالفرق الشاسع ؛ المضيفات والمضيفين بيحيوك بابتسامة ويودعوك ؛ موظفى الجوازات على وجههم ابتسامة وبيقولولك حمد لله على السلامة ؛ موظف الجمارك بيحييك بابتسامة ؛ وأول ماخرجت من المطار وخدت عربيتى من الموقف واتجهت إلى البيت حسيت إن الروح ردت فيا ؛ الشوارع نضيفة ومعظم الناس اللى سايقة عربيات فى الشارع عارفة القانون وملتزمة بية ومافيش لادوشة ولاهرجلة وكل حاجة زى ماالكتاب بيقول. وساعتها قلت لنفسى دنا أبقى حمار واستاهل ضرب الجزمة لو فكرت أرجع مصر نهائى ؛ واحد زيى مفروض يصلى ركعتين شكر لله كل يوم اللى أخرجنى من هذه البلد على خير.
صحيح أنا اتعلمت بفلوس الشعب المصرى الفقير بحد مابقيت مهندس ولله الحمد ولكن فية طرق كتير لرد الجميل غير إنى أضيع نفسى وزوجتى وأولادى وأرجع مصر.
وشىء مهم جداً برضة إننا ماننساش فضل البلاد اللى أكرمتنا علينا – يعنى مش علشان بنحب مصر تبقى السعودية أو أى بلد تانية وحشة – أنا عن نفسى بحب بريطانيا جداً ومدين ليها بفضل كبير بعد فضل الله سبحانة وتعالى ؛ مش بس قاعد هنا علشان الفلوس.
أنا عارف ان فيه ناس كتير هتختلف معايا ؛ بس هيه دى تجربتى وهو ده شعورى حتى إشعار آخر. لو رأيى اتغير هبقى أبلغكوا ان شاء الله.
آسف على الإطالة وهطلب منكوا طلب صغير قبل ماحد يبعت أى تعليق خاصة على موضوع أحوال المسلمين فى بلاد المسلمين ياريت ماحدش يقعد يعددلى فى مزايا الإسلام ؛ أنا مابتكلمش على الإسلام ؛ فأنا بفضل الله مسلم ومقتنع تماماً بأن الإسلام أفضل أسلوب حياة على وجة الأرض فى جميع المجالات وتحاورت مع غير المسلمين أكتر من أى واحد فى الجروب ؛ أنا بتكلم على مسلمى هذا الزمان فى البلاد اللى غالبية سكانها مسلمين واستثنى من ذلك ماليزيا فهى مثال رائع لما يجب أن يكون علية المسلمون والبلد المسلم ؛ والله من وراء القصد.
والسلام عليكم ورحمة الله وبركاتة
أشرف الرفاعى
Ahmed Soliman Farghal is a professional "Software/Systems" engineer with exceptional computer science background and spectacular record of projects and achievements.
اولا
شكرا بجد على مشاركتك لتجربتك, وشكر ليك يا أحمد
ثانيا
فعلا انت عندك حق فى كل كلمة
البلد هنا اصبحت مجرد اسم بس ليس الا يعنى اسمنا دولة اسلامية و بس
فين بقى الأخلاق , الأحترام , …… الخ
فين قيم واخلاق الإسلام
إلا من رحم ربى
انا فعلا رحت مطار القاهرة اكتر من مرة وشفت البهدلة و التهريج اللى بيحصل هناك
فعلا ده اسمه تهريج ,,
ناهيك عن امن الدولة المصرى و قصص وحكايات مع اشخاص اعرفهم شخصيا
فعلا الوضع هنا غير طبيعا بالمرة
ربنا يستر علينا جميعا
” إن الله لايغير مابقوم حتى يغيروا مابأنفسهم ”
سلاام
أنا مش هعلق غير على حاجه واحده
زى ما محمد عبده قال
هناك إسلام بلا مسلمين وهنا مسلمين بلا إسلام !!!
الف شكر على الموضوع الجميل ده للباشمهندس وليك ياأحمد طبعا
بالنسبه أنك انت نزلت واتفاجأت بأحوال المصريين , فده معناه انك كنت بعيد تماما عن احوال مصر لفتره كبيره, وانا شايف ان ده مش حاجه في مصر , المفروض انك كنت على الاقل تتابع اخبار البلد ياباشمهندس ,
يعني كنت هاتعرف الاحوال الاقتصاديه والسياسيه والاجتماعيه شكلها عامل ازاي , وساعتها ماكنتش هاتتفاجأ بنسبه كبيره اوي لما تنزل مصر
اما بالنسبه لسواق التاكسي مثلا اللي انت للاسف الشديد ماقيتش ابتسامه على وشه, فمعلش لو ممكن تعذره لانك ماتعرفش كم الهموم والاقساط والحاجات الغريبه بسبب الظروف اللي انت واضح انك ماسمعتش عنها . ده غير ان الراجل ده مش واخد كورس في التنميه البشريه او يعرف بروتوكول التعامل مع الاخرين .. ده غير برده انه مابيركبش معاه حد غير لما يزله بالاجره اللي هو واخدها
اما بالنسبه لحكايه اني انصح حبايبي بالسفر بره , فده شيء كويس , بس من باب انه يبني حياته او يكون نفسه , لكن مش علشان يحس لما يرجع انه مش بلده او مايحسش بالامان
ده غير ان لو كنا عملنا كده هاتلاقي البلد دي فاضيه , مفيهاش حد , وتحولت لكوم زباله .
يعني مش معنى ان ام صاحبي كويسه ودكتوره ورشه برفان على طول وبتعطيني شيكولاته كل ماروح عندها , ان امي الجاهله اللي ريحتها طبيخ او اي حاجه تبقى كخه وماتنفعش ام اترمي في حضنها في يوم من الايام.
بالنسبه لاحوال المسلمين
فانا شايف ان ماعدش في حاجه اسمه دوله اسلاميه , وده طبعا بسببي وسببك وسبب ناس كتير .
انا اسف ع الرد الطويل , واتمنى انك تقبل مني التعليق , انا برده برد وانا بره الموضوع , يعني ماجربتش الغربه قبل كده
يمكن انا مش ليا تجربة أدامى لحد للسفر برة للدول الأجنبية بس انا عندى كذا نقطة عايزة اعلق عليها
أولا انت لو بتحب مصر فعلا يبقى مش هتفرق معاك انت بتحبها علشان هى نظيفة ولا لأ . انا عارفة يمكن النقطة دى تكون مش منطقية معاك
بس انا لما بحب أمى مثلا مش بحبها علشان هى أحلى وأجمل أم فى الدنيا انا بحبها علشان هى أمى
انا عارفة ان نفسك تشوفها فى أحسن صورها وان هى تكون احلى بلد فى الدنيا بس للأسف ده الواقع اللى عايشينه ان تلاقى الشخص جامعى وله مركز اجتماعى ويرمى الزبالة بتاعته فى الشارع ومش من بعيد من البلكونة كمان ودى أكتر حاجة انا شخصيا بتنرفزنى جدااااااااااا
ثانيا نقطة الحرية الدينية والمجتمع الاسلامى اللى فوجئت انه مش موجود هنا للأسف عندك حق فى النقطة دى بس برضه أرجع وأقول ارحم من هناك
يعنى مثلا انا مش متخيلة رمضان برة عامل ازاى ؟وفيه فعلا تجمع الناس فى التراويح وقيام الليل زى هنا ولا لأ
بس لو جينا نقارن على المدارس اعتقد ان المدارس هناك كتعليم أحسن لكن من اللى بشوفه فى الأفلام الأجنبى ان معتقدت انها مكان آمن لتربية بنت فيه
يعنى هحسن مستواها العلمى وهضيع حاجات تانية جنبها كتير
اسفة على الإطالة وممكن تكون وجهة نظرى مش سليمة لبعض الناس بس دى مجرد وجهة نظر
بما إني عايش كل كلمة في البوست دي ,, بكل إحساس كتبه صاحب الكلمات دي ,,
بقول فعلا كل واحد عايش برة مصر حاسس بالمعاني دي دلوقتي ,, أنا نزلت مصر إسبوع من فترة بسيطة ,, رجعت تاني السعودية أول ما نزلت الطيارة في مطار الملك خالد ,, وفي دقايق مع معاملة (أدمية) مع ظباط الجوازات وشوفت أصحابي في المطار ,, أول ما ركبت العربية لاقيت نفسي بقول
Welcome Back to home !!
صاحبي بصلي ,, وفهم قصدي وسكت
,,,
كل مرة أنزل فيها مطار القاهرة بحس بضيق تنفس وضيق في صدري غير طبيعي ,, طبعا بصرف النظر عن المعاملة السيئة في المطار وخارج المطار وكل خطوة في أي حتة في بلدنا (مع الشك في التعبير ده) إحساس بالغربة الشديدة في كل حاجة ,, حتى الطباع اللي كنا سايبينها في الناس اللي بنحبهم وإحنا ماشيين فيه كتير منها إتغير ,,,, البوست بصراحة شرح بتفاصيل أكتر كتير ,, ولو حبينا نفتح في الإحساسات دي ,, والصور السيئة اللي بنشوفها لما نرجع (بلدنا) بعد الغربة ممكن يتكتب فيها كتب
,,
أخيرا عايز أقول حاجة ,, الإحساس بالوطن فعلا أصبح متناهي الصغر مكسوف يختفي
بس للكسوف نهاية
شكرا ليك يا باشمهندس و يا باشمهندس احمد على المشاركة الوجدانية دى
أولا:أنا لسة طالب ولسة سنة ان شاء الله و أتخرج (قولو يا رب) ودايما موضوع السفر ده بيشغل دماغ اى حد فى وقت زى ده
أنا بقى لما فكرت فى الموضوع ده بصيت له من ناحيتين اول حاجة رغبتى فى تحقيق طموحى و حبى لأهلى و صحابى و الأماكن اللى بحبها فى مصر
اول حاجة طموحى:اعتقد انى عرفت من بدرى ان مصر مش مكان لتحقيقها خالص والا كنت حققت طموحى فى تعليم كويس او فى حاياه هادية
تانى حاجة حبى لأهلى و صحابى و كدة: الناس دوول كلهم بيقولوى سافر يابنى دا غير نصهم اصلا مسافرين زى اخويا مثلا عايش فى كندا و بيكلمنى عن حاجات غريبة عليا و يمكن عليكم زى الإحترام و النظام و الأمانة و العدل
ثانيا: هوه ليه احنا بنتردد فى حاجة زى كدة ولا عيب ولا حرام و كمان ده حقنا انا من رايى انه مفيش حاجة تقعدنى فى البلد دى غير مسئولية فرض عين عليا مش هيأديها حد غيرى
ثالثا:اللى بيحب البلد دى بقى و بيمووت فى ترابها ومش قادر يفارقها لازم يعرف انك عشان تعرف تعيش هنا يا اما بفلوسك يا اما بنفوذك لكن علمك و كدة مش بياكل معاهم خالص
المشكلة ان في” ناس” مش عايزين الوضع يتغير و” الناس” دي هي اللي متحكمة في كل حاجة يعني حتى لو احنا ناس كويسين و عايزين نعمل تغيير و نفيد البلد مش هانقدر و في النهاية هانخسر وقت و مجهود على الفاضي ويبقى اﻷحسن ان اللي يقدر يسافر يسافر و يبني مستقبله و يتعلم و يستنى الظروف تتغير في مصر و الناس اللي مبوظنها يمشوا و قتها ممكن يرجع مصر و معاه العلم اللي اتعلمه لما سافر و يقدر يفيد البلد بجد
thanks
السلام عليكم
Nice to meet u and to meet ur Experience, about the last part u mentioned :
الناس اللى شايفه إن الحياة فى بلد اسمه إسلامى يعج بالمسلمين
is better, I have an Opinion about :
So u just Imitate your neighbor or mate … you see him Muslim … U don’t feel that u should be different or something, Here Come the mixture Of Religion with Traditions and Doing Something Different make ppl Object You with No understanding ..
But being in a western country making you more careful about your Religion so as to do things Right .
(and ur children’s too)
About Other your Words … Ya all are right .. for me very Important to live in a better place, Have better services, “Feel ur voice can be heard”
, so U won’t explode One day ..
To a very near time I believed I should have a message about helping this country to be better .. but now I believe it’s my right to Travel all around the World My God’s Earth Yes it’s my right, Doing all what I want under the Islam slogan.
still I am proud to be Egyptian but I can’t stay here .. I can’t stand more ..
One more thing to stay … My family, my closer ppl .. But Do they are not everlasting ?.. Allah is every where . I have seen Someone who stayed for ppl who are dead now .. you can feel how much he is regretting and sad now .
sorry for the long talk this is may postpone My explosion a little more
.
@Sara : if Your mother treating you that you can’t stand it . you should avoid feeling that stay away . because you shouldn’t refuse what she is doing in a bad way . as allah told us.and still ur duty to love her . may be a good way to keep loving Egypt is to stay away
thanks for sharing eng Ahmed
الأخوة الأحباء
السلام عليكم ورحمة الله وبركاتة
شكراً على تعليقاتكم الكريمة – بصراحة ماكنتش فاكر ان البلوج بتاع أحمد عليه اقبال كده ؛ أنا كنت فاكر ماحدش بيزورة غير أحمد واتنين تلاتة أصحابة
عموماً البوست ده كان تعليق على مقال بعتة أخونا الحبيب المهندس محمد وصفى لجروب “المنصورة” على ياهو وطلب تعليق من الناس اللى فى الغربة. وبما إنى فى الغربة وبحبها جداً ولله الحمد ومش ناوى ولاعاوز أرجع مصر قلت أشارك بتجربتى الشخصية يمكن تفيد حد. ارجو إنى ماأكونش ضايقت حد بكلامى ودى تجربتى وآرائى الشخصية ووجهة نظرى برضة الشخصية اللى بتنطبق على ظروفى أنا وعيلتى الصغيرة ويمكن تختلف من واحد للتانى حسب الظروف.
أخونا الحبيب سيد فتحى ؛ أنا الحمد لله متابع أخبار مصر من يوم ماسبتها لإن عيلتى كبيرة وعندى عدد لانهائى من الأصدقاء لم أفقد واحد منهم إلى اليوم بفضل الله تعالى بل أن العدد فى ازدياد مستمر. واحنا زى منت عارف فى القرن الواحد والعشرين دلوقتى ووسائل الاتصال الصوتية والمرئية والإى ميل والإنترنت والويب-كام وخلافة متوفرة منذ أكثر من عشر سنوات.
ولكن ياأخى الحبيب بصراحة الموضوع زاد أوى أوى أوى عن يوم ماسبت مصر سنة 99. أيامها كان الموظف بيفتح الدرج على استحياء علشان تحطلة الفلوس فيه وكان يقعد بيص حوالية ساعة علشان يتأكد ان مافيش حد شايفة ؛ دلوقتى بيقولك علنى أدام الناس كلها “ظرفنى تعرفنى”. موظف الجمارك كان زمان مستحيل يطلب منك رشوة ؛ صحيح كان بيتفق مع العمال ويقسموا المبلغ بينهم ولكن دلوقتى هو اللى بيبعتك للعمال علشان تدفعلهم علشان رئيسة مايشوفوش ؛ ولو شافة مافيش مشكلة برضة عشرة جنية فى جيبة والموضوع خلص.
سواق التاكسى اللى ركبت معاه من مطار القاهرة للمنصورة كان بيضحك ومبسوط جداً إنة شافنى لإنة ابن عمى ؛ وعلى فكرة أنا ماجبتش سيرة سواق التاكسى خالص فى كلامى
بالنسبة لموضوع ان الواحد يخرج برة مصر يكون نفسة ويرجع ولا يخرج ويقعد برة على طول فزى ماقلت فى بداية كلامى دى حاجة شخصية وقد تتغير من شخص لآخر حسب الظروف ؛ وزى ماقلت فى أول البوست إنى لسه فى نص التجربة وممكن رأيى يتغير بعد فترة من الزمن ؛ بعد مثلاً ماالعيال يتجوزوا ويروحوا على بيتهم وألاقى نفسى أنا ومراتى قاعدين لوحدينا فى بلد غريبة.
وبعدين الكلام اللى أنا قلتة عن مصر ده لإنى حزين على هذا الوضع مش لإنى بشتكى. صدقنى انت يمكن تفكر ان انجلترا أنضف من مصر لإن فيها امكانيات أو أو أو ؛ أبداً الموضوع مش كده خالص وهو ده الشىء اللى يحزن. هديك مثال بسيط ؛ مطار هيثرو تدخل الحمام تلاقية بيبرق وعمرك ماتشم فيه ريحة وحشة. تفتكر ده ليه؟ هل الناس هنا لما بتدخل الحمام بتعمل شوكالاتة واحنا اللى ولاد ستين فى سبعين بنعمل حاجات ريحتها وحشة؟ ؛ طبعاً لأ ؛ طيب هل لإن فية عمال نظافة وفى مصر مافيش؟ برضة لأ بالعكس مطار القاهرة فية حمامين فقط لاغير واقف عليهم اتنين عمال نظافة قاعدين يشحتوا من اللى داخل واللى خارج أما مطار هيثرو العامل الواحد بينضف على الأقل عشر حمامات ؛ يفضل طول التمن ساعات شغل بتوعة يتنقل بين الحمامات دى ينضفها لإن فية ريس بيمر علية ولو الحمامات مش نضيفة بيخلى عيشتة هباب ؛ ولإن الحمام متعلق فية ورقة عليها رقم تليفون وعنوان بريدى للشكوى لو دخلت ولقيت الحمام مش نضيف ؛ أما فى مصر فالحالة زى منت فاهم هرجلة فى هرجلة. تخيل انت دخلت حمام فى مصر لقيتة مش نضيف وخرجت زى الباشا كده قلت لعامل النظافة أنا عاوز اشتكى أعمل ايه؟ – هو نفسة مش عارف يشتكى لمين
طيب بلاش الحمام ؛ ظابط الجوازات اللى كل مرة أنزل فيها مصر ألاقى على وشة غضب ربنا ؛ أظن ده راجل بياخد مرتب محترم ومافيش حد واخد حقة فى البلد زية (غالباً بيبقى نقيب فما فوق) – ايه سبب قلة الذوق والجليطة وقلة الأدب اللى بيبقى فيها؟ – على فكرة دى ظاهرة مش موجودة غير فى مصر فقط. أنا سافرت بلاد كتير ماشفتش هذا المنظر غير فى مصر. أنا لو حصلى موقف زى ده فى أى مطار من مطارات العالم هشتكى وهعرف آخد حقى بالذوق أما فى مصر كل اللى اقدر اعملة إنى أضرب دماغى فى الحيطة.
أمى مهما كانت ريحتها وحشة طبعاً هترمى فى حضنها ولكن ايه المانع اشتريلها قزازة كولونيا فى عيد الأم علشان لما آجى أحضنها تانى ألاقى ريحتها حلوة؟
وعلى فكرة من أحد عيوب الغربة إنك على طول بتسأل نفسك “هل أنا هربان؟” ؛ “هل أنا سايب أهلى وناسى وحبايبى فى مصر ومابفكرش غير فى نفسى وبس؟” – بصراحة أنا مريت بالمرحلة دى من تأنيب الضمير بس أنا شايف إنى أقدر أفيد أهلى وناسى وأصحابى أكتر بوجودى برة مصر وده شىء ممكن نتكلم فيه بالتفصيل لو عاوز ودايماً لما بييجى الهاجس ده فى دماغى بسأل نفسى ياترى كان هيبقى ايه الوضع لو أنا ماخرجتش من مصر أو لو أنا رجعت مصر نهائى؟ – بصراحة شديدة دايماً الجواب بيكون: الوضع أكيد كان هيبقى أسوأ بكتير. بس برضة ارجع واقولك ده رأيى الشخصى وقد تتفق أو تختلف معايا والاختلاف فى الرأى لايفسد للود قضية ان شاء الله.
أختنا الحبيبة سارة ؛ الحياة هنا برضة ليها عيوبها مش حياة وردية وطبعاً رمضان هنا مش زى رمضان فى مصر ولكن ده بسبب البعد عن الأهل مش بسبب أى حاجة تانية. أما بالنسبة للحاجات التانية فكلها موجودة هنا والحمد لله ؛ يعنى مثلاً صلاة التراويح لو مارحتش قبلها بربع ساعة على الأقل ممكن ملاقيش مكان أصلى فية من كتر الناس اللى بتروح تصلى كذلك صلاة الفجر. أنا ساكن فى بلد اسمها لوتن فيها تلاتين ألف مسلم وسبع مساجد كبيرة غير المساجد الصغيرة والزوايا المنتشرة بكثرة. ياميش رمضان برضة موجود هنا لكافة أنواعة وأشكالة بس احنا بنجيبة من مصر علشان بيبقى أرخص كتير
بالنسبة للمدارس فيه هنا مدارس إسلامية كتير جداً. لما نوران بنتى الكبيرة جت تدخل المدرسة احنا طبعاً كنا ناويين ندخلها مدرسة إسلامية والحقيقة أنا ومراتى عملنا بحث كتير فى الموضوع دة وفى الآخر قررنا ندخلها مدرسة انجليزية (مش إسلامية) ونوديها مدرسة إسلامية يوم السبت (اللى هو المفروض أجازة مع الأحد) علشان تتعلم اللغة العربية والقرآن والدين. المدارس هنا غير مابتشوفى فى الأفلام خالص وأولياء الأمور بيعرفوا كل صغيرة وكبيرة بتتدرس للعيال وممكن يطلبوا ان حاجات معينة ماتتدرسش لأبنائهم زى الجنس مثلاً أو معتقدات دينية معينة. قبل ماناخد القرار ده اتكلمنا مع مسلمين كتير جداً وشفنا بناتهم اللى دلوقتى فى سن الجامعة أو أكبر ماشاء الله عليهم مثال رائع لبنات المسلمات. وعلى فكرة معظم البنات المسلمات هنا محجبات ونادراً ماتلاقى واحده مسلمة غير محجبة. نوران بنتى رغن إنها فى مدرسة انجليزية إلا ان معظم زمايلها فى الفصل مسلمات (تمانية وعشرين تلميذ وتلميذة مسلمين من أصل تلاتين) والأكل فى المدرسة كلة حلال يعنى لو فية لحوم بتبقى مدبوحة على الطريقة الإسلامية لو فية حاجة فيها جيلاتين لازم يتأكدوا إنه جيلاتين أصلة نباتى مش حيوانى وهكذا. ده طبعاً لإننا عايشين فى منطقة إسلامية ودى ميزة انجلترا ان مافيهاش مركزية.
لو حد عاوز يقول حاجة تانية على الرحب والسعة وأنا هعلق عليها ان شاء الله لو تعليقى مطلوب ولكن دلوقتى اسمحولى أقوم أنام علشان الساعة واحده ونص وأنا ورايا شغل الصبح
وعلشان أثبتلكوا إنى متابع اللى بيحصل فى مصر أحب أقول هارد-لاك للمنتخب المصرى بعد هزيمتة اليوم من منتخب الجزائر اللى بصراحة لعبوا أحسن منهم ميت مرة.
اولا حبيت احيي المهندس احمد سليمان على انتقاء افكاره الاكثر من رائع .. وانتقاء الاشياء الي بيحب يشاركنا فيها …
ثانيا : حبيت اقول للمهندس اشرف الرفاعي المتابع لمتشات مصر ودا طبعا دليل على حبو ومتابعتوا للاحداث
..حبيت اقولوا اكيد وجودك في انجلترا افضل بكتير من وجودك في مصر وانت شرحت الفروق بين مصر وبين انجلترا وواضح جدا مصلحتك فين
مش عيب ابدا اننا ندور على مصلحتنا وكمان مش عيب اننا نحب اننا نكون ناجحين .. لكن العيب اننا نسيب المركب تغرق وهيه فيه اهلي واصحابي وحبايبي واقول ان شاء الله فيه طرق كتير ممكن اساعدهم بيها .. بتفكرني بامريكا وهيه بتبعت مساعدات لمصر انا على فكرة متغرب انا كمان .. بس الفرق بيني وبينك اني نفسي ارجع .. وابقى في مصر . بحبها على الرغم من قبحها .. والله نفسي اغيرها واخليها احسن بلد في الدنيا وبحاول حتى لو بدات بشخص واحد. وحتى لو الشخص دا هوه انا
طرق رد الجميل والكلام الي انت بتقولوا دا يا هندسة سيبك منو… هتعمل ايه يعني .. هتبعت فلوس .. يباه امريكا والامريكان وطنين اكتر منك .. ولا هتفكر تحل مشكلة انت مش عايشها .. اظن انوا في المشمش يعني
مصر محتاجة لحد بيحبها وعاوز يغيرها .. انا منكرش انك بتحبها .. لكن انت مش عاوزة تغيرها .. انت عاوز بلد متغيرة جاهزة… تخيل كده معايا يا هندسة .. لو كل واحد بيحب النظافة راح انجلترا وامريكا وفرنسا .. اكيد شوارع مصر مش هتبقى نظيفة … وبعدين لما ترجع وتلاقي الشوراع بالمنظر دا . تقول لا لا لا مستحيل اقعد فيها ومستحيل اربي بناتي هنا ….. انا اكاد اجزم انك وانت فيها كنت واحد من الي رموا ورقة في الشارع وشاركوا في المنظر الي مش عاجبك دلوقتي
انا اسف اني بقول كده … ولو رديت عليا وقولت انك مرمتش ورقة هقولك بس عمرك ما شيلت ورقة من على الارض عمرك ما شوفت حد بيرمي ورقة وقولتلوا لا متعملش كده اكيد كل الناس مش عاجبهم وضع مصر .. وبما فيهم انا .. بس فيه ناس بتحبها وفيه ناس مبتحبهاش .. ومتقوليش انك بتحبها يا هندسة .. لان الحب مش كلام .. زي الي بيقول بحب الرسول ومبيعملش ولا حاجة من السنة وبيحب ربنا ومبيصليش .. كلام وبس
مصر محتاجة للناس الناجحة علشان مصر تنجح
اخيرا باه انا عارف اني جايز مقدش اقنع المهندس اشرف رفاعي بالعدول عن فكرة الاستمرار بره .. والرجوع لارض الوطن .. وهذا ما اتمناه… وحزين على عدم رجوعه ..لان اكيد ان رجوعه هيكون اضافة لمصر لكن على المستوى الشخصي مش حزين .. لاني معرفوش معرفة شخصية … لكن خايف اوي اوي ان حد تاني ياخد نفس الطريق .. خصوصا اذا كان ناجح في بلدو
ربنا يستر
ربنا يستر
السلام عليكم
والله يا باشمهندس انا حاسس بكتير جدا من الى انت بتقوله ده . ومش انا بس لاكن كل الناس الى فى مصر ومنهم سواق التاكسى والى واقف على الحمام وظابط الجوازات الى اكلمت عليهم . مفيش واحد تتكلم معاه الا لما يحكى لك مشاكل مصر ويديك الحلول فى واحد اتنين تلاته . لاكن اختلافى الكبير معاك هو ان نبره كلامك وحتى لو كنت بتحاول تداريها فيها “كره لمصر” او كره لحال مصر قلب فى النهايه لكره كل ما يرتبط بمصر من مكان وناس وتصرفات . وانا معاك ان كلها حاجات تغيظ الواحد وتفقعه وتخليه دمه فيران بس ده المفروض يدفعه انه يحبها اكتر ويفكر لمصلحتها . عارف ان انت هتقول مهما عملنا فيها مش هتنضف . معاك حق وكمان انا مش عايزك ترجع مصر . بالعكس انت ممكن تخدم الاسلام والمسلمين من عندك احسن من 100 واحد هنا . لاكن خلى بالك انك ما تنجرفش لنظريه النفور من مصر
مصر كلها بلاااااوى وكلنا عارفين كده لاكن حب الاوطان من الايمان . ولو بصينا على الغرب فهنلاقى انه كان عايش فى احوال زينا واسوا مننا وبعدين ربنا قلب حاله . اذن بين ليله وضحاها يبدل الله حال بعد حال .معنى كده انها لو بقت بكره نضيفه والناس بتضحك ومتقدمه هترجع تحبها تانى . يبقى كده انت بتحب حب مكانى فقط
على فكره بعد طول عمر ان شاء الله هترجع برضه مصر . وهترجع علشان تستقر . معنى كده انها مكان للسكن ليك ولناس كتير . وعارف ان انت كمان بتقول فى نفسك ان الناس دى فكرانى بكره مصر و انا بحبها . لاكن بالفعل انت بتتشد انك تكرهها الوقتى . انا معاك ان احنا نكره الفساد والظلم والجهل الى خلى السواق ما بيضحكش . لاكن مش ده بس هى مصر . مليانه مشاكل لاكن مش بالسوء ده
اقول لك بامانه . احنا الى ممكن نكون مثقفين زياده . والطبقه دى زادت كتير الفتره الاخيره وده السبب ان كتر عدد الناس الى بتنتقد الاوضاع الغلط . وكله بيقرأ لكله وبالتالى الطبقه دى اصبحت ناقمه على البلد تماما . لاكن لازم نظبط اتجاهنا ونخلينا ناقمين على الاوضاع بس وليس البلد
بخصوص نقطه الاسلام . صدقنى مهما عملت وحاولت . التربيه الاسلاميه عندك شئ وهنا شئ تانى خالص . كلنا اهلينا سافروا واخواتنا سافروا . وكله حط ايده على قلبه من موضوع التربيه الاسلاميه . ودى نقطه تخلى الواحد برضه يحب البلد دى شويه
فى النهايه انا سعيد جدا انك مثال ناجح عندك . ونصحتى ما تزلش مصر الوقتى علشان تحقق نجاح عندك لاكن طول ما انت عندك افضل عاشه فى حب البلد دى وعلم كده لأولادك . وخلى نصيحتك للشباب . انكوا اتعلموا واشتغلوا وحاولوا تحققوا نفسكم فى البلد دى ولو فشلتم فسافروا وحققوا حلمكم برده وبعدين ارجعوا تانى وشجعوا الناس اكتر واكتر . الناس بقت محتاجه امل اكتر اوى الفتره دى الى كلها احباط
متأسف على الاطاله يا فندم .
على فكرة يا ايمن انا فعلاً عارف كويس جداً ان اشرف بيحب مصر فعلاً و مش بيكرها و لكن هي مصر ايه اصلا غير الناس اللي فيها و زي ما انت بتقول مصر مش المكان مع اني بحب المكان لكن مصر هي اهلها اللي اغلبهم دلوقتي حرامية و مرتشين و فهلوية او حتى معقدين نفسياً إلا من رحم بي و هم قليل
امريكا ايوة بتساعدنا يا ابراهيم لاكن دي مساعدات مسيّسة يعني مقابلها بتاكل في البلد من شركات بترول بتاخد تصاريح تنقيب و غيرو ، لكن الفلوس اللي هايبعتها او هاتبعتها انت لأهلك هايسعدهم يعيشوا مرتاحين و يتعلموا و فعلاً يفيدوا بلدهم بشكل حقيقي و فعال ، يعني مثلاً تخيل لو مافيش في بيتكوا انترنت هل اخوك الصغير هايكون له فرصة يتعلم و يقرا و يتغير؟ ابداً ، هاتكون كل مصادر التعليم بتاعتة كلها هي المصادر المشوهة اللي بتوفرها الدولة (التعليم و التليفزيون و خلافه) فالحقيقة ان المساعدات حتى المادية دي مهمة جداً
انا برضوا ماقولتش رأيي في الموضوع لكن انا حابب النقاش فية و عايز اسمع اكبر عدد من وجهات النظر قبل ما اقول رأيي و انا فعلاً مستمتع بالحوار جداً جداً
@Ahmed S. Farghal
عندك حق يا أحمد في كلامك عن الدعم المادي ,, اللي هو من أهم أشكال الدعم ,وفي نفس الوقت أكتر أشكال الدعم اللي بنخجل منها !!!
يعني دلوقتي لو شخص ما حقق طموحه (برة مصر أو جوة مصر) وبدأ يساعد الناس بدعمهم ماديا لتعليمهم أو حتى تطوير علمهم ده ,, أو ساعد واحد يفتح في مشروع حتى لو كان بإستثمار مش ده برضه دعم؟! مابالنا لما يكون الدعم المادي ده جنبه دعم علمي وثقافي بشكل من الأشكال !! أنا شايف إن هي دي المساعدة الحقيقية ,, ناس كتير عاشوا وماتوا في بلادنا وهما بيحاولوا يصلحوا بالكلمة ,, منهم قدر يغير تغيير بسيط ومنهم لحد ما مات كان بيصارع طواحين الهوا من سلبية ولا مبالاة والطاحونة الكبيرة اللي إسمها الفساد ,, طبعا ده غير الطائفة التانية اللي يأست وجرفها التيار من متطلبات الحياة والأولاد ونسيت القضايا اللي كانت بتحلم بيها في شبابها
…
مع تأكيد إستمتاعي بالمناقشة وإحساسي بإن فيه ناس تانية حلمها تتطور وبلدنا ترتقي ,, بعيدا عن العينات اللي شوفتها لما رجعت مصر وكلمة
-اللي بيحلم بتنضيف بلدنا دلوقتي يبقى عايش في كوكب تاني- كلمة كانت كفيلة بإحباطي وقتها ,, لما تشعر إن حتى أصحاب الشأن مش عايزين تحسين وكويس أوي العيشة كدة
!!
ياااه أنا مكنتش متخيله إني إتأخرت كدة فعل رد
الحوار والنقاش فعلا ممتع جدا ماشاء الله ، و على الأقل أنا دلوقتي عرفت و صدقت أحمد له كل مايكلمك بيبقى عايز يطلع بره مصر
مهندس أشرف، حضرتك عندك حق في كل كلمة قلتها ، من حيث حال البلد، سواء مفيش نضافة أو الاهمال أو الظلم أو أو أو ……
و عندك حق جدا إنك تطلع و تدور بره على مستوى أحسن ليك و لعيلتك الكريمه سواء أحسن ماديا أو معنويا أو فمستوى تعامل أو تعليم أو كل حاجة عموما
و أنا مقدرة موقفك أو بالأصح صدمتك لما نزلت بعض ٧ سنين لمصر و لايقت الوضع ده، مش هقولك أنت مش متابع، بالعكس أنت أكيد متابع و عارف، بس زي مابيقولو إلي إيده في الميه مش زي إلي إيده في النار ، يعني مهما سمعت برضو كان صعب تتخيل إلي شفته بعينيك
معظم الناس إلي ردت على البوست زي محضرتك شايف، حسه فعلا بسوء الحال إللي بلادنا بقت فيه، الفكرة إن لو أنا سافرت و سبتها عشان أنقذ نفسي من المستوى ده و أتعلم و ألحق أعمل حاجة مفيده في دنيتي من غير مالاقي أمن و تحقيقات و قيود تكتم نفسي في كل حته ، أو سافرت عشان من حقي أعيش في بلاد بتحترم الإنسانية و بتعامل شعبها إنهم بني آدم مش حاجة تانية، أو عشان أمشي في شوارع نضيفه و مرور منظم، ده حقي و لازم أدور عليه في أي حته مادام بلادي مش موفراه لي
لكن، هل الحل إني أفضل هاجرها على طول ، و مش أرجع لها، و أشجع أهلي و أصحابي ينفدوا بجلدهم و يسبوها هما كمان
طيب لما حضرتك و أنا و غيرنا و غيرنا من إللي المفروض شايفين سوء الحاله إلي إحنا فيها و حاسين بكل ده، لما كلنا كدة نسيبها، من إلي هيفضل فيها ؟
من إللي يشتغل عشان يخليها أحسن ، من إللي هيبدأ فعلا و يحاول يغير ، لأن لو ماحدش بدأ يبقى عمرها ماتتغير و يوم ورا يوم وأنا في الغربة احس إني مش عايز أرجع أكتر و أكتر ، طيب و بعدين؟
صدقني أنا فعلا بسأل لأني مش عارفه الاجابه ولا عارفة إيه الحل ؟
أعتقد إن حضرتك عارف إن أحمد له أخ في إنجلترا برضه، ومن كلامنا معاه أو مع مراته، طبعا لما بيجوا هنا بيبقوا في نفس الحاله إلي حضرتك وصفتها ، من غيظ و استنكار و احساس بالخنقه من الأحوال إللي بقينا فيها بس في نفس الوقت مشتاقين لي روح الناس ولأهلهم ، اتبسط لما لقى بنتهم عرفت هنا تتكلم عربي و بقت غلاباوية عالأخر كمان
بس حس إن هو مش متخيل هيعرف يعيش هنا تاني إزاي بالطريقة دي، و نفس تفيكر حضرتك، بنته عايزها تتعلم كويس، بس قلقان عشان يضمن إنها تتربى تربيه إسلامية صحيحة ، لأن بالرغم إن حال الإسلام عندنا دلوقتي حاجة مؤسفه فعلا لكن لسة الغالبية محتفظه بعادات صح ، التعليم بره فعلا أفضل بمراحل كبيره عن عندنا هنا ، لكن -و ده من الكلام إلي سمعته من مرات أخو أحمد- إن البنات عشان يتربوا ويكبروا هناك يبقى في المقابل محتاج أقفل عليهم جامد جدا عشان اعزلهم عن ثقافة المجتمع الغلط أو إللي بتناقض الإسلام إللي هما عايشين فيها
والحاجه التانية إللي هيا التالي، إن البنات هناك كمان لما بتكبر و تكون عاشت عمرها بره كدة، فرصها في الجواز مش بتكون سهلة أبدا، طبعا كله قسمه و نصيب بس ده إللي هيا شايفه و حاساه هناك
و مع ذلك و هيا حامل رفضت تيجي تولد هنا أبدا لأنها عارفة كويس قد إيه هتضمن هناك رعايه صحية ممتازه لها و لطفلها عمرها ماتلاقيها هنا أيدا، ده غير المجموعات الخاصه بالأم والطفل و حاجات تانيه كتير بيحكولنا عنها تخليهم يفكروا الف مره غشان يرجعوا هنا تاني
الموضوع مش سهل أبدا، أنا اسافر و أتعلم و اتغرب أه، أدور عالأحسن لي و لعيلتي و أسرتي أكيد ، لكن لحد إمتى ؟
أفضل بره و يبقى ده وطني ، ولا أرجع عشان أحاول أغير فيه حاجة و لو بسيطه حتى لو هبدأ أنا بي نفسي و هلاقي ألف واحد عكسي
يا ترى ايه؟
أعتذر للاطاله
هوه دا الي انا خايف منو … الي قالتوا مدام سينار دا … ” على الأقل أنا دلوقتي عرفت و صدقت أحمد ليه كل مايكلمك بيبقى عايز يطلع بره مصر”
حسيت في البوست دا ان المهندس احمد عاوز يجمع الاراء يسيب البلد ولا لا .. ولو دا صحيح .. يباه لا يا هندسة
انتو عاوزين تسيبوا البلد لمين … لما المثقف والعالم والمجتهد والشريف يسيب البلد .. مين هيتبقى فيها … الحرامي والنصاب و الجاهل
هما كده كده موجودين وكتير نسبة 80 % من البلد بالمنظر دا . انتو باه صعبان عليكو يباه فيه نسبة20% كويسين عاوزينها تبقى بيور اوي كده .. نقية تماما من الناس الي تقدر تغيرها للاحسن
كمان فيه حاجة تانية بالنسبة للدين .. كام واحد يا هندسة شوفتوا في انجلترا او اي دولة تانية جدو او جد جدو مسلم
اكيد انت بتشوف مسلمين كتير .. وملتزمين ودا الي مشجعك .. بس دول يا اما الجيل الاول .. ياما بالكتير الجيل التاني .. ترضى ان حد من نسلك في الاخر يباه منصهر للدرجة دي في الثقافة الغربية .. وانت فاهم قصدي ايه
شوف يا هندسة اذاي تغير بلدك للاحسن .. مش تغير البلد ببلد تانية
الحقيقة انا مش بجمع الآراء و لا حاجة و الله انا فعلاً عندي رأي و راسخ كمان و لكن انا حابب اعرف الناس بتفكر ازاي و الناس المسافرة رأيها ايه و اللي في مصر رأيه ايه
يعني مثلاً انت بتقول اني المفروض ماسافرش عشان البلد مش هيتبقى فيها حد ، طب انت سافرت ليه؟ مش انت تعتبر من المثقفين المتعلمين؟ و لا ايه؟
يا هندسة الموضوع مش شخصي .. وكمان مش رايي هوه الي هيسفرك او هوه الي هيرجعك في قناعتك في الاول والاخر دي حياتك وانت الي هتعيشها بس اتمنى انك اي قرار هتاخدو تفكر فيه مليون مرة .. لان اذا قررت تسافر ونسيت شكل البلد زي المهندس اشرف كده .. مش هتقدر تعيش فيها تاني.. اذا كنت انت بتسافر بره شهر وبترجع مش طايق البلد .. ولا انا غلطان .. اومال لو قعدتلك سنتين تلاتة هناك هتعمل ايه !!
اما بالنسبة ليا انا باه .. اولا انا مش من المثقفين اوي يعني .. علشان كده خايف ان الي زيك والي زي المهندس اشرف يسيبوا البلد .. لو انا شايف ان انا والي زيي يقدروا يعملوا طفرة في البلد مكنتش بكيت على حد ولا بكيت على البلد لاني خلاص هعمل الي انتوا هتعملوه
.. ثانيا انا ناوي ارجع … انا مسافر لضرورة لو كنت شايف اني اقدر احقق الضرورة دي وانا في مصر كنت قعدت حتى لو طالت قعدتي هنا هرجع هرجع .. وهعمل الي هقدر عليه والي انا مؤمن بيه ان شاء الله .. وادعيلي عن قريب تلاقيني في مصر ان شاء الله
اعتقد ان ردي دة مش هيطرح حل او جزء منة ,انما هو مجرد مشاركة في الافكار
انا حساس جدا بكل كلمة كتبتها عن الغربة و الفرق الكبير بين هنا و الخارج ,انا معشتش الغربة دي بنفسي انما عندي اخويا متغرب من اكتر من 19 سنة خارج مصر و كان اول نزول لية لمصر برضو بعد 8 سنسن من السفر
وبيفكر في الرجوع للاستقرار وعشت معاة نفس الظروف اللي بتتكلم عليها من بحث عن السكن المناسب و التعليم المناسب لبناتة و مصدر الدخل هنا اللي يضمنلو نفس المستوي الي اخرة والمقارنة بين كل دة هنا و الحياة هناك و صعوبة القرار دة
في نفس الوقت ابص علي اخويا التاني اللي هنا في مصر -الفرق بينهم في العمر حواللي سنة- وابص علي حياتة هنا و المستوي المعيشي لية الحمد لله كويس و تعليم اطفالة برضو الحمد لله مستواة كويس -اكيد مش بنفس الجودة بتاعت خارج مصر-
انا بحاول اعمل مقارنة بين الاتنين الاخ اللي برة في المجتمع الادمي اللي فية احترام عالي جدا للفرد و ادميتة و الاخ اللي في مصر اللي وسط الاهل و وسط البهدلة اللي بيعاني منها اي فرد موجود هنا
-لو جيت اقارن من حيث مساعدة الاتنين للبلد : فـ اخويا اللي هنا اكيد مش انسان مثالي و اكيد رمي ورقة في الشارع ابل كدة لاكن اعتقد ان انا شيفة بيعمل اللي علية من خلال عملة وبيحاول يصلح المجتمع اللي عايز بناتة تتربي فية بدايه من نفسة
اخويا اللي برة : ممكن تتمثل مساعدتة في نقل الفكر اللي موجود في الخارج لينا بشكل واقعي بعيدا عن اللي بنشوفة في الافلام و يحاول يقدم مساعدتة لينا -اقصد العائلة لان لما هو يساعدنا و احنا هنساعد في تقدم البلد اذا هو ساعد البلد-
من اللي انا كتبتة اعتقد ان كل واحد فيهم بيساعد البلد بـ اسلوبة و من مكانة رغم الاختلاف لاكن الاتنين بيقدمو مساعدة وفي نفس الوقت كل واحد قدم مجموعة من التضحيات عشان يكون في اللمكان اللي هو فية سواء اللي في الخارج او اللي هنا في مصر
والموضوع دة بيعتمد علي الشخص نفسة و هو علي استعداد يضحي بـ اية امام اية ؟
للسبب دة اعتقد ان لو زاي ما الافتراض اللي موجود ان مثلا 20% هم اللي كويسين مش كل الـ 20% دول علي استعداد ان هم يضحو بالحجات اللي موجودة هنا -رغم انها ممكت تكون حجات قليله لاكن في مميزات برضو- و سعتها اللي هيضحي و سيافر و يختار المميزات اللي في الخارج هيفضل يساعد برضو لاكن باسلوبة و في ناس تانية هنا بتساعد من الداخل
انا ممكن اكون كتبت كلام كتير انما انا كنت عايز اوصل لنقطة واحدة ان موضوع السفر دة و ان الناس تسافر ولا لا في فروق فردية في شخصية كل واحد هي اللي بتتحكم فية و ان الاتنين اللي بيسافر و اللي بيفضل موجود هنا بيحولو يقدموا مساعدة بس كل واحد بـ الاسلوب الانسب ليه
إن الله لا يغير مابقوم حتى يغيروا مابأنفسهم
أنا رأيى ان كل واحد يحاول يصلح بقدر مايستطيع بدل مانتحول لأشخاص سلبيه بتشكى وخلاص
قد لا يحاسبنا الله على ماوصلت إليه مصر
ولكن سيحاسبنا ماذا فعلنا للتغيير ومساعدة الناس
وع فكرة انا ضد التبذييير الفاضى على المطارات وفى ناس ساكنين تحت خطوط السكة الحديد لما نبقا نكفى احتياجات الشعب الأول نبقا نجمل المظهر
يكتفى انه يكون نضيف وخلاص مش لازم البهرجة الجامدة دى ولو ان الكلام متأخر بعد المدخل الجديد الى خلص
كم عشتُ أسألُ: أين وجــــــــهُ بــــلادي
أين النخيلُ وأيـن دفءُ الــوادي
لاشيء يبدو في السَّمـَــاءِ أمـامنــــــــــا
غيرُ الظـلام ِوصــورةِ الجــلاد
هو لا يغيبُ عن العيــــــــون ِكأنــــــــه
قدرٌٌ .. كيوم ِ البعــثِ والميــــلادِ
قـَدْ عِشْتُ أصْــــرُخُ بَينـَكـُمْ وأنـَـــــادي
أبْنِي قـُصُورًا مِنْ تِـلال ِ رَمَـــادِ
أهْفـُـو لأرْض ٍلا تـُسـَـــاومُ فـَرْحَتـِــــي
لا تـَسْتِبيحُ كـَرَامَتِي .. وَعِنَــادِي
أشْتـَـاقُ أطـْفـَـــــالا ً كـَحَبــَّاتِ النـَّــــدَي
يتـَرَاقصُونَ مَـعَ الصَّبَاح ِالنـَّادِي
أهْـــفـُــــو لأيـَّـام ٍتـَـوَارَي سِحْــرُهَـــــا
صَخَبِ الجـِيادِ.. وَفرْحَةِ الأعْيادِ
اشْتـَقـْــــتُ يوْمـًا أنْ تـَعـُــودَ بــِــــلادِي
غابَتْ وَغِبْنـَا .. وَانـْتهَتْ ببعَادِي
فِي كـُلِّ نَجْــم ٍ ضَــلَّ حُلـْـــٌم ضَائـِـــــع ٌ
وَسَحَابَــة ٌ لـَبسـَـتْ ثيــَـابَ حِدَادِ
وَعَلـَي الـْمَدَي أسْـرَابُ طـَيــر ٍرَاحِــــل ٍ
نـَسِي الغِنَاءَ فصَارَ سِـْربَ جَرَادِ
هَذِي بِلادٌ تـَاجَـــرَتْ فــِـي عِرْضِهـــَــا
وَتـَفـَـرَّقـَتْ شِيعًا بـِكـُـــلِّ مَـــزَادِ
لـَمْ يبْقَ مِنْ صَخَبِ الـِجيادِ سِوَي الأسَي
تـَاريخُ هَذِي الأرْضِ بَعْضُ جِيادِ
فِي كـُلِّ رُكـْن ٍمِنْ رُبــُــوع بـِـــــلادِي
تـَبْدُو أمَامِي صـُورَة ُالجــَــــلادِ
لـَمَحُوهُ مِنْ زَمَن ٍ يضَاجـِــعُ أرْضَهَـــا
حَمَلـَتْ سِفـَاحًا فـَاسْتبَاحَ الـوَادِي
لـَمْ يبْقَ غَيرُ صـُـرَاخ ِ أمـْــس ٍ رَاحـِـل ٍ
وَمَقـَابـِر ٍ سَئِمَتْ مـِــنَ الأجْـــدَادِ
وَعِصَابَةٍ سَرَقـَتْ نـَزيــفَ عُيـُـونِنـَــــا
بـِالقـَهْر ِ والتـَّدْليـِس ِ.. والأحْقـَادِ
مَا عَادَ فِيهَا ضَوْءُ نـَجْــــم ٍ شـَــــــاردٍ
مَا عَادَ فِيها صَوْتُ طـَير ٍشـَـــادِ
تـَمْضِي بـِنـَا الأحْزَانُ سَاخِــــرَة ًبـِنـَــا
وَتـَزُورُنـَا دَوْمــًا بـِـلا مِيعــَـــادِ
شَيءُ تـَكـَسَّرَ فِي عُيونـِــــي بَعْدَمَـــــا
ضَاقَ الزَّمَانُ بـِثـَوْرَتِي وَعِنَادِي
أحْبَبْتـُهَا حَتـَّي الثـُّمَالـَـــــة َ بَينـَمـَــــــا
بَاعَتْ صِبَاهَا الغـَضَّ للأوْغـَــادِ
لـَمْ يبْقَ فِيها غَيـرُ صُبْــح ٍكـَـــــــاذِبٍ
وَصُرَاخ ِأرْض ٍفي لـَظي اسْتِعْبَادِ
لا تـَسْألوُنـِي عَنْ دُمُـوع بــِــــــلادِي
عَنْ حُزْنِهَا فِي لحْظةِ اسْتِشْهَادِي
فِي كـُلِّ شِبْر ٍ مِنْ ثـَرَاهـَا صَــرْخَـــة ٌ
كـَانـَتْ تـُهَرْولُ خـَلـْفـَنـَا وتـُنَادِي
الأفـْقُ يصْغُرُ .. والسَّمَــاءُ كـَئِيبـَـة ٌ
خـَلـْفَ الغُيوم ِأرَي جـِبَالَ سَـوَادِ
تـَتـَلاطـَمُ الأمْوَاجُ فـَــوْقَ رُؤُوسِنـَــــــا
والرَّيحُ تـُلـْقِي للصُّخُور ِعَتـَادِي
نَامَتْ عَلـَي الأفـُق البَعِيـــدِ مَلامــــــحٌ
وَتـَجَمَّدَتْ بَينَ الصَّقِيـِع أيـــَـــادِ
وَرَفـَعْتُ كـَفـِّي قـَدْ يرَانـِي عَاِبـــــــــرٌ
فرَأيتُ أمِّي فِي ثِيـَــابِ حـِـــــدَادِ
أجْسَادُنـَا كـَانـَتْ تـُعَانـِـــقُ بَعْضَهـَــــا
كـَوَدَاع ِ أحْبَــابٍ بــِــلا مِيعـَــادِ
البَحْرُ لـَمْ يرْحَمْ بَـرَاءَة َعُمْرنـَـــــــــا
تـَتـَزاحَمُ الأجْسَادُ .. فِي الأجْسَادِ
حَتـَّي الشَّهَادَة ُرَاوَغـَتـْنــِي لـَحْظـَــة ً
وَاستيقـَظـَتْ فجْرًا أضَاءَ فـُؤَادي
هَذا قـَمِيـصـِـــي فِيهِ وَجْــــهُ بُنـَيتــِي
وَدُعَاءُ أمي ..”كِيسُ”مِلـْح ٍزَادِي
رُدُّوا إلي أمِّي القـَمِيـــصَ فـَقـَـدْ رَأتْ
مَالا أرَي منْ غـُرْبَتِي وَمُـرَادِي
وَطـَنٌ بَخِيلٌ بَاعَنــي فـــــي غفلـــــةٍ
حِينَ اشْترتـْهُ عِصَابَة ُالإفـْسَـــادِ
شَاهَدْتُ مِنْ خـَلـْفِ الحُدُودِ مَوَاكِبــًـا
للجُوع ِتصْرُخُ فِي حِمَي الأسْيادِ
كـَانـَتْ حُشُودُ المَوْتِ تـَمْرَحُ حَوْلـَنـَا
وَالـْعُمْرُ يبْكِي .. وَالـْحَنِينُ ينَادِي
مَا بَينَ عُمْـــــر ٍ فـَرَّ مِنـِّي هَاربـــــًـا
وَحِكايةٍ يزْهـُــو بـِهـَـــا أوْلادِي
عَنْ عَاشِق ٍهَجَرَ البـِلادَ وأهْلـَهـــــــَـــا
وَمَضي وَرَاءَ المَال ِوالأمْجـَـــادِ
كـُلُّ الحِكـَايةِ أنَّهـــَـــا ضَاقـَتْ بـِنـَـــــا
وَاسْتـَسْلـَمَتَ لِلــِّـصِّ والقـَـــوَّادِ!
في لـَحْظـَةٍ سَكـَنَ الوُجُودُ تـَنـَاثـَـــرَتْ
حَوْلِي مَرَايا المَوْتِ والمِيـَـــلادِ
قـَدْ كـَانَ آخِرَ مَا لـَمَحْتُ عـَلـَي الـْمَـدَي
وَالنبْضُ يخْبوُ .. صُورَة ُالجـَلادِ
قـَدْ كـَانَ يضْحَـكُ وَالعِصَابَة ُحَوْلـَــــــهُ
وَعَلي امْتِدَادِ النَّهْر يبْكِي الوَادِي
وَصَرَخْتُ ..وَالـْكـَلِمَاتُ تهْرَبُ مِنْ فـَمِي:
هَذِي بـِلادٌ .. لمْ تـَعُـــدْ كـَبـِلادِي
لا تعليق اكتر من قصيدة فاروق جويده
سفرنا كان املنا نعد سنه سنتين ونرجع نفتح مشروع ونتجوز ونربي العيال , لكن اظاهر اننا هنفضل بقيت عمرنا متغربين , مش هسرد الاسباب ومش هحكي انتم اكيد عيشنها وعرفين , لكن في النهاية احنا مسعتناش بلادنا وسعتنا بلاد الناس
وَمَنْ يُهَاجِرْ فِي سَبِيلِ اللَّهِ يَجِدْ فِي الْأَرْضِ مُرَاغَمًا كَثِيرًا وَسَعَةً وَمَنْ يَخْرُجْ مِنْ بَيْتِهِ مُهَاجِرًا إِلَى اللَّهِ وَرَسُولِهِ ثُمَّ يُدْرِكْهُ الْمَوْتُ فَقَدْ وَقَعَ أَجْرُهُ عَلَى اللَّهِ وَكَانَ اللَّهُ غَفُورًا رَحِيمًا
صدق الله العظيم
اختتم بقول المصطفي صلي الله عليه وسلم عندما خرج من مكه قال
والله لأنتي احب بلاد الله الي قلبي ولولا ان اهلك اخرجوني منها ما خرجت
صدقيت يارسول الله
وكل مغترب بيقول بصوت شجن
ياااااااااااااااااااااامصر انتي احب البلاد الي قلوبنا , ولولا ان ظلم وطغيان من ولوا امرنا ماخرجنا , فقد خرجنا مرغمين مجبرين ولم نخرج بخيارنا
يريت يااحمد تعمل موضوع بسيط , نجمع فيه افكارنا ازاي نرجع مصر المحروسة للماضي
وكل واحد عنده فكرة واقتراح يعرضها ونحاول ننقشها
شكرا م احمد شكرا م اشرف شكرا لكل من اعطانا وقته وشاركنا رأيه
واحد صاحبي قالي انه ناوي يروح المانيا يقعد كام سنه هناك يحاول يشبع نفسه علم علي قد ما يقدر وبعدها يرجع مصر يطبق اللي عرفه هنا في مصر
لو الحل ان الناس تخرج برا البلد …. محدش هايقدر يخرج غير الناس المثقفين والقادريين علي تغيير البلد …. وهايفضل الناس اللي مش كويسيين هم اللي في البلد وبس …. يبقا لازم نرجع مصر علشان نفيد مصر ونضحي في سبيل كدا براحتنا …. مش لازم نعيش طول حياتنا مستريحين ووسط الناس النضيفة …. ممكن نتعب شوية علشان ننضف الناس اللي مش نضيفه واكبر مثل قدامى شخصيا هو مهندس احمد وقد ايه بيتعب مع الهاكرز علشان يخلي الناس يتغيروااا
يا ريت كل الناس تحاول ترسم صورة للهاكرز لو كان مهندس احمد ساب البلد وسافر بعد التخرج
لو رسمتوا الصورة صح هاتعرفوا احنا نسيب البلد والا لأ
السلام عليكم
ماشاء الله .. الموضوع ده جميل أوي بجد و أنا مستمتعه بالمناقشات فيه جدا جدا
بشمهندس أشرف .. بداية أنا سمعت عن حضرتك كتير.. و اللي سمعته و عرفته عن حضرتك يخلليني أحترمك و أبقي سعيده إن المصريين بقي فيهم جيل جديد متعلم و مثقف و مش بس كده ده متميز و ناجح في شغله بالشكل ده
ماشاء الله
و أنا سعيده إني أتكلم مع حضرتك و أتمني يبقي في فرصه أتعرف علي حضرتك أكتر بإذن الله
بشمهندس أشرف .. بداية أنا مش بشكك أبدا في وطنيتك و لا حبك لمصر اللي أكيد كلنا بنحبها لأنها بلدنا .. زي بالظبط ما حضرتك بتحب والدتك لأنها والدتك مش لأنها أجمل ست في الدنيا ..
إسمح لي أطرح فكره بسيطه هنا يا بشمهندس .. الواقع اللي إحنا عايشينه النهارده في بلدنا و اللي بنشتكي منه و من مساوئه اللي مالهاش اخر … الواقع ده ببساطه ناتج عن ممارسات مجتمع بحاله في خلال التلاتين سنه اللي فاتوا تقريبا …. يعني جيل أبائنا و أمهاتنا
بمعني اخر …. جيل أبائنا ده هو اللي رسم الواقع اللي إحنا عايشينه النهارده بكل إيجابياته و سلبياته
و النهارده … إحنا كمان يا بشمهندس محطوطين في نفس المكان
إحنا النهارده اللي بنرسم المستقبل اللي أولادنا هايعيشوا فيه
لو سبنا الواقع اللي أبائنا رسموه لينا زي ماهو … يبقي النتيجه إن أولادنا هايعيشوا نفس الواقع اللي إحنا عشناه
نفس الواقع اللي مش راضيين عنه
نفس الواقع اللي خللانا نسافر و نسيب البلد باللي فيها لأننا مش عايزين نعيش كده و مش عايزين لأولادنا يعيشوا كده
تعالي نتخيل يا بشمهندس كمان عشره خماستر أو حتي عشرين سنه … لو الواقع زي ما هو دلوقتي … بناتك هايرجعوا ؟؟؟
طيب إنت هاترجع ؟؟؟
طيب هاتعيش إزاي ؟؟
و لو حضرتك رجعت و عشت ….. أولادك اللي إتربوا بره و عاشو بره هايرجعوا ليه و عشان ايه ؟؟
طالما عندهم حياتهم اللي مافيهاش المشاكل و الزباله اللي هنا ؟؟
و حضرتك لو رجعت و إستحملت لأنها بلدك في الأصل ولأن عندك الأساس لأنك إتربيت هنا .. هما إيه اللي يخلليهم يعملوا كده ؟؟؟؟
إحنا هانسيب البلد لأننا عايزين حياه أفضل لينا و لأولادنا …. و أولادنا هاكملوا بره البلد لأنهم عايزين حياه أفضل ليهم و لأولادهم … منطقي جدا
اللي عايزه أقوله يا بشمهندس .. إن إحنا مسئولين عن إصلاح الواقع اللي إحنا مش راضيين عنه .. عشان ولادنا مايخرجوش يلاقوا نفسهم في نفس الدايره و نفس المشاكل اللي إحنا عشناها عشان الجيل اللي قبلنا سابهالنا
و بناتك لازم هايرجعوا مصر في يوم من الأيام دلوقتي أو بعد سنين
و أتمني إنهم ما يصطدموش باللي حضرتك شفته و إصطدمت بيه
طيب في سؤال تاني جه في دماغي …
برضه كمان عشر سنين مثلا لما الجيل اللي ماسك الإداره في مصر جيل ابائنا و امهاتنا … لما يسيبوا أماكنهم بحكم الزمن و العمر …. مين اللي عليه الدور إنه يشغل الأماكن دي ؟؟
و مين اللي هايعمل نهضه و فرق و إصلاح حقيقي لو كل كفائتنا و الشباب المتميز المتعلم المثقف سافر و نجي بنفسه من “المخروبه ” دي قبل فوات الأوان .. زي ما حضرتك قلت ؟؟؟؟
بشمهندس أشرف … أنا بطرح عليك الأسئله دي لأني فعلا عايزه أفكر معاك فيها
في كل زمن التاريخ علمنا إنه اللي بيعمل نهضه و تغيير حقيقي في أحوال أي بلد مهما كانت سيئه .. هما الجيل الشاب الطموح الواعي و اللي بيمتلك أهم أسلحة العصر … العلم
و لأننا هانتحاسب عن اللي عملناه لإصلاح حال الأمه و الإسلام يوم ما نقابل الله عز وجل
بشمهندس أشرف … أتمني ليك و لأسرتك الكريمه كل الخير من قلبي و الله
و ربنا يوفقك يارب
إخوانى الأحباء ؛ السلام عليكم ورحمة الله وبركاتة
شكراً على تعليقاتكم الكريمة وآسف على التأخير فى الرد ؛ أنا كنت شارى فريم جديد للدرامز بتاعى ووصل امبارح وقعدت أنقل الحاجات من الفريم القديم للجديد والموضوع خد منى وقت شوية. على فكرة أنا عندى صفحة متواضعة على يوتيوب ياريت تشرفونى وتقولولى رأيكم فى أعمالى الفنية المتواضعة:
http://www.youtube.com/watch?v=7BzhcocA04s&fmt=35
بعد ماركبت الدرامز دخلت البيت لقيت الوندوز اللى على الميدياسنتر ضربت (أنا عارف أحمد مش هيعدى الموضوع ده بالساهل وهيقعد يقولى لينكس) المهم قعدت أنزل كل حاجة من تانى للمرة الألف والموضوع ده خد منى لحد الساعة اتنين صباحاً.
أنا نفسى أرد على كل واحد كتب تعليق ولكن سامحونى لضيق الوقت هرد بصفة عامة وان شاء الله بكرة أو بعدة هرد على كل التعليقات بالتفصيل وجزاكم الله خيراً.
نيجى للكلام الحلو اللى انتوا كاتبينة ؛ بس قبل ماأعلق عاوز أسألكوا سؤال سريع كده عالماشى له علاقة بالموضوع: هيه أمريكا حلوة ولا وحشة؟
اللى منكوا بيتفرج على قناة الجزيرة وخاصة برنامج الاتجاة المعاكس اللى الناس فيه بتقعد تتخانق مع بعضها ده هيلاقى ان احنا ؛ كعرب ومصريين ؛ لما بنتكلم فى موضوع معين زى أمريكا مثلاً تلاقى دايماً فريقين ؛ فريق بيقول ان أمريكا حلوة وانها راعية الديمقراطية فى الشرق الأوسط و و و ؛ وفريق تانية بيقول إن أمريكا منيلة بستين نيلة. وده فرق جوهرى بين الحوارات اللى بسمعها واشوفها فى المحطات العربية والحوارات فى المحطات الغربية. لما بقعد اتفرج على برنامج فى قناة تليفزيونية غربية مابلاقيش حكاية الفريقين دى ؛ وبكتشف فى الآخر إن أمريكا زيها زى أى حاجة فى الدنيا فيها مميزات وفيها عيوب وصعب جداً تحكم على تلتميت مليون انسان منهم المسلم والكافر ؛ المسيحى والهندوسى ؛ اليهودى والمجوسى ؛ الأبيض والأسود ؛ المثقف والجاهل ؛ المتعلم والأمى ؛ صعب جداً انك تحكم عليهم بكلمة واحده. وبالتالى بعد ماتتفرج على برنامج فى القنوات الغربية وكل واحد استعرض وجهة نظرة تحس إنك استفدت حاجة فى الآخر ؛ بغض النظر عن انت بتأيد رأى مين ؛ مش قعدت تتفرج على شكلة وخلاص (مع احترامى لقناة الجزيرة اللى أنا من أشد المعجبين بيها). لذلك أتمنى إننا من خلال هذا الحوار نستعرض مزايا ومساوىء الخروج من مصر للى لسة جوة مصر أو الرجوع إلى مصر للى ربنا كرمة وخرج منها ؛ وماننقسمش لفريقين فريق بيشجع مصر والتانى بيشجع برة مصر.
الحاجة التانية اللى عاوز أقولكوا عليها ان المقارنات اللى عملتوها كلها مقارنات جميلة جداً ومليانة وطنية وحب مصر ولكنها مقارنات مبنية على أساس خاطىء. هل أشرف يقعد جوة مصر ويبنى مستقبلة وياخد المرتب اللى يستحقة ويشتغل عدد ساعات زى البنى آدمين ويفيد شعبة وناسة أحسن ولا يعمل الحاجات دى كلها فى انجلترا ويفيد الشعب الانجليزي؟ – طبعاً لو كانت الصورة وردية أوى كده كان طبعاً من الأفضل ان أشرف يقعد فى مصر ولكن للأسف ياإخوانى الأحباء إن أشرف لو قعد فى مصر هيضيع نفسة وعلمة اللى قضى سنين طويلة من حياتة وحرم نفسة من حاجات كتير كان بيعملها الشباب فى سنة علشان يتعلمة وماكانش هيبقى معاه فلوس يتجوز ولايركب عربية ولاحتى يصرف على نفسة وكان هيعيش بقية حياتة فى مصر كئيب ؛ مهموم ؛ حزين ؛ لايقدر ينفع أهلة وناسة ولايقدر يفيد مصر بحاجة لإنة ببساطة متنيل بستين نيلة. أكيد فية ناس بنتجح فى مصر ولكن أنا فشلت إنى أحقق أى حاجة من اللى أنا عاوزها فى مصر رغم إن ماكانش ناقصنى حاجة ؛ أنا كنت واحد من اربعة أفراد فى مصر فقط محترفين فى لغة الأسمبلى ده غير إنى كنت أعرف كل لغات البرمجة اللى كانت موجودة وقتها يعنى العلم موجود ؛ كنت بشتغل ستاشر ساعة يومياً يعنى الجهد موجود ؛ كنت دايماً عامل خطة وبراجعها بصفة مستمرة يعنى التخطيط موجود ؛ ولكن النتيجة بعد سنين طويلة من المحاولة “صفر” كبير. زى منتوا قلتوا ؛ اللى إيدة فى المية مش زى اللى إيدة فى النار. اللى اتكوى من الوضع فى مصر مش زى اللى بيقرا عنة فى الجرايد أو فى بلوج أخونا الحبيب المهندس احمد سليمان
وفى آخر كلامى أنا عاوز أسألكوا سؤال وأرجوا انكوا تفكروا كويس قبل الاجابة وماحدش يتحيز لرأية ويحاول يخلى الاجابة على حسب رأية المسبق. انتوا طبعاً عارفين ان فية أزمة أمية فى مصر ؛ وللى مايعرفش نسبة الأمية من حوالى عشرين سنة كانت خمسين فى المية فى المدن وسبعين فى المية فى القرى (واللى مش مصدق يروح يشوف موقع الهيئة العامة للتعداد والاحصاء) دلوقتى النسبة قلت شوية بس طبعاً ماحدش ينكر ان فية نسبة أمية رهيبة فى مصر وفى الدول العربية بصفة عامة. تخيلوا لو احنا عندنا مركز خيرى لمحو الأمية والمركز ده محتاج مدرسين علشان يعلموا الناس اللى مابتعرفش تقرا ولاتكتب وطبعاً لإنة مركز خيرى فمحتاج برضة تبرعات. هل من الأفضل إن المهندس أحمد صاحب هذا البلوج ؛ وهو من عباقرة الكمبيوتر فى مصر ؛ يروح يدرس فى هذا المركز ولا الأفضل انة يتبرع بفلوس المركز يجيب بيها عشر مدرسين ابتدائى يمحو أمية حى بحالة؟
بعد الإجابة على السؤال بينك وبين نفسك أرجو انك تربط الاجابة بالموضوع اللى احنا بنتكلم فية وبرضة خلينا نتكلم على أحمد ؛ هل من الأفضل له انه يقعد فى مصر ولا يخرج برة مصر؟ – أتمنى تكون فكرتى وصلت ومنتظر تعليقاتكم.
والسلام عليكم ورحمة الله وبركاتة
أشرف الرفاعى
م اشرف اعتقد ان حضرتك وصلت الفكرة بمثال بسيط جدا جدا ماشاء الله
يروح يدرس فى هذا المركز ولا الأفضل انة يتبرع بفلوس المركز يجيب بيها عشر مدرسين ابتدائى يمحو أمية حى بحالة؟
اكيد طبعا يتبرع بفلوس
أشكرك مرة تانية علي توضيح الفكرة الكبيرة بمثال بسيط انما يدل علي انك فعلا عبقري ذي ماالناس بتقول
بادينا نقدر نغير حال بلدنا
امممم . والله يا باشمهندس كلامك ممتاز . بس انا برضه ما كانش ده موقفى . ولا كنت عايزك ترجع الوقتى . بس انا مش عايزك توصل لمرحله النفور من مصر وتكره كل ما هو مرتبط بمصر . وده مش ررط تكون هنا او هناك علشان توصله . لاكن هيا مرحله خطر لازم ما نوصلهاش
اتمنى لك النجاح دايما . واول ما تنزل مصر تانى ان شاء الله لازم نتقابل . واحمد سليمان يجهز لنا قاعده مع بعض . مع الشباب بتوع الكات
انا بس مش عارف احمد سليمان مش بيقول رأيه ليه . سايب الناس تخوض ومش بيقول رأيه
و الله يا عم ايمن انا خايف اقول رأي يقوم يقفل الموضوع
الموضوع فعلاً مثير و مهم اننا نتناقش و نفهم افكار الناس و دوافعهم خصوصاً ان في كتير بيقروا عندهم تجارب مختلفة
With in a system all objects should be working in harmony , in case of strange object there is 2 results, the system will change the new object and take it in, or the object will change the system..
the system in our case is very powerful, robust , i mean other objects them selves , i mean every single object Eng asharf met or saw during his visit -not the gov- their percentage is so high compared to ashraf-like objects, those objects have option to go with flow..
or resist and get smashed , or looking for another system..
Egyptian objects had been like this for hundred of years , submission is one of Egyptian characteristics .
بيتهيقلي لو مهندس احمد سليمان اتبرع بالفلوس للمركز دا وبس هاتبقي فلوس علي الفاضي
اصل لو الناس القادرين علي الادارة سافروا برا مصر واتبرعوا بالفلوس …. الناس اللي هنا هايبقا معاها فلوس ومش معاها ادارة تخطط لصرف الفلوس
يبقا الفلوس هاتضيع
معلش هارجع تانى للمثال اللي علي طول في دماغي اللي هو الكات هاكرز
لو مهندس احمد كان اتبرع بفلوس وبس وماكانش شارك في الادارة هل يبقا افضل والا الافضل انه يشارك في ادارة المشروع؟؟؟
بحبـــــــك وحشتينــــــــي
بحبك وحشتيني . . . وبحبك وحشتينى
بحبك وانتى نور عينى . . . دا وانتى مطلعه عيني بحبك موت
لفيت اد ايه لفيت ملقيت غير فى حضنك بيت . . . وبقولك انا حنيت بعلوالصوت
وكأن الوقت فى بعدك واقف مابيمشيش . . . وكأنك كنتي معايا بعدتي ومابعدتيش
فى دمى حبيبتى وامى وزى مكون بابتدى اعيش
وبحبك وحشتينى بحبك وانتى نور عينى دا وانتى مطلعه عيني بحبك موت
بعدت وكنت هعمل ايه من اختارغربته بايديه . . . لكن حبك ده مانسيتهوش وعاش فيه
ليه اتأسف على الغيبه . . . مغبتيش لحظه وقريبه
محدش عنده كده طيبه وحنيه
وكأن الوقت فى بعدك واقف مابيمشيش وكأنك كنتى معايا بعدتى ومبعدتيش
فى دمى حبيبتى وامى وزى مكون بابتدى اعيش
وبحبكوحشتينى . . . بحبك وانتى نور عينى
دا وانتى مطلعه عيني بحبك موت
الاغنية دي رائعة جدا جدا , لحسين الجسمي وبتعبر فعلا عن اللي انا حاسس بيه , بعيد عن
مصر اللي تقريبا عمري ما طلعت بره منها , غير لما جيت
للسعودية
واصعب جزء كان بالكلمات هو
بعدت وكنت حاعمل ايه … مين اختار غربته بايديه
لكن حبك ده ما نستهوش وعاش فيه
ليه اتأسف على الغيبة . . . ما غبتيش لحظة وقريبة
محدش عنده كده طيبة وحنية
يمكن محدش حيحس بالاحساس ده زي الشباب المصري اللي خارج بلده , ومهما كان
وضعه في البلد التانية سواء مهندس او عامل دكتور او غفير
بردوا بره بلده , وحاسس بالغربة
عموما عشان ما اطولش عليكم
هوه ده احساس الشباب المصري خارج ارض الوطن , اعتقد اني نقلتهلكم
في الاخر هرجعلك واترمي في حضنك واقول باعلي صوتي بحبك بحبك يمصر
وحشني حضنك ياأمي
السلام عليكم
بشمهندس أشرف … أنا و كتير غيري ماكنتش بحاول أقنع حضرتك إنك تقعد في مصر … و أنا متفقه معاك طبعا في اللي حضرتك قلته عن شكل النقاش في موضوع زي ده
و بالفعل أنا كنت بتناقش مع حضرتك في مزايا و عيوب الخروج من مصر أو البقاء فيها .. و بطرح ده من وجهة نظري و بنفكر معاك زي ما حضرتك طلبت
عندي تعليق صغير علي المثال اللي حضرتك طرحته .. بتاع مشروع محو الأميه
و لو إن المثال فيه تبسيط زياده عن اللزوم للموضوع ككل
محدش قال إن المساعدات الماديه عيب يا بشمهندس
و أنا معاك إنه ماينفعش مثلا نجيب فاروق الباز يدرس علوم في مدرسه إبتدائي
لأنه ببساطه شديده دي مش شغلته و دوره مش هنا
لكن تخيل لو فاروق الباز نفسه مثلا أشرف علي تنفيذ مشروع كبير لإعداد علماء و أساتذه في الكيمياء
مش دي هاتبقي أكثر فائده و منطقيه ؟؟
ده شئ غير التبرعات الماديه اللي ممكن أي حد يعملها طالما معاه فلوس و خلاص
أعتقد إن الفكره هنا مش فكرة إنت بتشتغل في مصر و لا بره مصر .. الفكره إنك تكون حاسس إن مصر هيا مكانك الأول و الأخير مهما سافرت و روحت
و إنك تكون حاسس بمسئوليتك عن تغيير و لو جزء بسيط من الواقع اللي فيها
و تاني يابشمهندس أشرف .. أنا مش ضد فكرة إنك تسافر و تتعلم و تبني خبره و علم
أنا ضد فكرة إني أطلع من “المخروبه” دي قبل فوات الأوان و ألحق نفسي و أبقي أبعت مساعدات للناس اللي فيها يمكن تنقذهم يوما ما
جزاكم الله خيرا يا بشمهندس أشرف علي إهتمامك
و سعيده بجد بمناقشاتنا معاك
@Hend Awad
أعتقد إن الفكره هنا مش فكرة إنت بتشتغل في مصر و لا بره مصر .. الفكره إنك تكون حاسس إن مصر هيا مكانك الأول و
الأخير مهما سافرت و روحتو إنك تكون حاسس بمسئوليتك عن تغيير و لو جزء بسيط من الواقع اللي فيها
أتفق تماما مع هذا الرأي
sorry
** في الجيولوجيا و الفضاء
المهندس اشرف قال كلمة حكمة بصراحة “ماحدش يتحيز لرأية ويحاول يخلى الاجابة على حسب رأية المسبق”
الحوار شيق بصراحة وفعلا فيه ناس كتير خايفة على البلد وبتفكر فيها .. سواء الي عاوز يمشي منها او الي عاوز يفضل فيها .. مفيش خلاف ان الاتنين بيحبوها .. واظن ان كل واحد مقتنع فعلا بارأيه ومعندوش استعداد انو يغيروا …
ربنا يارب يقدم لكل واحد الخير ليه ولاولادوا في الدنيا والاخرة.. ويرحم مصر ويرزق الي عاوز يصلحها القوة والحكمة
هل الهجرة من أجل حياة أفضل وهم؟
http://newsforums.bbc.co.uk/ws/en/thread.jspa?sortBy=1&forumID=5737&start=0&tstart=0#paginator
اكتر من 400 تعليق لشباب عربي بيتكلم عن نفس الفكرة , فيه اراء وافكار حلوة جدا
طبعا انا متأكد بعد التعليقات دي الموضوع مش هينقفل بالسهل
عندي اقتراح بسيط , انه لو حولنا الحوار اللذيذ ده لحلقة في البيت بيتك او العاشرة مساءا او اتكلم او واحد من الناس , البرامج المشهوره دي , واستضفنا احمد سليمان , وبدأت الناس تحوره وكل واحد مغترب هيتصل ويقول رايه بدل مبيوصل ل عدد بسيط اعتقد الموضوع كده يبقي له شكل تاني خالص بالصوت والصورة وراي فعلي للناس المغتربين والمهاجرين وفي الاخر نطلع بنتائج واقتراحات ونقدم خيارات للناس الي عايزة تقعد في البلد والناس الي عيزها تسبها بجد انا حاسس انها فكره كويسة
من نحيتي هوصل الموضوع لجريدة الاقتصادية هنا واحاول فعلا اعمل الفكرة دي في المملكة وان شاء الله هتنجح , وانا واثق ان فيه ناس كتير تقدر توصل الفكرة دي للإعلام في مصر
في انتظار احمد سليمان مع عمرو اديب او تامر امين
الحقيقة ان اللي انت بتقولو صعب يا احمد و الموضوع مش مهم اوي بالنسبة للأعلام دا غير اني معنديش استعداد اطلع على الهوا و اقول ان النظام مش مهيئ لاستيعاب النوابغ و اي واحد بيقول كلمة نظام دي دلوقتي بيعرفوة نظامة عشان ينسى الكلمة دي خالص
لكن فيه سؤال مهم جداً / هل التعليم اللي هاتتعلموا في مصر هايفيد مصر اكتر و لا التعليم برة
يعني مثلاً انا اشتغلت في شركات مصرية و اجنبية و طبعاً عندي تجربة مثيرة مع جووجل و بعدها غيرت افكاري عن التعليم
هل انتم شايفين اننا نسافر نتعلم هناك؟ ولا نتعلم هنا؟ طيب لو اتعلمت هناك هاترجع تعمل ايه بالعلم ده بالظبط؟
هل انتم شايفين اننا نسافر نتعلم هناك؟ ولا نتعلم هنا؟
أعتقد إن السؤال ده من الناحية التعليمية إنت من أكتر الناس اللي عارفين إجابته كويس !!
طبعا مستحيل أقارن خريج جامعة مصرية عادية بخريج من معهد
MIT
ولا كالتاك
!!!
ياريت لو الناس حابة تقرأ في بعض الفروق لو مش متخيلة الوضع تقرأ على النت المستوى التعليمي في ماسوشتس ,, أو كتاب عصر العلم لوصف العملية التعليمية في جامعة كالتاك لدكتور احمد زويل
ده فضلا عن (نوعية الفروع العلمية) اللي في الجامعات دي اللي لحد دلوقتي مش مذكورة حتى على ألسنة الطلاب في الجامعات عندنا !!!
وإجابة على سؤالك تحديدا ,, دي بتختلف من طموح شخص للتاني ,, هل أنا مثلا محتاج إني أتعلم حاجة معينة بمستوى معين والإتنين أو واحدة فيهم مش موجودة في مصر ؟ شخصيا بالنسبالي الإجابة أيوة
..
طيب لو اتعلمت هناك هاترجع تعمل ايه بالعلم ده بالظبط؟
بالنسبة للعلم اللي هاتتعلمه ,, فيه 3 طرق
رقم 1- تعلمه للناس بطريقة مباشرة وتفضل ماشي في التراك ده على طول
رقم 2 – تعلمه لبعض الناس وتشرف على نقلهم العلم ده لناس تانية وتتبني شجرة
رقم 3 – إستغلال جزء من العلم ده في بيزنس ناجح ويبقى دعم مادي لعملية التعليم ,, بإنك مثلا تنشر كتب أو تعلم في جامعة أو تساهم في تأسييس أي نوع من المؤسسات التعليمية ,, فيه 1000 فكرة ممكن تستثمرها ,, لكن لا علم ولا مال لدعمه ,, يبقى لا جديد تحت الشمس
!!
@Ahmed S. Farghal
هل انتم شايفين اننا نسافر نتعلم هناك؟ ولا نتعلم هنا؟ طيب لو اتعلمت هناك هاترجع تعمل ايه بالعلم ده بالظبط؟
اعتقد الموضوع مش متوقف علي المؤسسة او الجامعه او الكلية , علي قد مهوا متوقف علي الشخص ذاته , يعني سواء اتعلنما في مصر او خارج مصر اعتقد مش تفرق كتير , وبدليل ان فيه عباقرة اتعلموا في جامعات مصرية وتربوا في مصر وامثله ونماذج كتير ذيك يااحمد وذي المهندس اشرف وكتير غيرهم , يعني المهم طالب العلم , واعتقد ان الانترنت والكتب والمنتديات والدراسة اون لاين قللت الفروقات بين الجامعات المصرية والتعليم ففي الخارج يعني دلوقتي انا من وجهة نظري انه لا يوجد فرق بين التعليم داخل مصر والتعليم خارجها , بالنسبة للشق الاخر من السؤال لو فعلا سفرنا واتعلمنا بره بلدنا , هل هيكون عندي دافع قوي اني ارجع بلدي انقل الخبرات دي ليها , ولا هقول هيا بلدي عملتلي ايه ؟ ولا اساسا الجهه الي انتا اتعلمت فيها بعد معلمتك وكبرتك هتسمحلك انك تيجي مصر تفيدها بالعلم ده , اعتقد الموضوع صعب وفيه تجارب واقعيه لدكتور عندنا في جامعه المنصورة , لما سافر المنيا وقعد هناك سنين , وحب يرجع مصر عملوله غسيل مخ وخطفه زوجته وبنته , الموضوع صعب مش سهل , وبجد مش عارف اجابه للشق التاني
يمكن دى أول مرة أعلق فيها على موضوع مع إنى متابعة المدونة كويس جدا عندى حاجة عايزة أقولها للباشمهندس أشرف أنا مرة سمعت تعليق من واحد مصرى مغترب عايش فى أمريكا من 20 سنة تقريبا صدقنى كلامه قطع لى قلبى كان الحديث عن الفرق بين مصر وأمريكا وإحساسه بالغربة وجدته يقول الفرق إنك هنا لوماشى فى الشارع وقلت أه ألف واحد هيقولك مالك وسلامتك هناك لو أمسكت ميكرفون وصرخت بأعلى صوت لن يرد عليك أحد صدقنى مش علشان هما هناك محدش بيدخل فى حياة حد ولا عشان إحنا عاطفيين زيادة ولا عشان بنحب الأغانى الوطنية متقولش إيه إديتنا مصر بس الفكرة إن لو كل شاب عمل زى حضرت وحلف إنه عمره ماعاد راجع البلد دى مش هتتحرك خطوة للأمام وهنفضل محلك سر بل ممكن نرجع لورا أنا عندى سؤال تانى لوحضرتك شفت فيلم عايز حقى المشهد الأخير لحظة بيع البلد وإزاى الناس اللى كانت بتهتف بحياة صابر (هانى رمزى) رجوعوا فى كلامهم تانى وأصبحوا بيضربوه بالجرمة علشان يبيع وبعدين لما إستوعبوا الكارثة رفضوا فكرة البيع متقوليش إنها أفلام وإنى متأثرة بيها وإن الحياة العملية شئ تانى لو حضرتك فاكر إن بهدلة شبابنا وولادنا فى بلاد الله دى مش بتوجعنا تبقى غلطان
البلد عمرها ماكانت كدة الزبالة اللى فى الشوارع دى رماها واحد مستهتر مش معنى كدة إن مفيش حد كويس فى البلد أنا كل يوم بركب مع سواقين تاكسى قد إيه بزعل لما ألاقيه مؤهل جامعى من أسبوعين ركبت مع سواق كان خريج كلية الهندسة قسم إتصالات وأخر خريج تجارة صحيح إنه فيه قوة كامنة للإنفجار داخل كل بنى أدم بس دى بلدنا صحيح إنها أصبحت بلد لاعبى الكرة والممثلين والفنانين الذين يقبضون الملايين صحيح إن الواحد بيزعل لما يشوف موظف حكومى بعد خدمته أكتر من 40 سنه للدولة بشرف وأمانة تكون مكأفاة نهاية الخدمة بتاعته 40 ألف جنيه فقط يعملوا إيه فى الزمن ده و صحيح إن أنا إتاثرت جدا بالمهندس اللى قتل زوجته وولاده علشان خسر فلوسه فى البورصة وبالمهندس حسن صابر اللى خان مصر واصبح عميل لإسرائيل عشان إتعرض لموقف مهين فى بداية عمله
بس بردو بعد كل ده صدقنى تكون أنانية لو فكرت تمشى ومعتش ترجع صدقنى هى أراء وأنا ممكن رأيى ده أغيره وأسافر فى يوم من الأيام أشتغل فى دولة تانية بس اللى أنا واثقة منه إنى عمرى ماهأخد قرار السفر بلا رجعة أبدااااا علشان أبى وأمى وحياتى فى البلد دى وطفولتى وأحلامى وأصحابى وبيتنا اللى مهما عشت فى قصور عمرى ما هأحس بالدفء إلا فيه ولا بالحنان اللى بحسه فى حضن ماما وبابا ولا بالحب اللى بشوفه فى عيونهم ولا بالطيبة اللى بشوفها فى قلب الناس اللى فيها وصدقنى إن الهواء ليه ريحة تانية ممكن يكون ملوث ويجيب لنا أمراض كتيرة بس منقدرش نستغنى عنه البلد صحيح بقت قاسية قوى على ولادها بس لو إحنا سبناها ومشينا عمرها ماهتتغير ولا عمرها هتتصلح وعلى الفكرة الواحد عمره ميقدرش يشترى له بلد تانية حد لو خد الجنسية هيفضل يحس إنه غريب تمام زى اللى بتموت والدته عمره ماعاد يقدر يشترى له أم تانية وصدقنى مهما فضلت بره وحتى لو إتخليت عنها وقررت إنك مترجعش ستظل غريبا فى الدولة الأخرى وسيظل بداخللك جزء ولو نقطة يحن إليها ولا بلاش ليها لوالدك ووالدتك وبيتك ومدرستك وأنا واثقة إن حضرتك بتحكى لبناتك عنهم وستظل مصرى القلب والمنشأ والجنسية شئت أم أبيت
وأخر سؤال هو مفيش مرة حضرتك قررت تتخلى عن حلم من أحلامك علشان غيرك؟
وأخيرا احب أختم بأبيات صلاح جاهين
على اسم مصر التاريخ يقدر يقول ما شاء
أنا مصر عندي أحب وأجمل الأشياء
بحبها وهي مالكة الأرض شرق وغرب
وبحبها وهي مرمية جريحة حرب
بحبها بعنف وبرقة وعلى استحياء
واكرهها وألعن أبوها بعشق زي الداء
واسيبها واطفش في درب وتبقى هي ف درب
وتلتفت تلاقيني جنبها في الكرب
والنبض ينفض عروقي بألف نغمة وضرب
على اسم مصر
مصر النسيم في الليالي وبياعين الفل
ومرايه بهتانة ع القهوة .. أزورها .. واطل
القى النديم طل من مطرح منا طليت
والقاها برواز معلق عندنا في البيت
فيه القمر مصطفى كامل حبيب الكل
المصري باشا بشواربه اللي ما عرفوا الذل
ومصر فوق في الفراندة واسمها جولييت
ولما جيت بعد روميو بربع قرن بكيت
ومسحت دموعي في كمي ومن ساعتها وعيت
اخوانى الأحباء ؛ السلام عليكم ورحمة الله وبركاتة
زى ماوعدتكوا هرد على كل التعليقات ؛ وهنخصص الحلقة دى للرد على أخونا الحبيب ابراهيم
أخى الحبيب ابراهيم
******** “مش عيب ابدا اننا ندور على مصلحتنا وكمان مش عيب اننا نحب اننا نكون ناجحين .. لكن العيب اننا نسيب المركب تغرق وهيه فيه اهلي واصحابي وحبايبي واقول ان شاء الله فيه طرق كتير ممكن اساعدهم بيها” ********
أنا متفق معاك تماماً ان عيب نسيب المركب تغرق وان الواحد لازم يبقى عندة وفاء لوطنة ولكن مش لازم الواحد يضيع نفسة علشان يساعد غيرة. عدد المصريين خارج مصر حوالى اربعة مليون على حد علمى وعدد المصريين داخل مصر حوالى تمانين مليون (والله أعلم!) ؛ يعنى مصر مش ناقصة ناس ومش رجوع المهاجرين إلى مصر هو اللى هيصلح الدنيا ؛ بالعكس المصريين اللى برة مصر بيعملوا رواج اقتصادى كبير لما بينزلوا فى الصيف وده بيخلق فرص عمل كتير جداً والتحويلات اللى بيبعتوها شريان الحياة لدولة دخلها هزيل زى مصر. الامارات مؤخراً رفدت آلاف المصريين وانت بنفسك هتشوف تأثير الموضوع ده على الحياة فى مصر فى الكام شهر الجايين ؛ فمابالك لو الاربعة مليون كلهم نزلوا مصر ؛ هتبقى كارثة بكل المقاييس.
وعلشان أوريك ان مش أنا بس اللى مش سايب مصر وان أى واحد عندة موهبة أفضل لة انه يستفيد بيها برة مصر قبل ماتضيع فى مصر أنا جايبلك شوية أرقام من التقرير السنوي عن تحويلات المهاجرين إلي مصر والعالم 2008 والذي قام به مركز المعلومات ودعم اتخاذ القرار بمجلس الوزراء برئاسة د. ماجد عثمان رئيس المركز ، وده على فكرة المركز اللى صرف مليارات على تدريب الشباب على تكنولوجيا المعلومات ولكن ماعملش أى تخطيط للحاجات التانية إنة يساعدهم يلاقوا شغل بعد مايتخرجوا أو أو أو والنتيجة ان معظم الناس دى برة مصر دلوقتى ؛ المهم التقرير خرج بالعديد من النقاط المهمة التي تؤكد أهمية العمالة المصرية في الخارج للاقتصاد المصري ومنها ما يلي:
190.6مليون مهاجر في العالم أي 3% من إجمالي سكان العالم مقارنة بنحو 75.5 مليون مهاجر عام 1960 ي 2.5% من إجمالي سكان العالم . النسبة فى مصر حوالى خمسة فى المية يعنى مصر بيهاجر منها ناس بنسبة أكثر 66 فى المية من المتوسط.
مصر هي الدولة العربية الوحيدة المصنفة ضمن قائمة اكبر 20 دولة في العالم هاجر منها أطباء. خد بالك من الكلمة دى تانى والنبى ؛ هااااااااااااااجر ؛ يعنى خرج بلارجعة.
297.1 مليار دولار إجمالي تحويلات المهاجرين في العالم عام 2007 مقارنة بنحو 2 مليار دولار عام 1970 .
أكثر من نصف التحويلات تستقبلها دول العالم النامي منذ عام 1980 واستمرت في الزيادة لتستحوذ الدول النامية علي حوالي 74.5 % من إجمالي التحويلات عام 2006 .
50.8 ألف مصري هاجروا للخارج هجرة دائمة منذ عام 1962 وحتي 2007 من خلال القنوات الشرعية . يعنى مش أنا بس اللى مهاجر هجرة دائمة
53 % من إجمالي المهاجرين هجرة دائمة حاصلون علي مؤهلات جامعية ، مقابل 5.8 % حاصلون علي مؤهل فوق الجامعي عام 2007. أصحاب المؤهلات العليا يهربون من مصر لما الفرصة بتجيلهم.
المهاجرون الحاصلون علي مؤهلات التجارة والهندسة هم أكثر المهاجرين هجرة دائمة من خلال السنوات العشر السابقة . سمعت بيقولك ايه؟ تجارة وهندسة ؛ ياهندسة
31 % من المهاجرين من مصر هجرة دائمة والذين اكتسبوا صفة مهاجر عام 2007 من الشباب في الفئة العمرية 30 – 40 سنة منهم 7.3 % مرافقون . أنا عمرى تمانية وتلاتين سنة يعنى فى المظبوط برضة – على فكرة عيد ميلادى كمان شهر بالظبط من النهاردة ماتنسوش الهدية
أكثر من مليون مصري عملوا بالخارج عام 2007 باعتبارهم مهاجرين هجرة مؤقتة مقارنة بنحو 16.3 ألف مهاجر عام 1971. قبل ماتقولى الناس بيترجع أهى اقرا النقطة الجاية.
95.6 % من إجمالي المصريين المهاجرين هجرة مؤقتة هاجروا إلي الدول العربية عام 2007 . شىء طبيعى ؛ مين أهبل هيفكر يهاجر هجرة دائمة لدولة عربية بتعاملة كمواطن من الدرجة العاشرة ومالوش أى حقوق.
6.3 مليار دولار إجمالي قيمة تحويلات المصريين العاملين بالخارج عام 2007 مقابل 3 مليارات دولار عام 1990 .
32.9 % من إجمالي التحويلات للمصريين العاملين بالخارج أرسلت من الوليات المتحدة الأمريكية عام 2007. بنكرة أمريكا على الآخر ؛ مابنطيقش سيرتها ؛ ورغم ذلك حلم الشباب المصرى الهجرة لأمريكا واللى بيروح هناك غالباً مابيرجعش.
4.6 % نسبة مساهمة التحويلات في الناتج القومي الإجمالي في مصر عام 2007 مقابل 6.7% عام 1990.
يعمل حوالي 20.2 ألف أجنبي في مصر عام 2007 مقارنة بنحو 17.1 ألف عام 1999. شايف الخيبة التقيلة ؛ مش لاقيين ناكل بس لازم نجيب الخبير الأجنبى
136.9 مليون دولار قيمة تحويلات الأجانب العاملين في مصر إلي دولهم عام 2007 مقابل 27.9 مليون دولار عام 2000.
****** “طرق رد الجميل والكلام الي انت بتقولوا دا يا هندسة سيبك منو… هتعمل ايه يعني .. هتبعت فلوس .. يباه امريكا والامريكان وطنين اكتر منك .. ولا هتفكر تحل مشكلة انت مش عايشها .. اظن انوا في المشمش يعني مصر محتاجة لحد بيحبها وعاوز يغيرها .. انا منكرش انك بتحبها .. لكن انت مش عاوزة تغيرها .. انت عاوز بلد متغيرة جاهزة… تخيل كده معايا يا هندسة .. لو كل واحد بيحب النظافة راح انجلترا وامريكا وفرنسا .. اكيد شوارع مصر مش هتبقى نظيفة … وبعدين لما ترجع وتلاقي الشوراع بالمنظر دا . تقول لا لا لا مستحيل اقعد فيها ومستحيل اربي بناتي هنا ….. انا اكاد اجزم انك وانت فيها كنت واحد من الي رموا ورقة في الشارع وشاركوا في المنظر الي مش عاجبك دلوقتي انا اسف اني بقول كده … ولو رديت عليا وقولت انك مرمتش ورقة هقولك بس عمرك ما شيلت ورقة من على الارض عمرك ما شوفت حد بيرمي ورقة وقولتلوا لا متعملش كده اكيد كل الناس مش عاجبهم وضع مصر .. وبما فيهم انا .. بس فيه ناس بتحبها وفيه ناس مبتحبهاش .. ومتقوليش انك بتحبها يا هندسة .. لان الحب مش كلام .. زي الي بيقول بحب الرسول ومبيعملش ولا حاجة من السنة وبيحب ربنا ومبيصليش .. كلام وبس” ******
أنا بأكد لك من كل قلبى إن كل واحد بيحب النظافة أمنية حياتة انه يروح انجلترا وأمريكا وفرنسا ولكنة مش عارف لسبب أو لآخر. مين مايحبش يعيش فى بلد نظيفة؟. وبعدين إذا الدول دى نجحت فى انها تنظف نفسها ايه المانع نتعلم منهم؟. لو رحت اسكندرية هتلاقيها نضيفة جداً لإن المحافظ استعان بخبرات الناس اللى عايشة برة ؛ ودفعلهم حقهم ؛ علشان كده نقلولة اللى بيشوفوة برة والنتيجة ان اسكندرية أنظف بلد فى مصر. على فكرة من أحد الاقتراحات لتنظيف الاسكندرية زيادة عدد أعمدة الإنارة فى الأماكن المظلمة وزيادة عدد صناديق الزبالة فى الشورع وبعد ماالمحافظة صرفت ملايين على الكلام دة تلات أرباعهم اتسرق!!!
تنظيف الشارع مش مسئوليتى ؛ دى مسئولية البلدية ؛ أنا مسئوليتى إنى أحافظ علية نظيف وأعلم أولادى ومايرموش ورقة على الأرض ومايوسخوش الشارع ؛ إنما علشان أسيب شغلى وأسيب حالى وأمسك مقشة وأنزل أنظف الشارع علشان واحد مهمل مابيأديش عملة ده طبعاً يبقى كلام فارغ.
أنا ماقلتش ان إرسال فلوس هيه الوسيلة الوحيدة لمساعدة الناس فى مصر ؛ ده كان على سبيل المثال وليس الحصر. وإن كان ارسال فلوس فى حد ذاتة مفيد جداً من وجهة نظرى لإن أى مشروع حتى لو كان خيرى محتاج فلوس علشان ينجح ؛ واعتقد انك مش مختلف معايا فى أهمية الفلوس. الشيخ صالح عبد الله كامل ؛ وهو من أحد أهم الخبراء الاقتصاديين العرب المتخصصين فى الاقتصاد من وجهة نظر إسلامية بيؤكد إن لو القادرين دفعوا الزكاة على أموالهم فقط لن يبقى فقير واحد فى الوطن العربى وده بيحل مشكلة من أهم تلات مشكلات فى مصر (الجهل والفقر والمرض) وده يقودنا لموضوع كبير أنا عاوز أفتحة لإنه هياخد وقت طويل جداً فى مناقشتة. متهيألى الفرق واضح بين الفلوس اللى بيبعتها المغتربين على هيئة مساعدات أو تبرعات أوزكاة أو استثمار فى مصر وبين القروض اللى بتبعتها أمريكا وتاخد عليها فوايد ؛ مافيش وجة للمقارنة.
أنا طبعاً ياما رميت ورق على الأرض فى مصر وفى الكويت وفى كل بلد عربية رحتها ولكنى عمرى مارميت ورقة على الأرض فى انجلترا ؛ تقدر تقولى ليه؟ – أقولك أنا لية ؛ لإن المسئول عن تنظيف الأرض فى مصر مش قايم بواجبة وبالتالى انت بتخرج من بيتك تلاقى الشارع مزبلة فبتبتدى تقول لنفسك مش هتفرق الورقة اللى هرميها. أما فى انجلترا الشوارع كلها بتتنظف كل يوم الصبح ؛ أصحى من النوم ألاقى الشارع نضيف وجميل عمرى ماأفكر أرمى فية ورقة. الشوارع هنا مش نظيفة لوحدها لإن برضة فية ناس العفانة طبع فيهم بيوسخوا الشارع وبيوسخوا كل حتة يروحوا فيها ؛ غير كده بيبقى فية أحداث بيتجمع فيها ناس كتير زى مهرجانات ؛ ماتش كورة ؛ …الخ كل دى حاجات بتسبب ان المكان مايبقاش نظيف ولكن لإن عمال النظافة قايمين بواجبهم بتلاقى المكان نظيف بعد ساعتنين تلاتة من مغادرة الناس ؛ لإن المدير بتاع عمال النظافة قايم بشغلة بيبقى عامل خطة إن بعد ماالناس تمشى هيبعت العمال ننظف ؛ بيبقى عامل حسابة إنة يزود عدد العمال فى اليوم ده أو يستعير عمال من حى تانى علشان الشغل هيبقى أكتر كتير.
وعلى فكرة أنا معود بناتى على النظافة وانهم مايرموش ورقة على الأرض وهما فعلاً بيعملوا كدة فى انجلترا ولكن لما نزلت مصر بنتى نوران كانت بتاكل كيس شيبسى وراحت رامية الورقة على الأرض ؛ طبعاً أنا زعقتلها وقلتلها ايه اللى بتعملية دة و و و ؛ المهم البنت حست انها عملت حاجة غلط ولكن بصت على الأرض حواليها كده وقالتلى ماهو مافيش حاجة أرمى فية الكيس أنا ماسكاة فى ايدى بقالى كتير بس ملقيتش حاجة أرمية فيها وبعدين ماهو الناس فى مصر بتعمل كده حتى بص بنفسك؟ – الموضوع كبير ياجماعة أكبر من ابدأ بنفسك والكلام الجميل بتاع الكتب دة. الموضوع لازم يبدأ بإن عامل النظافة يشتغل ؛ بإننا نتعلم مانرميش حاجة فى الشارع علشان الشارع دلوقتى بيتنظف كل يوم ؛ بإننا نشوف اللى بيسرق أعمدة النور وصناديق الزبالة بيعمل كده ليه ونحللة مشكلتة ؛ يعنى لازم جهد مشترك من كل الناس ؛ مش لازم كلنا نبقى فى مصر ولاكلنا نتبرع بفلوس ولاكلنا نشتغل بإيدينا لإن فية أكتر من مجال للمساهمة فى حل المشكلة ولو كلنا اشتغلنا فى مجال واحد مش هنلاقى حد يشتغل فى المجالات التانية.
أنا ماقلتش إنى مش عاوز بناتى يعيشوا فى مصر علشان الشوارع مش نظيفة ؛ ياريت الموضوع على أد كده ؛ الموضوع أكبر من كده بكتير وفية أسباب كتير جداً ولكن السبب الرئيسى زى ماقلت إنى مش شايف انهم هيقدروا يعيشوا الحياة الإسلامية اللى أنا بحلم لهم بيها فى مصر. يمكن مظاهر الإسلام موجودة أكثر فى مصر زى الآذان وكده ولكن دى حاجات ممكن تتعوض هنا ؛ يعنى مثلا فية ساعات بتأذن وقت الآذان وعندنا كل القنوات العربية و و و ؛ ولكن الشىء الأهم ان جوهر الإسلام مش موجود فى مصر ؛ النظافة ؛ النظام ؛ الأمانة. لما بناتى بيشوفوا واحدة كاشفة بطنها هنا ولا لابسة لبس مش مناسب هما من نفسهم بيقولوا أصلها مش مسلمة ؛ أما فى مصر لما يشوفوا نفس المنظر ويسألونى هقولهم ايه – أصلها مسلمة بس بتستهبل؟.
ده غير ميزات كتيرة جداً هنا مش عاوز أحرمهم منها ؛ ولكن ده موضوع شرحة يطول وأنا مش عاوز أطول عليك.
احنا للأسف عايشين فى أشعار وأوهام الماضى وأمجاد أجدادنا الفراعنة وبطولات أجدادنا المسلمين وعاوزين نفضل على كده وخلاص ؛ مش عاوزين نعمل أمجادنا احنا اللى أحفادنا يفتكرونا بيها وعايشين فى وهم ان مصر أم الدنيا. للأسف ياإخوانى الأحباء مصر بلد ضعيفة من جميع النواحى ؛ اقتصادياً واجتماعياً وخلقياً ولاتصلح ؛ حالياً ؛ انها حتى تقود نفسها بغض النظر عن قيادة الآخرين وانها تكون أم ليهم. وأنا شايف من وجهة نظرى ومن واقع تجربتى الشخصية إنها مش البيئة المناسبة اللى أربى فيها أولادى. بحبها وكل حاجة وجزء منى عاوز يرجع ولكن مش شايف أى سبب يخلينى أرجع دلوقتى خالص.
وعموماً أنا برضة عامل حساب إننا فى دولة غير مسلمة وان بناتى ممكن يتأثروا ببعض سلوكياتهم الغير سوية وعامل خطة طوارىء للرجوع لمصر فى خلال شهر واحد إذا ظهرت أى أعراض من دى على حد من بناتى ؛ وربنا يستر
وعلى فكرة أنا مش شايف مصر كلها سلبيات ولاحاجة بالعكس فية ايجابيات كتير وفيها اس بتحاول تغيرها بإخلاص وتحدى ؛ أنا لما نزلت لفيت فى المدن الجديدة كلها لإنى كنت بفكر اشترى شقة وانبهرت باللى شفتة فى أماكن زى ستة أكتوبر والساحل الشمالى و و و ؛ ولكن اللى بيحصل اليومين دول ان الفجوة بتتسع بين الأغنياء والفقراء لدرجة ان الأغنياء دلوقتى بيعيشوا داخل أسوار علشان تحميهم من الفقراء واللى راح منكم المدن الجديدة عللى على طريق مصر اسكندرية الصحراوى أو طريق مصر السويس الصحراوى هيشوف الموضوع دة.
وعموماً زى ماقلتلكوا موضوع الرجوع لمصر ممكن بالنسبة لى ولكن لو لقيت الفرصة والتوقيت المناسب للرجوع ؛ أما دلوقتى فأنا شايف إنى أقوى فى نفسى مادياً وعلمياً ومهنياً وفى جميع المجالات على أد ماأقدر وبرضة أساعد على أد ماأقدر بس من بعيد. يمكن المساعدة من بعيد مش حل ممتاز أو كامل ولكنها برضة بتساعد وماحدش يقدر ينكر أهميتها.
******** “كمان فيه حاجة تانية بالنسبة للدين .. كام واحد يا هندسة شوفتوا في انجلترا او اي دولة تانية جدو او جد جدو مسلم
اكيد انت بتشوف مسلمين كتير .. وملتزمين ودا الي مشجعك .. بس دول يا اما الجيل الاول .. ياما بالكتير الجيل التاني .. ترضى ان حد من نسلك في الاخر يباه منصهر للدرجة دي في الثقافة الغربية .. وانت فاهم قصدي ايه” ********
بالنسبة لانجلترا فية هنا مسلمين من الجيل التالت والرابع كمان لإن المسلمين بدأوا ييجوا انجلترا للعمل بعد الحرب العالمية التانية ولسه على اسلامهم لحد النهارده ولله الحمد ؛ مش كده وبس بل ان أولادهم وأحفادهم دلوقتى بالملايين ماشاء الله ونشروا الإسلام فى انجلترا فلاتجد بلد واحد في انجلترا إلا وفيها على الأقل مسجد واحد وأكل حلال ولله الحمد. معلوماتك عن الإسلام فى الغرب للأسف مش صحيحة وإذا كنت تقصد أوباما فده أبوه ارتد عن الإسلام كجزء من الحملة الكائوليكية على أفريقيا لما بابا الفاتيكان كان عامل خطة لتنصير أفريقيا بحلول عام ألفين ؛ ورغم فشل الخطة إلا أنه نجح فى تنصير الملايين فى أفريقيا بعد استغلال الفقر والجهل والمرض يعنى دى بلاد كانت أصلاً مسلمة مش زى البلاد الغربية. لو عاوز تعرف الحال فى البلاد الغربية ياريت تلقى نظرة سريعة على الفيديو دة ؛ وده على فكرة اللى عاملة منظمة مسيحية كندية يعنى مش مسلمين متحيزين للإسلام ولاحاجة:
http://www.youtube.com/watch?v=9a2pokVTBpM&fmt=35
وبعد ماتتفرج على الفيديو ان شاء الله ؛ بعد ماتقول الله أكبر ؛ أنا بأؤكد لك من واقع خبرتى المتوضعة فى البلاد الغربية بصفة عامة وفى انجلترا بصفة خاصة ان الأرقام المذكورة فى الفيديو أقل من الواقع بكثير.
وأخيراً أشكرك على ردك الكريم وأذكرك بأن الخلاف فى الرد لايفسد فى الود قضية وأنى أحبك فى الله رغم أنى لاأعرفك ولكن ان شاء الله أتشرف بمعرفتك على يد أحمد سليمان لما أنزل مصر ان شاء الله.
هستأذنكوا دلوقتى علشان أروح أصلى الجمعة وإلى حلقة قادمة إن شاء الله.
اولا كل عام وانت بخير بمناسبة عيد ميلادك .. وعقبال مية مليون سنة
ثانيا .. احبك الذي احببتني فيه .
ثالثا الشرف ليا اني اتعرف على حضرتك طبعا ..
انا اتفرجت على الفيديو.. حاجة تفرح بجد .
وجايز انا فهمت اكتر دلوقتي .. بجد لو الموضوع كده .. يباه اهلا بالهجرة
يعني لما الاقي التقرير بيقول ان المسلمين بيذيدو بسبب الهجرة دي تباه ميزة تغفر عيوب كتير للهجرة
بس المهم ان التقرير يكون فعلا صحيح .. ميكونش لمجرد التشجيع على التبشير ..
الحاجة التانية الي اقنعتني ووبدات اتطمن شوية انك قولت اذا حصل ان اولادي اتغيرت طباعهم .. انك عندك خطة للرجوع في اقرب وقت لو دا حصل… الرد دا اقنعني .
بس دا بالنسبة للجانب الشخصي من الموضوع .. اما بالنسبة لاذاي نفيد مصر وموضوع تحويلات العاملين بالخارج .. فدي فايدة بالمال لكن فايدة العلم راحت فين .. مين هيعمل حاجة مفيدة بالفلوس دي للبلد
مشكلتنا مش بس مادية .لو على قد الفلوس كانت اتحلت .. الصين وماليزيا وتايوان والهند كانو زينا واقل بس العقول مطلعتش بره ..
مش فاكر كان فيه حد حكالي على موقف لعالم صيني سافر ياخد الدكتوراه من امريكا .. فكانت الدكتوراه بتاعتوا في الميكانيكا تقريبا
المهم ان العالم دا اول لما -سمع صوت الماتور- اتعلم العلم الي كان رايح ياخد فيه شهادة الدكتوراه حجز ورجع على الصين
مقعدتش يناقش الرسالة علشان ياخد الشهادة .. خلاص هوه وصل بالعلم للي هوه عاوزوا .. ساب الشهادة ورجع بلدوا علشان يبدا يفيد البلد
طيب ممكن نكون عملين اكتر ومنفكرش دلوقتي اننا نرجع علشان نفيد البلد بالعلم .. ممكن نطرح مشكلة .. ونقول نناقش اذاي نفيد البلد .. سواء واحنا بره او واحنا جوه البلد
بس بطريقة غير الفلوس الفلوس كده كده لازم نبعتها … فدي مسلمة من المسلمات
نحاول نعمل حاجة تانية بيها نفيد البلد … واهل البلد ونشارك في بناء الفكر .. مش شرط العلمي بس .. ولكن الاخلاقي كمان او الاتنين حتى لو عن طريق النت
في النهاية أأكد على كلامك .. الاختلاف في الراي لا يفسد للود قضية
وربنا ينفع بينا الاسلام والمسلميين ويحفظك ويحفظ اولادك من كل شر
وشكرا لاثرائنا بالمعلومات عن الاسلام في الغرب ..
وعذرا للاطالة
سيبك من الصينى والهندى ياحاج ابراهيم ؛ الصينى ده بيرجع بلدة بيلاقى وظيفة محترمة مستنياة ودخل يكفية هو وأسرتة وحياة كريمة تخلية مايفكرش فى حاجة غير إنه يبدع وينتج. احنا بنتكلم على الرجوع لمصر واللى بيرجع مصر دلوقتى بيضيع لإن البلد عايمة على وش الفتة.
للأسف ده جزء من المأساة اللى احنا فيها ؛ بنقارن نفسنا بالصين واليابان وكوريا وماليزيا ؛ أنا رحت هونج كونج سنة 2000 كان هيغمى عليا ؛ والله العظيم جالى صدمة حضارية. أنا كنت عارف اننا كدول عربية وإسلامية متخلفين إلى حد ما عن ركب الحضارة بس بصراحة ماكنتش متخيل إننا متأخرين أوى كده. أيامها لما كنا نلاقى حاجة مصنوعة فى هونج كونج نقول ايه القرف دة ومانرضاش نشتريها.
أنا هديك مثال بسيط ؛ انت طبعاً عارف وضع مصر المادى مقارنة بدول الخليج ؛ تقريباً صفر عالشمال. هل تعلم أن ناتج الدخل القومى لدولة صغيرة من دول العالم الأول زى هولندا يساوى ناتج الدخل القومى للدول العربية مجتمعة بما فيها دول الخليج العربى؟
انت طبعاً عارف هولندا بتجيب معظم الفلوس دى إزاى ؛ بغض النظر عن المليارات اللى بتحققها من برامج الكمبيوتر والخدمات الاستشارية والهندسية ؛ بيحققوا معظم دخلهم من منتجات الألبان. واحد ذكى لقى الأرض كلها خضرة قاللك هات شوية بقر هنا هيكبروا ويسمنوا ويخلفوا وبيعملوا من ورا كدة مئات المليارات من الدولارات كل سنة. طبعاً الموضوع مش بالبساطة دى فية أبحاث وصناعات و و و ولكن كل ده مبنى على فكرة بسيطة ولإن فية ناس بتشتغل مش الموظفين فى مصر اللى بيروحوا الشغل الساعة عشرة ويمشوا عشرة إلا ربع
هديك مثال تانى وكفاية عليك كده النهاردة ؛ أسبانيا ناتج الدخل القومى فيها أد ناتج الدخل القومى للدول العربية مجتمعة بما فيها دول الخليج ثلاث مرات! ؛ لازم الأرقام دى تخلينى أفكر وماتعديش عليا كده بالساهل ؛ عارف فية كام سائح بريطانى بيروحوا أسبانيا كل سنة وكام واحد بيروحوا مصر؟ ؛ اربعة مليون بيروحوا أسبانيا ومليون بيروحوا مصر مع إننا احنا الفراعنة وأسوان والأقصر والمعابد الفرعونية والمتاحف وشواطىء ملهاش أول من آخر وأسبانيا مافيهاش أى حاجة غير الشواطىء وجوها تقريباً زى مصر بس الفرق تعرفة من أول زيارة لأسبانيا. أنا رحت أسبانيا اسبوع من سنتين ؛ الأجازة كلها كانت استمتاع من أول ماتنزل من الطيارة لحد ماتركب الطيارة ترجع بلدك ؛ ناس واخدين الموضوع جد ومهتمين بأدق التفاصيل ورغم إن أوربا بصفة عامة أغلى من مصر كتير إلا إننا ماصرفناش كتير زى مابنصرف فى مصر.
معلش أنا وعدتك أسبانيا آخر مثال بس فية حاجة تانية جت فى دماغى عاوز أقولهالك ؛ عارف اسهام الفرد فى ناتج الدخل القومى فى قطر والبحرين أد ايه؟
صفر
اقرا الرقم ده تانى كده
صفر
صفر
صفر
صفر
تخيل نص مليون بنى آدم عايشين زى قلتهم
عايشين عالة على العالم
كل حاجة بيستخدموها فى حياتهم اليومية مستوردة
كل الوظائف ؛ ماعدا طبعاً الأمير والوزير والمدير ؛ بيشغلها أجانب
قارن ده بواحد زى ديفيد بيكهام مثلاً ؛ كابتن المنتخب الانجليزى ؛ ده راجل بيقبض متين ألف جنية استرلينى فى الأسبوع بقالة كذا سنة وممكن يعتزل من سنين ومراتة كانت عضوة فى فريق سبايس جيرلز يعنى معاها ملايين هيه كمان ؛ يعنى ببساطة يقدروا يعملوا زى اخواننا بتوع قطر والبحرين ويستمتعوا بفلوسهم وخلاص على كده ولكن مش متعودين على كده ؛ نمط الحياة هنا غير كدة خالص ؛ نمط الحياة هنا من جد وجد ؛ متلاقيش واحد انجليزى يقولك من نام وارتاح ضمن النجاح ولو حتى على سبيل الهزار.
وأخيراً لو عندك فكرة تفيد البلد اطرحها للمناقشة وان شاء الله كلنا نساعد على أد مانقدر.
أخى الحبيب أيمن طاهر
******** لاكن اختلافى الكبير معاك هو ان نبره كلامك وحتى لو كنت بتحاول تداريها فيها “كره لمصر” او كره لحال مصر قلب فى النهايه لكره كل ما يرتبط بمصر من مكان وناس وتصرفات . وانا معاك ان كلها حاجات تغيظ الواحد وتفقعه وتخليه دمه فيران بس ده المفروض يدفعه انه يحبها اكتر ويفكر لمصلحتها . عارف ان انت هتقول مهما عملنا فيها مش هتنضف . معاك حق وكمان انا مش عايزك ترجع مصر . بالعكس انت ممكن تخدم الاسلام والمسلمين من عندك احسن من 100 واحد هنا . لاكن خلى بالك انك ما تنجرفش لنظريه النفور من مصر ********
كل اللى أقدر أقولهولك إن مصر هيه أمى ونيلها هو دمى والعتاب على قدر المحبة. أنا لو مابحبش مصر ماكنتش أتكلم فى الموضوع ده ولا أجيب اسيرة مصر خالص. أنا زرت بلاد كتير ومنها بلاد فيها مطارات مش أد كدة زى مثلاً مطار جدة المنيل بستين نيلة ورغم ذلك عمرى ماجبت سيرتة لإنة شىء مايهمنيش ؛ بس لما أنزل مطار بلدى وألاقية بالمنظر دة لازم أتكلم علشان ببساطة شديدة دى بلدى وعاوزها تبقى أحسن بلد فى الدنيا.
******** مصر كلها بلاااااوى وكلنا عارفين كده لاكن حب الاوطان من الايمان . ولو بصينا على الغرب فهنلاقى انه كان عايش فى احوال زينا واسوا مننا وبعدين ربنا قلب حاله . اذن بين ليله وضحاها يبدل الله حال بعد حال .معنى كده انها لو بقت بكره نضيفه والناس بتضحك ومتقدمه هترجع تحبها تانى . يبقى كده انت بتحب حب مكانى فقط ********
الحقيقة أول مرة أسمع الكلمة دى ؛ ان حب الأوطان من الإيمان ؛ لو تقولنا أصلها يبقى جزاك الله خير ؛ أقصد يعنى هل ده حديث ولا مثل ولا مقولة من أقوال الحكماء ؛ لإنى بصراحة مش موافق عليها مع احترامى لرأيك. أنا شايف إن دورى الأهم فى الحياة هو العبادة بكل ماتحمل هذه الكلمة من معانى مصداقاً لقول الله تعالى فى سورة الذاريات “وَمَا خَلَقْتُ الْجِنَّ وَالإِنْسَ إِلا لِيَعْبُدُونِ” ؛ والدعوة إلى الله مصداقاً لقول الله تعالى فى سورة الحج “الَّذِينَ إِنْ مَكَّنَّاهُمْ فِي الأَرْضِ أَقَامُوا الصَّلاةَ وَآتَوُا الزَّكَاةَ وَأَمَرُوا بِالْمَعْرُوفِ وَنَهَوْا عَنِ الْمُنْكَرِ وَلِلَّهِ عَاقِبَةُ الأُمُورِ”. مهمة الدعوة إلى الله تعالى من أفضل المهمات وأشرفها، فقد رتب عليها الأجر الكبير كما قال رسول الله ـ صلى الله عليه وسلم ـ لعلي بن أبي طالب ـ رضي الله عنه: “لأن يهدي الله بك رجلاً واحداً خير لك من حُمُرٍ النَّعم”، وفي حديث آخر: “من دعا إلى هدى كان له من الأجر مثل أُجور من تبعه لا ينقص ذلك من أجورهم شيئاً”. موضوع الأوطان ده حدود تتغير بتغير الزمان والمكان وانتمائى الأول لدينى ان شاء الله ؛ ولكن ده موضوع شرعى مش عاوزين ندخل فية علشان ماحدش يفتى بغير علم ويمكنك مراجعة أقوال العلماء فى هذا الموضوع على الإنترنت ان شاء الله. وأنا أرشح لك كتاب اسمة “أولئك رجال ونساء أسلموا” للشيخ صالح بن عبد العزيز بن محمد آل الشيخ ؛ وفية قصص لعدد من المهتدين من الجنسين الذين دخلوا في الإسلام خلال إقامتهم في المملكة العربية السعودية ومعظمها تبيّن أثر القدوة والسلوك الحسن في قبول الدعوة وأن يكون المسلم قدوة حسنة يتطلع إليها الآخرين.
ندخل فى موضوع الغرب اللى اتصلح حالة ؛ الغرب متصلحش حالة فى يوم وليلة ولاحاجة ؛ ده موضوع خد عشرات السنين وعرق وجهد وتنظيم وتخطيط وهيه دى الفكرة اللى بحاول أوصلها إن مصر مش مستنيانى أنا ولاغيرى علشان نرجع ولااحنا رجوعنا هيعمل حاجة أصلاً لإن المشكلة مش فى رجوعنا ؛ مهما ناس خرجت من مصر لسه فيها ناس عباقرة كتير جداً ؛ مئات الألوف ؛ موجودين جوة مصر ولكن من تجربتى المتواضعة فى مصر بأكدلك إن الناس دى لاهتعرف تعمل حاجة لنفسها ولا لمصر طول ماهما جوة مصر. المشاكل كتيرة وكبيرة وعاوزة عشرات السنين علشان تتحل ولازم خطة طويلة المدى وأنا على أتم استعداد أكون جزء من هذه الخطة بخبرتى المتواضعة ؛ انما علشان أرجع مصر كده عشوائى أشوفلى وظيفة وبعدين أجوز العيال وبعدين أستنى أموت معتقدش هقدر أعمل كده. أما بخصوص سؤالك لو مصر بقت نضيفة هرجع أحبها تانى ؛ أولاً أنا مابكرههاش علشان أرجع أحبها تانى أنا بكرة حاجات معينة وده على فكرة شىء اتعلمتة من الغرب ؛ إنى منتقدش شخص بل أنتقد تصرفات وده شىء مهم جداً فى تعامل الناس مع بعضهم ؛ يعنى بدل مقول لواحد انت قليل الذوق ؛ أقولة انت دايماً عودتنا انك انسان لبق ومؤدب ومحترم ولكن فى الموقف الفلانى خانك التعبير وقلت عبارات مش مناسبة ؛ كده يعنى. ثانياً الناس طول عمرها بتضحك فى مصر ومعتقدش اننا هنبطل نضحك ؛ ولو شفت برنامج “بنى آدم شو” بتاع أحمد آدم مش هتبطل ضحك مع انه بيضحكنا على خيبتنا التقيلة (على فكرة أنا اتفرجت علية امبارح على قناة الحياة واتفرجت علية تانى من شوية على الحياة اتنين ؛ علشان بس ماحدش يقول إنى مش متابع ؛ وكنت بتفرج على اللمبى كمان من شوية على الفضائية المصرية حتى بالأمارة حلا شيحا اتحجبت واعتزلت
). ثالثاً وده الأهم معتقدش مصر هتبقى نضيفة قبل ماأموت ؛ يمكن أنا متشائم شوية بس ده الواقع للأسف. وعلى فكرة موضوع النظافة مش سبب رئيسى يحدد رجوعى مصر من عدمة ؛ انت عارف اللى بيسافر برة مصر غالباً لما بيرجع بيبقى معاة فلوس يعنى ممكن أشتريلى شقة ولافيلا فى مدينة من المدن الجديدة وأعيش جوة السور مع الناس النضيفة اللى لابسة بدل اللى ريحتها حلوة دى 
******** على فكره بعد طول عمر ان شاء الله هترجع برضه مصر . وهترجع علشان تستقر . معنى كده انها مكان للسكن ليك ولناس كتير . وعارف ان انت كمان بتقول فى نفسك ان الناس دى فكرانى بكره مصر و انا بحبها . لاكن بالفعل انت بتتشد انك تكرهها الوقتى . انا معاك ان احنا نكره الفساد والظلم والجهل الى خلى السواق ما بيضحكش . لاكن مش ده بس هى مصر . مليانه مشاكل لاكن مش بالسوء ده ********
أنا مش عارف ايه حكاية السواق اللى مضايقاكوا أوى دى ؛ والله العظيم أنا ماجبت سيرة السواق ؛ وبعدين السواق كان ابن عمى وكان بيضحك والله
******** بخصوص نقطه الاسلام . صدقنى مهما عملت وحاولت . التربيه الاسلاميه عندك شئ وهنا شئ تانى خالص . كلنا اهلينا سافروا واخواتنا سافروا . وكله حط ايده على قلبه من موضوع التربيه الاسلاميه . ودى نقطه تخلى الواحد برضه يحب البلد دى شويه ********
معلش أنا هختلف معاك فى النقطة دى من واقع تجربتى الشخصية. بس فى نفس الوقت زى ماقلت فى ردى على أخى الحبيب ابراهيم إنى عامل خطة طوارىء للرجوع لمصر فى خلال شهر واحد فقط لو حسيت ان حد من بناتى متأثرين بسلبيات الحياة الغربية.
على فكرة أنا كنت فى اجتماع لأولياء الأمور امبارح فى مدرسة ندين بنتى التانية وكانوا جايبين خبير فى علم التخاطب علشان يقولنا نعمل ايه فى البيت علشان نخلى العيال يعرفوا يتعاملوا مع الآخرين بطريقة كويسة والراجل ده قال حاجة غريبة جداً ؛ قال ان الاحصائيات اللى عندهم بتقول ان العيال الصغيرين من دول تانية هم الأكثر تفوقاً على الانجليز بس اللى بيتكلموا لغتهم الأولى فقط ؛ يعنى مثلاً لو عيل جاى من مصر بيتكلم عربى فى البيت (وطبعاً انجليزى فى المدرسة) بيبقى متفوق فى المدرسة. وكمان اكتشفت حاجة غريبة جداً ؛ ان المسلمين فى انجلترا مقدمين طلب للحكومة الانجليزية لتدريس اللغة العربية كلغة تانية فى المدارس يعنى الموضوع هيبقى فلة ان شاء الله
******** فى النهايه انا سعيد جدا انك مثال ناجح عندك . ونصحتى ما تزلش مصر الوقتى علشان تحقق نجاح عندك لاكن طول ما انت عندك افضل عاشه فى حب البلد دى وعلم كده لأولادك . وخلى نصيحتك للشباب . انكوا اتعلموا واشتغلوا وحاولوا تحققوا نفسكم فى البلد دى ولو فشلتم فسافروا وحققوا حلمكم برده وبعدين ارجعوا تانى وشجعوا الناس اكتر واكتر . الناس بقت محتاجه امل اكتر اوى الفتره دى الى كلها احباط ********
جزاك الله خير على كلامك الطيب وأوعدك هعمل بنصيحتك للنهاية ان شاء الله وأنا موافقك تماماً على كل اللى انت بتقولة. والأمل موجود ان شاء الله ولكن موضوع السفر برة مصر ده شىء لابد منة وإلا الانسان هيضيع سنين كتير من عمرة وبعدين ياصابت ياخابت والعمر مش بعزقة لازم الواحد يتصرف فية بحكمة.
وان شاء الله أتشرف بلقائك فى الزيارة القادمة لمصر ان شاء الله. الحقيقة احنا مش هننزل مصر السنة دى علشان الحكاية مزنقة حبتين وعلشان صرفنا كتير أوى لما كنا فى مصر فى أغسطس اللى فات لكن ان شاء اللة يمكن أنا أنزل لوحدى قريب بس لو ده ماحصلش متهيألى مش هننزل قبل آخر 2010 ان شاء الله.
السلام عليكم
حضرتك قلت في اول الموضوع انه ليس من خطوات حل المشكله ان تتجاهل المشكله
وطبعا الواضح ان المشكله بقت هيا مصر وشعب مصر
طيب حضرتك لما تسافر ماهو انت اكيد سبت المشكله وتجاهلتها او هربت منها
ظروف العيشه الصعبه دي واقع على كل واحد اتولد في البلد دي
والواقع ده احنا كلنا لازم نقعد ونغيره
انا مش شايف ان الحل اننا نسيب البلد ونبعت فلوس لاهلنا لان اهلنا هياخدوا مننا الفلوس لحد ميكبروا ويتعلموا وبرده هيلاقوا العيشه صعبه ويسافروا
يعني لما كلنا نسافر ونسيب البلد مين بقا الي هينهض بالبلد؟
ماهي اكيد هتتاخر اكتر
الناس الي عايشين مرتاحين في مصر هما رجال الاعمال والمستثمرين وغيرهم الي شغال موظف تعبان
طيب حضرتك لما تكون تعبان وتسيب البلد لرجال الاعمال مين هينهض بالبلد؟
رجل الاعمال ده عايز بينزس بس مش هيدور على العلم
انما انت بقا عالم تسافر برا تفيد الي برا وتسيب البلد لمين؟
ماهو المشكله لما الناس الكبيره تسافر هسيبوا البلد لمين ينهض بيها؟
نسافر كلنا ونسيبها للحراميه الي مش عارفين يسافروا يبقا كدا مصر معادتش موجوده وكل عام وانتم بخير
انا رأيي ان معنى كلمة وطن
هو الارض الي عشت عليها انا واهلي من زمان
لو كان الوطن مش بيديني فهوا اكيد كان بيدي اهلي الي قدروا يكبروني
لحد ماجيت انا وسبتهم
معتقدش ان جدي مثلا الي كان عايش ايام الاحتلال كان بيقول البلد وحشه ياعم الانجليز بيذلونا انا هسافر واسيبها تخرب
وهنرجع ورا ليه ماحنا عندنا فلسطين اهو
مين يقدر يقولي بقا ليه الفلسطينين كلهم بيموتوا في بلدهم؟
هو اسرائيل دي لو حد قالها افتحوا الباب للفلسطينين احسن هيسافروا ويسيبوا البلد يبقا اسرائيل هتقول لا؟
ليه الام في فلسطين بتربي ولدها علشان تكبره ويبقا رجا ليموت في بلده وعلى ارضه
انا ياما شفت ناس في فلسطين ماتت قدام بيتها بتدافع عنه
كل واحد هناك بيدافع عن المتر الي اتولد وعاش عليه
معتقدش انهم قالوا ده البلد وحشه والحياه صعبه تعالى نمشي
ولا قالوا ده البلد فيها جثث في الشوار بدل الزباله الي عندنا
كلهم قرروا يقعدوا في البلد لحد ميحرروها ويرجعوا لها امنها ومجدها
وكلنا كدا لازم نقعد في مصر لحد منصنع منها المكان الي بنحبه
انا مش هقول انا بحب مصر لانها احلى مكان في الدنيا
بس انا بحب مصر لاني بحب اهلي وهما جزء من شعب مصر
انا لا اقصد من الرد اني اارض حد او ازعل حد من الي شاركوا في التوبيك انا بس بوضح راي متواضع خاص بيا
هوا شكلها كده الموضوع اتقفل علي كده
بس بجد مكنش دا المرجو من النقاش
علي الاقل نطلع في الاخر بنتيجه او توصيات او حتي اقتراحات
يعني في النهاية كل واحد فضفض علي الي جواه وخلاص
كنت اتمني اننا نعمل نتائج توصلنالها من خلال تجارب عمليه
يعني ذي مبنقول في النهاية : خلاصة الحوار
إزاى الكلام ده ؛ الموضوع متقفلش لسة ان شاء الله ؛ أنا هبعتلكوا عدد واحد تعليق كمان شوية
م اشرف والله انا بستني تعليقاتك بفارغ الصبر , وتعليق كل شخص , لأن فعلا الموضوع دا انا فيه دلوقتي وبجد عملي قلل مش هتتخيله , وله تأثير سلبي علي الشغل , وكمان انا في مرحلة دلوقتي لازم ادور علي الاستقرار علشان ادور علي بنت الحلال يعني الموضوع مش بسيط بجد ومتوقف عليه حجات كتير ونفسي بجد ارسي علي بر , هل استقر هنا في المملكة واكيف اموري , ولا ارجع مصر وحاول ابني من جديد , ولو استقريت هنا هل زوجتي هتتقبل الوضع؟؟ , واولادي لما يكبروا ويروحوا المدارس او الجامعه , طيب ولو حبيت ارجع مصر بعد 10 سنين ايه الوضع , اساله كتير ومحيراني لذلك انا متابع الموضوع جدا , وكمان سعيد بكل الردود لكن في النهاية عايز اعرف ايه هو الحل؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
أختنا الحبيبة سينار
قبل ماأعلق على كلامك أحب أقولك على المقلب اللى عملتة فى جوزك أول امبارح
أنا كنت بكلم أحمد على المسنجر وجت سيرة البلوج فحبيت أهزر معاه وقلتلة الحقيقة الردود كلها جميلة وظريفة بس مش مضايقنى غير واحده اسمها سينار قاعده تقولى بشمهندس وحضرتك حسستنى إن أنا عجوز ؛ وسألتة انت تعرفها؟
أحمد كان بيكلمنى بالانجليزى بقالة ييجى نص ساعة بس أول ماقلت كده حول عربى وقاللى: دى مراتى!!!!
المهم نخش على التعليق
******** طيب لما حضرتك و أنا و غيرنا و غيرنا من إللي المفروض شايفين سوء الحاله إلي إحنا فيها و حاسين بكل ده، لما كلنا كدة نسيبها، من إلي هيفضل فيها ؟من إللي يشتغل عشان يخليها أحسن ، من إللي هيبدأ فعلا و يحاول يغير ، لأن لو ماحدش بدأ يبقى عمرها ماتتغير ********
أرجع واقولك تانى كلامك فية تجاهل كبير لمشكلة الفقر والعوزة اللى موجودة فى مصر ؛ وفية نفس المقارنة اللى أنا شايف حسب رأيى المتواضع انها غير واقعية ؛ انتى بتقولى هل يخلية برة مصر يفيد بلدة وناسة ولايخرج برة مصر يفيد بلد تانية ؛ اللى بيقعد جوة مصر لابيفيد مصر ولابيفيد نفسة حتى لإنه ببساطة مش لاقى ياكل ؛ تخيلى بلد فيها كمية البطالة المهولة دى والحكومة تطلع تقولك كلة تمام وميت فل واربعتاشر. أما اللى بيطلع برة حتى لو قرر يستمر برة طول حياتة ومايرجعش أهو على الأقل بيبعت مساعدات مادية فى مصر ؛ يبقى المقارنة الواقعية هنا هل يخلية فى مصر يضيع عمرة ومايفيدش بلدة ولانفسة ؛ ولا يسافر برة مصر وعلى الأقل يفيد البلد مادياً؟
اللى بيفكر هيجيب فلوس ازاى علشان يأكل نفسة مراتة وعيالة عمرة ماهيعرف يفكر يعمل حاجة تانية ولاهيفكر فى تغيير حال البلد وفى الحالة دى أنا رأيى انه يطلع برة مصر يبعد عن البطالة شوية ؛ يشتغللة كام سنة وعلى الأقل يغير من نفسة إلى الأحسن سواء مادياً أو علمياً أو أدبياً أو أو أو. وأنا بتكلم هنا عن عامة الشعب مش عن الناس اللى شغالة فى القطاع العام وفودافون وموبينيل والشركات الأجنبية اللى فى مصر.
******** لكن، هل الحل إني أفضل هاجرها على طول ، و مش أرجع لها، و أشجع أهلي و أصحابي ينفدوا بجلدهم و يسبوها هما كمان ********
أنا مش شايف مانع إنى أفضل هاجرها على طول ؛ ليه لأ؟ – إذا كان رجوعى هيضرنى ويضعفنى ويخلينى إنسان ضعيف مش قادر أنفع اللى حواليا ولاحتى أنفع نفسى يبقى من الأفضل ليا إنى أفضل برة مصر ؛ وكمان من الأفضل لمصر علشان مزودش عدد المكتئبين والمهمومين وعدد المشاكل فيها. إنما لو رجوعى مش هيضرنى أوى وهقدر أعيش أنا ومراتى وعيالى فى مستوى معقول وهقدر أفيد نفسى وغيرى فمرحباً بالرجوع.
وعلى فكرة تفكير الانسان بيتغير كتير بعد الجواز والعيال. يعنى أنا مثلاً قبل الجواز كان ممكن أشتغل أى شغلانة وأعيش فى أى مكان وأعمل أى حاجة ومهما حصل ببقى مستعد لتحمل النتائج لأنها بتأثر عليا أنا بس ؛ انما دلوقتى بفكر فى مراتى وعيالى ومستقبلهم وان أى قرار غلط ممكن يأثر علينا كلنا.
وإذا كنتى مش موافقة إنى أشجع أهلى وأصحابى انهم يخرجوا من مصر قوليلى ايه البديل. أنا ممكن أحكيلك على قصص لقرايبى وأصحابى بس ؛ مش هجيب سيرة حد من برة ؛ والله هتقعدى تعيطى أسبوع. لو واحد خريج كلية تجارة مثلاً ماعندوش أى أمل يحصل على وظيفة فى القوى العاملة ومافيش أمل أدامة غير انه يشتغل سواق تاكسى ولا بواب ؛ ايه المانع انه يروح دولة عربية يشتغل محاسب محترم ويكسب فلوس كويسة ويفيد البلد بدل ماهو قاعد عالة عليها. وبرضة أنا بتكلم على عامة الناس اللى أنا منهم مش على خريج التجارة اللى شغال فى بنك ولا فى القطاع العام بالواسطه وبيقبض آلافات أو على واحد وارث أوأهلة كانوا فى الخليج مثلاً وممكن يعمل مشروع ومش محتاج الوظيفة أصلاً.
******** من إللي يشتغل عشان يخليها أحسن ، من إللي هيبدأ فعلا و يحاول يغير ، لأن لو ماحدش بدأ يبقى عمرها ماتتغير و يوم ورا يوم وأنا في الغربة احس إني مش عايز أرجع أكتر و أكتر ، طيب و بعدين؟ صدقني أنا فعلا بسأل لأني مش عارفه الاجابه ولا عارفة إيه الحل ؟ ********
الحل بسيط ؛ أفضل فى الغربة. أنا شخصياً عاجبانى الغربة جداً ومستريح فيها وحالياً مش عاوز أرجع ومش شايف أى مشكلة لو مارجعتش خالص.
أما بخصوص مين اللى يخليها أحسن أنا أقولك مين يخليها أحسن ؛ احنا برضة ؛ أقصد احنا المصريين اللى فى الخارج. هو الواحد لما بيكون برة مصر لازم يكون منفصل تماماً عن مصر؟ بالعكس اللى بيحب مصر بيفكر فيها على طول وبيفكر إزاى يحل مشاكلها ولوهيبدأ بنفسة ولكن أنا وجهة نظرى اللى بيتمركز حواليها معظم ردودى إن الإنسان الضعيف علمياً ومادياً و و و مايقدرش يفيد حد ولاحتى نفسة وان خطوة الخروج من مصر لابد منها. بعد الخروج من مصر فية مليون طريقة أساعد بيها البلد سواء رجعت أو مارجعتش مش هيه دى القضية. وهديكى مثال صغير عن حاجة أنا شخصياً كنت بفكر أعملها ولسة بخطط للموضوع ده ؛ انتى عارفة ان مصر فيها عجز رهيب فى الميزان التجارى ؛ يعنى الفلوس اللى بتدفعها الدولة ككل فى الاستيراد أكتر بكتير جداً من الفلوس اللى بتقبضها الدولة من التصدير وده بيؤدى لتراكم الديون على المدى الطويل وزيادة المشاكل داخل مصر. أنا عندى فرص كتيرة إنى أصدر لمصر مليون حاجة من هنا وممكن أعمل فلوس كتير جداً من الموضوع دة ؛ كمبيوترات مستعملة ؛ أجهزة الكترونية ؛ برامج ؛ و و و الخ ولكنى معارض الموضوع ده تماماً ومش عاوز أزود مشكلة عجز الميزان التجارى. اللى أنا فكرت فية إنى أصدر من مصر لهنا وكنت بفكر أصدر شغل كمبيوتر ؛ حاجة كده مشابهة للآوتسورسنج. فكرة زى دى ممكن تفيد مصر جداً ؛ وتخلق وظايف كتير جوة مصر وتجيب عملة صعبة للبلد كل المطلوب إنى أنزل مصر كذا مرة فى السنة علشان أتابع الشغل ومن غير ماأنزل مصر نهائى وأضيع نفسى. ده غير ان فية مليون فكرة وفكرة ممكن المغتربين المصريين يساعدوا بيها مصر زى تصدير الفواكة من مصر ؛ يعنى فية مليون حاجة ممكن مصر تصدرها وده فى الآخر هيعود بالخير على الناس كلها.
******** أعتقد إن حضرتك عارف إن أحمد له أخ في إنجلترا برضه، ومن كلامنا معاه أو مع مراته، طبعا لما بيجوا هنا بيبقوا في نفس الحاله إلي حضرتك وصفتها ، من غيظ و استنكار و احساس بالخنقه من الأحوال إللي بقينا فيها بس في نفس الوقت مشتاقين لي روح الناس ولأهلهم ، اتبسط لما لقى بنتهم عرفت هنا تتكلم عربي و بقت غلاباوية عالأخر كمان ********
بصراحة لو بنتهم مابتتكلمش عربى فى انجلترا يبقى هما مقصرين فى حقها. أنا عندى تلات بنات والتلاتة بيتكلموا عربى وانجليزى بطلاقة والحمد للة. لما بنتى الأولى نوران ماكانش فية مشكلة لإنى أنا ومراتى بنتكلم عربى فى البيت وماكانش أدامها غير انها تتكلم عربى لحد سن اربع سنين لما دخلت المدرسة ؛ أول مادخلت المدرسة ابتدت تتكلم انجليزى ولكن برضة فى البيت الكلام بالعربى فبقت بتتكلم نص اليوم عربى ونص اليوم انجليزى علشان كده اللغتين عندها كويسين فهما كانش فية مشكلة. لما بنتى التانية ندين وصلت بدأت المشكلة لإن نوران بقت لما ترجع من المدرسة بدل ماتتكلم معانا احنا بالعربى بقت تلعب مع ندين ؛ ولإنها لسة راجعة من المدرسة والكلام كلة بالانجليزى بقت تكمل انجليزى مع ندين فظهرت مشكلة إن ندين العربى بتاعها مش كويس وهنا تدخل الأب ؛ اللى هو أنا
؛ وبدأت فى تطبيق العقوبات ؛ اللى أسمعة بيتكلم انجليزى فى البيت بيطلع يقعد فوق نص ساعة لوحدة ومن يومها والكلام كلة بالعربى فى البيت والحمد لله. ياسمين آخر العنقود لسة ماكملتش تلات سنين يعنى لسة بتتكلم نص كلام بس كلامها معظمة بالعربى لحد ماتدخل المدرسة السنة الجاية ان شاء الله تبتدى تتعلم انجليزى. لما بيخرجوا معانا يلعبوا برة البيت بنسمحلهم يتكلموا انجليزى مع بعض ؛ يعنى هو الموضوع عاوز شوية تنظيم ورقابة وكلة يبقى تمام ان شاء الله.
******** الكلام إلي سمعته من مرات أخو أحمد- إن البنات عشان يتربوا ويكبروا هناك يبقى في المقابل محتاج أقفل عليهم جامد جدا عشان اعزلهم عن ثقافة المجتمع الغلط أو إللي بتناقض الإسلام إللي هما عايشين فيها ********
هو أكيد الموضوع عاوز رقابة ولكن ميزة الحياة فى الغرب ان كل واحد يقدر يعيش الحياة اللى هو عاوزها بدون مايتأثر بالآخرين ؛ احنا الحمد لله عايشين فى منطقة إسلامية معظم سكانها مسلمين يعنى الواحد يقدر يختار اختيارات تبعدة إلى حد كبير عن السلوكيات اللى احنا كمسلمين مانقبلهاش زى المنطقة اللى يعيش فيها ؛ القنوات التليفزيونية اللى يتفرج عليها ؛ و و الخ. وهديلك مثال بسيط من مصر مش من انجلترا ؛ هل ينفع إنى أروح شرم الشيخ مثلاً وبعدين أشتكى ان البنات هناك لابسين بكينى؟ ؛ منا عارف من قبل ماأروح انهم لابسين بكينى يبقى أنا أتجنب أروح مكان زى ده إذا كان المنظر ده بيأذينى. وهديلك مثال تانى قريب من مثال أنا قلتة قبل كده بخصوص لبس بعض البنات فى مصر ؛ المثال عن القنوات التليفزيونية ؛ أولاً هنا القنوات ممنوع تبث أى حاجة الأطفال (اللى تحت ستاشر سنة) ماينفعش يتفرجوا عليها قبل الساعة تمانية مساءاً ؛ يعنى أى مشاهد عرى أو قبلة ساخنة أو أى حاجات من اللى القنوات العربية بتعرضها ليل نهار. ده غير إن لو بنتى بتتفرج على قناة أجنبية ولقت برتنى سبيرز مثلاً لابسة لبس مش مناسب هيه من نفسها بتقول أصلها مش مسلمة ؛ انما أقولها ايه لما تبقى قاعدة تتفرج على قناة عربية ويجيبوا أغنية لروبى ولا بوسى سمير؟ مش بقولكوا أنا متابع مش مصدقينى
******** والحاجه التانية إللي هيا التالي، إن البنات هناك كمان لما بتكبر و تكون عاشت عمرها بره كدة، فرصها في الجواز مش بتكون سهلة أبدا، طبعا كله قسمه و نصيب بس ده إللي هيا شايفه و حاساه هناك ********
وهيه يعنى فرص الجواز للبنات فى مصر سهلة؟ أنا اختى داخلة على الخمسة وتلاتين ولسة متجوزتش وفية زيها ستة مليون بنت فى مصر وفى أقوال أخرى عشرة مليون ؛ وإن كنت أعتقد ان الرقم التانى مبالغ فيه حبتين. وبعدين أنا شايف إن بناتى لما يكون معاهم جنسية بريطانية فرصتهم فى الجواز بتزيد مش بتقل لإن اللى هيتجوزهم هيبقى عنده فرصة يخرج من مصر ؛ ودى فرصة بيحلم بيها شباب كتير النهاردة. ده غير إننا ان شاء الله أول مايكبروا شوية هندور لهم على من نرضى دينة وخلقة ومش هنطلب منة حاجة تانية أكتر من كده ان شاء الله ؛ أما الناس فى مصر ولاحول ولاقوة إلا بالله ؛ تبقى بنتة عنست بقالها عشر سنين ويجيلها عريس يقعد يطلب منة شقة وعفش ومهر ومقدم ومؤخر وحاجات يحتاج على الأقل عشرين سنة علشان يوفرها. بس عموماً ده أحد المشاكل اللى احنا بنفكر فيها وممكن ننزل مصر ؛ ولو مؤقتاً ؛ علشان نجوز البنات بس ده شىء لسة علية وقت ان شاء الله ؛ نوران بنتى لسة عندها تمن سنين يعنى لسة بدرى شوية على الموضوع ده.
وأخيراً أنا شاكر لردك الكريم وأرجو إنى أكون ماضايقتش حد بكلامى.
وإلى حلقة قادمة ان شاء الله والسلام عليكم ورحمة الله وبركاتة