مفيش فايدة و مفيش امل!
انا عارف ان معظمكم (اللي يعرفني) يعرف اني من الشخصيات المتفائلة جداً و كمان ديماً مقتنع ان في حلول كتير لأي مشكلة و ان مفيش حاجة اسمها ان مفيش فايدة ، لكن اللي برضوا انتوا عارفينوا ان انا موضوعي جداً و مقتنع ان كل حاجة محتاجة تفكير و تخطيط و ترتيب و عشان كدة انا اكتشفت بجد ان مفيش فايدة
طبعاً محدش فاهم حاجة ، طيب انا هحاول شويه (معلش استحملوني)
ايه المشكلة
المشكلة اني نفسي اعمل حاجة افيد بيها وطني و ديني ، نفسي اعمل حاجة عشان مصر و عشان الأسلام و عشان الأمة الاسلامية و طوال فترة لكن طبعاً فيه اولويات ، يعني مثلاً الأولوية الاوى هيه ديني و التانية بلدي (وطني) و التالتة العرب و كدة يعني ، و ﻷني انا مقتنع ان الاتنين الاولانيين مرتبطين (يعني لو هاتفيد بلد فممكن تفيد دينك برضو) فبدأت بيهم
طيب ايه المشاكل اللي عندنا؟ ببسااااطة لا تعد و لا تحصى
الفساد و الجهل و الرشوة و الخيانة و عدم الأمانة و عدم الأخلاص و السرقة و القتل و التحرش و الهبل و النظافة و الاقتصاد و البطاله و القمع و غياب الأمن و حاجات كتييييييير تانية بس مش هاكتبها عشان السيرفر مايجيلوش حالة اغماء (اللي بنسميها يهنج)
طيب هتقوللي مهو احنا اللي في ايدينا نصلحها و كل واحد يعمل اللي عليه و ابدأ بنفسك و الكلام اللطيف اللي بنسمعة كل يوم من ناس كل شغلتها انها تاكل عيش من ورا الكلام ده ، هقوللك صح و عندك حق و كللوا تمام بس هل انت جربت؟ هل ده عمل تأثير؟
خليني اقولوكوا قصتي المتواضعة مع الموضوع ده و نشوف
تجربتي
في البداية احب اقول الحمد لله لأني انسان نشيط جداً و ربنا رزقني نعمة النشاط فأنا فعال جداً في اي مكان و بعمل شغل اكتر و اسرع من اغلب زمايلي و دائماً ببعث بالتفاؤل و النشاط للي حواليا و كله ميه ميه ، لكن ده يخليك دايماً تفكر في احسن طريقة تبذل بيها المجهود عشان تحقق نتائج احسن و افضل و انا مقتنع تمام الاقتناع انك لو معملتش كده تبقى آثم! هتقوللي ازاي هقوللك ازاي
الأنسان زي الماكينة لكن له مخ يعني له دخل و خرج و الكفاءة في الهندسة هي نسبة الخرج بالنسبة للدخل يعني مثلاً موتور العربية تبقى الكفاءة بتاعتة عالية لو اعطى قدرة اكبر ببنزين اقل
و لو الأنسان بيطلع خرج اقل من اللي فعلاً يقدر يخرجة ده معناه ان كفائتة اقل من امكانياته الحقيقية و بالتالي بيهدر جزء من امكانياتة و ده طبعاً اهدار وقت لأنك لاتنتفع به ، فربنا رزقك الامكانيات جواك و انت مش بتستخدمها كلها لأنك مفكرتش تستخدمها كلها بِأعلى كفاءة
المهم ، لمدة طويلة جداً و انا بحاول اصلح المستوى العلمي لطلبة الحاسبات في جامعة المنصورة و كنت واحد من المؤسسين لأسرة كات في الجامعة و اللي بعدها عملت مجموعة فيها اسمها الهاكرز و الناتج النهائي للمجهود ده و اللي كانت نتيجتة ان في عدد قليل من الناس اتعلم و اتغير و لكن بالنسبة لمنظور الكفاءة ف أنا كنت بضيع وقت و ربنا هايحاسبني عليه ، بس لأني مكنتش متخيل السلبية و الاستهتار و اللي هينتج عنها النتيجة دي فكنت متخيل انها هاتنجح و ده اللي اي حد يتخيلوا لو فكر بالمنطق ، يعني شباب فاضي في الجامعة بيتعلم كلام فارغ و هو عارف كدة كويس و بيذاكر على قد الامتحانات و جتلوا فرصه حد يعلوا و يساعده مجااااناً و يديلوا كورسات و مشاريع و كللل المطلوب منه انه يتعلم الكلام و عشان يتعلم لازم يلتزم مع نفسه عشان يقدر يطلع بنتيجة و على الرغم من كدة تلاقي الشباب سخن في الاول و بعد كام محاضرة تقريبا 2% هما اللي بيكملوا ، و ده حصل كتيييييييير و كل مرة اقول يمكن يا ابو حميد الناس دي هي اللي مش عايزة تتعلم و غيرهم احسن ، اقوم اجرب مع غيرهم و اطلع بنفس النتيجة و الله جربت حتى مع اجيال مختلفة ، انا بقالي في الكات تقريباً خمس سنين يعني كل سنة في شباب جديد بيدخل و شباب بيخرج و النتيجة واحدة
يعني مرة ابتديت كورس الجورثمات و كنت بشرح من كتاب جامعة MIT و اللي بذلت فيه مجهود خزعبلي عشان افهمه كويس و ده طبعاً ﻷننا مخدناش اي حاجة في الكليه لها علاقة بالكلام ده و كنت بعمل انترفيو في جوجل و اكتشفت اني ضعيف في الموضوع ده و هما متوقعين اني اكون عارفه عشان انا مهندس (ايوه مهندس بس غير بتاعهم او بالأصح غير المهندس الحقيقي) و بدأت الكورس في المدرجات و دي كانت ايام السبت اللي هي اجازتي الاسبوعية من الشغل ، كنت بنزل المنصورة كل اسبوع عشان الكورس و عامل ورق تحضير و مفيش بعد كدة و بدأت الكورس بخمسه و خمسين نفر و بعد تقريباً اربع او خمس محاصرات اصبحوا سته!
الناس في الجامعة نوعين ، نوع كويس ، يعني اخد كورسات و هو اصلاً شاطر و ييجي منه و عايز يتعلم و كدة و دول برضو قليلين جداً جداً و دول مشكلتهم الرهيبة انهم اول ما بيبقى قدامهم فرصة للفلوس و الشغل بينسوا اي حاجة تانية و معندهومش استعداد حقيقي انهم يتعلموا تاني طالما بيجيبوا فلوس او معندهمش استعداد حقيقي انهم يعلموا او يساعدوا غيرهم
النوع التاني و هو النوع اللي تايه و ضايع و في منهم عايز يتعلم و لكن معندوش الأرادة يعني كلام على ورق و من الأخر مفتقد اللهدف اللي يخليه يضحي باللعب و الخروج في سبيل انه يتعلم و ده اللي بحاول اصلحة
اللطيف بقة ان جزء من دول بيبقى بعد كدة كويس و زي ماقلت جزء صغيييير جداً و لما بيبقى كويس اول حاجة بيعملها انه بيسيب العمل التطوعي اللي هو اتعلم منه في الاساس و بيتحول للنوع الاول اللي هو اخر حاجة في اولوياته هي العمل التطوعي و تغيير الغير
يعني عندي امثلة كتييير جداً لناس كانت في ا لكلية و اتعلمت حاجات كتير ان ماكانش كل حاجة هي تعرفها من الكات و اللي فيها و بعد ماتخرج ( و سعات قبل) تلاقيه قص ملح و داب و الحياة تاخدة و اكل العيش و كلل اللي انا كنت بطلبوا انه يساعد في اوقاتة الفاضية
مفيش امل
ليه مفيش امل لأن ببساطة من خلال تجربتي المتواضعة احنا بننفخ في اربه مخرومة و محدش بيساعد الناس تاني بعد اما يبقي كويس و الكويسين همهم نفسهم “بس” و في منهم يقوللك كلام جميل زي (انا نفسي و الله) و حاجات زي كدة و دي الأسباب
مفيش اي نوع من انواع الاتزام من كل انواع الناس اللي قابلتها يعني بضطر اوقات كتير جداً اني اعمل حاجات بنفسي مع اني مشغول جداً بس انا لو معملتهاش مش هتتعمل و مفيش حد بيبدأ معايا و بيكمل لازم يخلع في السكة و الاسباب مختلفة
البلد مش بتشجع التغيير و الاصلاح و ده واضح في خمسين حاجة يعني مثلاً عمرو خالد منعوه يدي محاضرات في مصر عشان الشباب ميلفوش حواليه و من رأيي عشان كله يفضل نايم و محدش يشتغل و على الرغم من انه بعيد عن التعصب و التشدد كل البعد و كل اهتمامة بمشاريح لإصلاح الشباب
الجامعة زي ماتكون واقفا ضدنا و ده موضوع يطول شرحة و محتاج بوست منفصل بس الملخص انها بتبذل مجهودات كبيرة قي تعطيلنا و مثال صغير جداً اننا بندفع نقريباً 300 في اليوم او اكثر عشان نعمل اي محاضرات في قاعة المؤتمرات المعفنة بتاعة الكلية على الرغم من ان الاسرة في اتحاد الطلبة و زي الفل لاكن عمرنا ماخدنا تعريفة منهم و بنلم من بعض فلوس عشان نعرف نعمل المحاضرات و الكورسات
الشباب بجد لازم يفوق و يغير نفسة و يتعلم و يصحى من الغيبوبة اللي عايش فيها و الضياع اللي هو فيه و ده صعب جداً لأن اللي مش عايزين كدة بصراحة شغالين بزمة
انا بجد بفكر ، هل اللي بنعملوا ده في منه امل؟ من رأيي مفيش امل
و انا ابتديت افكر في طرق تانية للتغير و الاصلاح و اغلبها للأسف من خارج مصر ، يعيني اسافر و اعمل عمل تطوعي من خارج مصر و في احتمال اكبر كتير اني اقدر اغير حاجة عن و انا هنا و لا ايه رأيكم؟
بص يا أحمد الموضوع ده بكل بساطة عشان إحنا اتعودنا على كدة من زمان يعني سلوكيات غلط و بقى ده الطبيعي و صعب تغيرو يعني مثلا النظافة يبقى الواحد من دول ستايل كدة و لابس نضيف و راكب عربية جامدة و تبص تلاقيه رامي زبالة مثلا من شباك العربية كأنها حاجة عادية أصلو ف بيتهم بيرمي الزبالة على الأرض ولا من البلكونة متعرفش الناس بتعمل كدة ليه ، هتفرق معاه إيه لو سابو فالعربية لغاية مايلقى باسكت يعني ؟؟؟
التغير ده ف وقت من الوقت أكد هيحصل .. لأني متأكدة جدا إن الله لا يضيع أجر من أحسن عملا ..
إصبر لأن صعب جدا إنك تعمل أي حاجة من برا مصر ، هو أكد فرصة الشغل أحسن و تستفيد كتير بس أكيد فعل أخر هترجع مصر تاني ..
مش عارف اقولك ايه … انا معملتش مجهود زي الي انت بتعملوا .. او ساعدت حد بالعدد الي انت ساعدتو علشان اقدر احكم او اقول رأي واضح ومفيد
عارف انت المنظر دا 
بس بجد انا لو مكانك كنت زهقت من زمان .. المشكلة اني لما بتحط في مكان زي مكانك كده واملي يخيب .. وداني بتحمر ووشي بيزنهر و جسمي بيسخن واطلع دخان
ما علينا …. انت اتبعت اسلوب انك تجيب ناس تعلمهم علشان يشتغلوا تاني معاك في نفس العمل الي اتعلموا منو … على اساس ان هما المفروض انهم يقتنعوا بالفكرة خصوصا بعد لما اتعلموا وباو حاجة من الطريقة دي
ودي للاسف على الرغم انو هدف نبيل هتلاقي الي يستغلوا بطريقة مقززة في سبيل تحقيق مصالح وبس
اما انو يتعلم ويطلع يجيب فلوس وينساك اصلا .. ولا يفتكرك حتى بدعوة
واما انو يستفيد من ورا مجهودك الي انت بتعملوا بضمير ويكسب فلوس ويسيبك للمثاليات بتاعتك
المهم انا رايي … انك متبداش كده .. البداية لازم تكون مع تيم وتحاول تدور على حد اساس مقتنع بالفكرة .. مش لسه هتعلموا وتقنعوا بيها .. ومش لازم يكونوا افذاذ زيك يعني .. يكفي انهم يكونوا عندهم الدافع انهم يصلحوا . واكيد هيفيدوا حتى ولو بحماسهم وتعليمهم للي اقل منهم
دي فكرة دا يعني لو الموضوع لسه في طور التفكير .. متكونش خدت القرار خلاص
I have tried the voluntary work(OSS taba3an) with :
1- My friends in collage, it didn’t work
2- With my neighbours , it didn’t work
3- With Egyptian community, it didn’t even work after a lot of dedication from the eglug team.
4- A lot of events less than 1% from the audience, is interested.
is this depression related to the python course?
انا عارف انك بذلت مجهو كبير جدا ربما اكتر من اللى انا سمعته عنه من الناس اللى فى الكات
و خيبة الأمل اللى انت اصبت بيها كبيرة
انا مش عارف اقول ايه فعلا
لكن الحاجة الوحيده اللى ممكن اقولها ان انت مش لوحدك
ربما فى الكات الناس مثلا تتعلم وتمشى وانت تكون لوحدك
لكن انت بتتكلم عن الإصلاح وعمل الخير ودى فيها ناس معاك حتى لو مش كتير
يعنى مثلا طبعا انت تسمع عن الأفلام الوثائقية واكيد انت عارف ان كلها انجليزى لأن مفيش عرب بينتجوها بس فيه شخص من غزة وهو فى البهدله دى فكر انه يترجم الأفلام دى فى منتدى عربى وكان لوحده طبعا فى الأول ولمده طويلة وطبعا الإقبال على حاجة زى دى كان قليل جدا
بس هو كان صبور وبذل مجهود فى الترجمات دى كبير جدا وانا عاصرت فترات فى أول الأمر دا
ودلوقتى قدر بتوفيق من الله انه يجمع عدد لا بأس به من المهتمين بالموضوع وترجم لوحده حوالى 50 فيلم والناس اللى جمعها معاه ماشاء الله وتم ترجمت مئات الأفلام الوثائقية وكل دا لأنه استمر فى الفكرة فى الوقت اللى كان مفيش حد يسمع اصلا عن أفلام وثائقية
وحاليا عمل مشروع للترجمة على مستوى العالم العربى والمشروع دا شغال ماشاء الله عليه حاليا وانا انضميت ليه بعد فترة وانت اكيد هتلاقى ناس عايزة تعمل خير
وكل ترجمة من النوع دا بعد كدا يعتبر هو ليه الفضل فى ظهورها للنور
واظن ان كدا ممكن اقولك فيه فايدة ان شاء الله
بالمقارنه بوضعه مثلا ظروفه سيئه جدا كما يعلم الجميع وعدم الإقبال او المسانده ليه اكيد دا كان ليه أثر كبير بس هو صمم و كمل
ممكن تعمل اى حاجة تانية فيها خير برده بأسلوب تانى جوا مصر
ربنا يوفقك
اولا السلام عليكم
بصراحة يابشمهندس احمد انا عايز اقول لحضرتك حاجه
انا واحد من الناس الي اتغيروا بمجرد اني شفتك مرتين في الاسكوب وعلى كدا ابتديت انا اشتغل مع نفسي
وبصراحه انا اخدت من كلامك الدافع لان الدافع هو اهم حاجه
انا هقولك حاجه كمان يابشمهندس انا نزلت كل الفيديو الي كانوا على النت خاصين بيك لا ي سيشن كنت بتعملها
وبتفرج عليهم كتير مش علشان احفظ المعلومه بس علشان كلامك فيه دفعه جميله للامام وانا من الناس الي لو حضرت كورس معاك مش ممكن امشي منه ابدا
بس للاسف اني مكنتش بقدر اتابع الهاكرز وده بسبب ان الدفعه عندي مفيهاش حد عارف اننا في قسم حاسبات ونظم
اساسا العيب يابشمهندس اكبر من ان الشباب بقا غاوي لعب ومش بيقتنع
الحكايه الوقتي لها جذور قديمه
الناس دي كلها اتولدت اصلا وهما بيسمعوا كلام من حواليهم ان كله مش لاقي شغل واننا داخلين كليه هندسه ندور على شغل والمصيبه اننا حتى عايزين الشغل من غير منتعب
من الاخر الي جاي هندسه ده جاي مفكر انه داخل الكليه علشان يتخرج يلاقي الشغل بيخبط على الباب وبيقوله تعالى
طبعا البيئه الي اتربى فيها واحد كدا وهو كل همه اصلا لو فكر في مستقبله انه بيدور على لقمه العيش والكلام ده
طبيعي انه مش هيدور على علم ولا غيره
انا عن نفسي اقتنعت بنظرتك للكمبيوتر لانك بتبص له على انه علم مش فلوس
انا واحد من الناس لما اتعلم وابقا كويس واشتغل في مكان كويس انا مش هقول كفايا كدا خليني افضل بقا في الشركه دي لحد ماموت
لا انا المفروض اني بدور على علم
وباخد فلوس علشان اخد بيها كورسات
مش علشان اروح مارينا في الصيف
رايي المتواضع ان كل شخص يفكر في العلم وهيلاقي الفلوس بتجي له لوحدها
يعني اطلب انت العلم ومسيرك هتبقا كويس ووقتها السوق هو الي هيجري وراك
هو بصراحه انا لحد الوقتي مقلتش حاجه مفيده يعني كنت بطلع الي جوايا بس
بس كل الي عايز اقوله لحضرتك ان انت عندي مثل اعلى مع اني مش بحضر لك بس بحاول اخد التشجيع من كلامك
وحاجه كمان
انا عايزك مش تيأس من الناس لان هما كدا كدا مبعث لليأس للاسف
بس انا قلت لك انك مثلي الاعلي
وانت مثلك الاعلي في رسالتك دي يكون الرسول صلي الله عليه وسلم
وفكر كدا الرسول نشر الاسلام ازاي وازاي عمل دوله اسلاميه بالحجم الي احنا فيه الوقتي ده؟
طبعا كلنا عارفين هو تعب قد ايه علشان الرساله
قارن بقا بين حالتك وحالة الرسول وحاول تتبع خطواته في نشر العلم وتنوير الناس
اهو انت اكيد هتلاقينا بقينا زي قريش للاسف
بس اتخد من الرسول قدوه ليك في الرساله دي وصدقني ربنا هيبارك لك في علمك ويزيدك وانت لسه في الخمسه وعشرين تقريبا يعني ان شاء الله قدامك العمر انك تبقا طفره في الكمبيوتر
ربنا يجازيك خير على عملك واتنمى لك المزيد من التقدم
انا حاسس ان البوست دا وراه حاجة حصلت , او موقف معين بعينه , اكيد حاجة زعلتك خلتك تبقيزعلان كده وحاجة كبيرة . لكن انا هقولك حاجة بسيطة جدا هل انتا بتقيس مدي نجاحك بعدد الناس الي انتا علمتهم ؟؟؟؟ , بمعني اخر لو انتا علمت 1000 واحد والالف دول طلعوا كويسين وحلوين مكنتش كتبت البوست دا ؟؟؟ , بالعكس انا شايف انك نجحت ونجاح ساحق كمان انتا وكل الي معاك تعرف ليه , لسبب بسيط جدا انك زرعت فينا حاجة حلوة اوي انك تساعد الناس بدون مقابل وتدي بدون متستنا تاخد , هتسالني كام واحد ؟؟؟ هقلك كتير جدا جدا , مش معني انهم بعاد عنك او معندكش خلفيه باللي بيعملوه يبقي خلاص , انتا مش شايف غير الي قدامك بس في الكات في الشغل يعني … , لكن فيه يااحمد وفيه كتير جدا كمان يعرفوكم كويس وانتم مش تعرفوهم , اتعلموا منكم حتي لو حجات بسيطة ودلوقتي بيعلموها وفيه امثله كتير جدا جدا جدا , اكيد انتا تعرف طبعا حضرة النبي لما بدأ بالدعوه كان معاه كام صحابي ؟؟؟ بلاش دي , حضرة النبي قابل هوا والصحابة حجات وعقبات اكيد طبعا اكبر من انتا او الكات قبلتوها , قدر يغير ولا لا؟؟؟ , صبر ولا لا؟؟؟ احمد انتا علمتنا حجات كتير اوي , اشياء حلوة لها معاني كويسة , صدقني انتا نجحت ونجحت نجاح صاحق كمان , كتير يااحمد مشين علي الطريق وبيحولوا يغيروا ولو شئ بسيط , لكن انتا رميت البزرة متقلقش اكيد في يوم من الايام هتحصد بس هوا الموضوع وقت بس , مش عيزين نبص لنص الكباية الي فاضي ونعمل الي علينا ونسعي والباقي علي ربنا , اعتقد دا كلامك الي علمتهلنا , متجيش بعد مبدأنا نطبقة ونعمل بيه تقلنا لا يجماعه دا غلط , انا في النهاية اتضحلي انه مفيش امل ومفيش فايده !!!! اعتقد دا مش صح , لو حابب اتكلم علي المستوي الشخصي انتا عملتلي ايه وعلمتني ايه وانا حاليا بعمل ايه وبعلم ايه بس انا مش حابب , مش مهم تعرف لكن الاهم انك تثق تماما ان عمر متعبك راح هدر , وربنا يجزيك خير الجزاء علي نيتك , وفي النهاية اختتم بقوله وان ليس لإنسان الا ماسعي , انتا عليك السعي وربنا وحده عليه النتيجه
السلام عليكم .. أحب أشكر حضرتك أولا يا باشمهندس أحمد لأنك ساعدتني شخصيا كتير , على المستوى العلمي والمستوى الفكري والمستوى الأخلاقي , وبالرغم من أننا خزلناك ومكناش على المستوى اللي حضرتك طالبه مننا .. باعترف – شخصيا – اني خدت منك كتير بس مكنش الخرج بتاعي حتى يتساوى مع مقدار الدخل وبالتالي فالكفاءة أقل من الواحد الصحيح
بالنسبة لك انت بتقوم بعمل جميل جدا للإسلام , كونك قدوة في حد ذاتك لشباب كتير فده أحد الإنجازات اللي تفخر بيها وتحمد ربنا عليها .. محاولاتك المستميته مش هتضيع هباءا وتأكد من كده .. مش هقولك في الآخرة بس لكن في الدنيا .. رغم إن مستوى الخرج مش متناسب بشكل مرضي مع مستوى الدخل لكن أكيد لو دورت هتلاقي بعض النتائج الإيجابية وبعض الشخصيات اللي ممكن تبدأ بيها وتساعدك في تحقيق حلمك .. من صفات القادة إنهم دايما عندهم حلم , وعلى رأي الأستاذ عمرو خالد إن مفيش حد في دماغه فكرة عايش بيها وعايز يحققها وبيبذل فيها مجهود إلا وربنا لازم يخليه يحققها قبل ما يموت
إنا لا نضيع أجر من أحسن عملا ..
ما تقلقش بس انت اصبر شوية ولعل الصبر يثقل شخصيتك ويصهرك أكتر فتكون أكثر نضجا وأكثر مرونة وخبرة .. في الوقت المناسب الدنيا هتفتح وهتشوف نتائج مكنتش متخيل إنها تحصل
إنا لا نضيع أجر من أحسن عملا
قصة الأستاذ عمرو خالد خير دليل عصري .. هو كمان قابل كتير من الإضطهاد وكان محل شائعات .. وناس كتير شاورت عليه ان كفاية كده بقى .. مبقاش في حاجة تعملها أكتر من كده .. انطرد بره بلده وهو اللي كان عاوز ينهض بالشباب .. صبر شوية وربنا فتح عليه وشاف نتائج شغله والعالم كله اعترف بيه ماعدا حكومة بلده للأسف
اللي عاوز أقوله إن ده دايما نهج أصحاب الرسالات والمصلحين والأنبياء في كل عصر .. حضرتك لسه سنك صغير وقلت ان بقالك خمس سنين بس .. الفترة دي مش كبيرة في عمر الرسالات العظيمة
ولينا في رسول الله قدوة .. تخيل النبي وهو بيلف على القبائل يقنعهم بالإسلام , مكنش فقط بيتقابل بالرفض .. بل ساعات بالضرب والشتيمة والإهانة .. افتكر رحلة الطائف
مش يمكن ربنا بيختبر مدى إصرارك على الفكرة . مش يمكن ربنا بيجهزك لشئ عظيم في المستقبل ومش هتكون كفء ليه غير لما تمر بمرحلة ضيق وألم فشخصيتك تنصهر وتزداد نضجا وتبقى مستعد لحمل الرسالة
“وإذ ابتلى ابراهيم ربه بكلمات فأتهمن , قال إني جاعلك للناس إماما”
في رأيي الموضوع مش مجرد دخل وخرج .. في معالجة أيضا لازم تحصل , ودي بتاخد وقت لكن إحنا بنستعجل
اتمنى أكون قلت حاجة مفيدة
أنا مش حابب يكون كلامي مجرد تطييب خاطر .. انت شخص عملي وانا شايف ان في خطوات لازم تاخدها بشكل جدي .. أنا مش عارف مدى إمكانية الخظوات دي للتطبيق الواقعي , لكن انا هقترح عليك الآتي:
1- لازم يكون معاك مجموعة تكون هي نواة لمشاريعك .. المجموعة دي مش سهل تكونها ولازم يتوفر فيها شروط مش أهمها العلم .. لكن أهمها الإيمان العميق بفكرتك ومشاريعك .. الإستعداد للتضحية بحاجات شخصية مقابل تحقيق إنجازات , ناس مستعدة تبذل وقت وجهد وفلوس وهم راضيين
هتعرف تلاقي الناس دي إزاي؟ .. دي حاجة انت أكيد تعرف تحسبها مع نفسك
2- تبدأ “تربي” المجموعة دي وتختبر مدى تحملهم للمسؤولية , وتلتقي بيهم بشكل دوري وتعملوا إنجازات بسيطة في الأول
3- التدرج في تحقيق الأهداف .. أنا شايف إن أحد مشاكلك هي إن أهدافك اللي عاوز تحققها أكبر من إنها تكون بداية , علشان كده البدايات مش بتيجي بنتائج واضحة وبتحس إن كل ما تبدأ تفشل .. بلاش يكون جسمك أكبر من مخك – ماتفهمنيش غلط – لكن خلي في تناسب بين المشاريع اللي ممكن تبدأ بيها كبداية وبين مستوى الناس اللي معاك , سبب كبير إن ناس بتبعد هي إنهم بيلاقي افكارك أكبر من قدرتهم على تنفيذها , وبالتالي بيجيلهم إحباط
قد أكون مخطئ في التصورات دي لكن كانت مجرد محاولات يمكن تطلع منها بفكرة واحدة يكون ليها فايدة
اولاً انا عايز اوضح ان مش معنى كلامي اني هاسيب العمل التطوعي او كدة بالعكس انا مش هاقدر اعيش من غير رسالتي لكن انا بفكر ان ممكن يكون في افكار افضل و اكثر كفاءة من اللي انا بعملة و مش قادر احقق بيه اي جزء من اهدافي و زي ما بتقولوا عمرو خالد نجاحة الحقيقي محصلش غير و هو بره مصر
الحاجة التانية هي ان انا مش بطلب من الناس اشياء صعبة او احلام كبيرة بالعكس انا منظم جداً جداً و جربت كل انواع الافكار و جميع المستويات و كان عندي خطة منظمة و ده انا اتعلمتة من التدريب و اللي الحمد لله انا فيه محترف و معتمد من اكتر من شركة عالمية و ممكن ابراهيم يشهد
موضوع اني اعمل فريق عمل ف بصراحة انت بتحلم ، انا طوال الخمس سنين دول و انا بحاول و مش لاقي المواصفات اللي انت بتتكلم عنها دي و مع ان طلباتي كانت اقل من كلامك اصلاً لكن العامل المشترك بين كل الناس هو عدم الجدية و عدم الألتزام و ده بيخلي اي حاجة تفشل
انا طول عمري و انا نفسي اعمل جروب من الناس متظبطة على مزاجي و كنت بعمل كدة مع المنحة بتاعت وزارة الأتصالات و اللي شرفت اني درست فيها سنتين و اشرفت على مشروعين تخرج من افضل مشاربع التخرج اللي اتعملوا في المنحة في مصر و على الرغم من ان العائد المادي كان لايذكر و دي معلومة مايعرفهاش كتير لاكن انا كنت باشتغل مع الشباب كأنهم اخواتي و كان عندي احلام نكمل مع بعض في مشاريع اخرى في شركة *ما* و اللي استفادت في النهاية من المشاريع و الشغل ده و انا اقدر اجزم ان المستوى اللي كان بيتدرس بيه في المنحة ماكانش فعلاً موجود في مصر و انا مراتي مثلاً من خريجي المنحة برضوا و اللي شافوا الناس اللي بتدرس عشان اكل العيش و مفيش اهتمام حقيقي بالمهارات الفردية للطلبة
و رداً علي صديقي ضياء ، الموضوع مش بسبب كورس البايثون و لا حاجة بس له علاقة بحال كل حاجة في مصر
و على فكرة كورس البايثون عليه اقبال كبير جداً و اكيد فيه التزام عارف ليه؟ عشان الكورس مش مجاني فاللي بيجي مفكر 100 مرة و متأكد انه عايز الكورس
انا خايف اظلمك واقول انك قررت تمشي وتسيب البلد علشان كده اكتشفت فجاة ان مفيش فايدة
انا مبقولش انك هتبطل عمل تطوعي .. انا عارف انك هتكمل .. بس اذاي .. و هتعمل ايه لمصر من بره؟؟؟
اكيد انك لسه مفكرتش في الموضوع دا … انت فكرت بس ان مفيش فايدة .. وهتخرج بره باه وبعدين تبدا تدور ايه الي تقدر تعملوا …
على العموم فيه فكرة لو ربنا يسر وكنت انت موجود لحد لما انزل هنعد سوا ونتكلم فيها .. لان الفكرة عاوزة مقدرة مادية معقولة و همة عالية جدا ولازم يشتغل فيها جروب مش صغير وفيه ناس اظن انها مستعدة تساعد في الموضوع دا
حتى لو مكنتش معانا اكيد هيفيدنا رايك
ربنا ييسر بس ويقدرني واقدر استقر السنة الجاية ان شاء الله في مصر ..
سلام عليكم
ثانية واحدة لو سمحت !!
طبعا مفيش حد فينا احسن الرسول -صلي الله عليه و سلم – و لا حتي جزء منه … وبالرغم من ان الله اعطي نعمة -حسن الكلم – للرسول !! … الا ان حوالي ربع البشر فقط -تقريبا – اللي مسلمين دلوقت !!
الموضوع ملوش علاقة بمصر بس يعني – مش بنفي عنها المساوئ اللي ذكرت – و لكن دي طبيعة البشر يا بشمهندس احمد !!
“ليس عليك الا البلاغ”
الموضوع مش بالكترة و لا بالعدد … و مش لازم اقعد اكلم كل واحد مخصوص عشان اقولو كلام هو عارفة قبل كدة !! …
ميين قالك ان مفيش فايدة او افادة … انا واحد من الناس اللي بتاثر جدا بكلامك… و بستناه من فترة للتاانية … و الي حد كبير كان لكلامك دة اثر في اني اكون الشخص اللي انا عليه دلوقت … و انا متاكد اني مش لوحدي زي ما انا متاكد ان انا و اللي زيي ان شاء الله بنجتهد عشان نرد جميل زي دة … و هي دي الفايدة الحقيقية !!
لو سمحت يا بشمهندس احمد خلي باللك من بوستات زي دي … اللي مش مهتم مش مهتم من الاول … لكن كلام زي دة ممكن يحبط ناس مهتميين
!!
سلام
مش الهدف من الكلام احباطك او احباط الناس بالعكس النا مش بتكلم من نظرة تشاؤمية انا بتكلم من خلال تجارب حقيقية و برضو كلامك عن الرسالة مضمونة اني ارجع في افكاري كأني عايز اهجر و اسيب رسالتي لكن الحقيقة مش كدة و انا بكرر ان انا مقدرش اعيش من غير رسالتي لكن انا بفكر في الطرق الاخرى و طبعا كلامك جميل و زي كلام ناس كتير بعنولي لكن مش مهم ان كلامي يأثر بس لا
المهم ان الكلام يجيب نتيجة و ان تكون النتيجة تكاملية و متواصلة يعني هفهمك قصدي
في التجربة بتاعتي انا بساعد الطلبة في الجامعة و مشكلتي الاساسية ان الناس بتمشي و يجي غيرهم و يمشوا و يجي غيرهم و بالطريقة دي انت بتبدي كل مرة مع ناس جديدة و مش بتبني على القديم
ده عامل دي كل اما تبني دور تقوم تهده و ترجع تبنيه تاني ، يبقى اليه الفايدة؟
هو انا استغربت فى البداية انى لقيت العنوان ده اللى كاتبه بالذات أحمد سليمان لأنى بصراحة بفتخر أدام اى حد ان فى شخصية مسلمة وانا عارفاها على المستوى العلمى ده
بالنسبة للكلام اللى قلته انا عارفه ان لك حق فيه بس يمكن انت مش شايف الناس اللى طلعو من تحت ايدك
فى ناس فعلا طلعو من تحت ايدك ماشاء الله عليهم دلوقتى وفى شركات محترمة يمكن العدد ده مش كبير بالنسبة لأحلامك بس فى ناتج وده حاجة كويسة جدا ويمكن انت الوحيد اللى فى الكات اللى صبرت انك تعمل حاجة زى دى
بس انا شايفة ان فى فايدة على الرغم من الكلام اللى قلته ده كله بدليل انى شايفة فى خلال الخمس سنين دول مستوى ال IT فى المنصورة بدأ يعلى ومعظم الشركات اللى فى القاهرة مش بتخلى من حد من المنصورة والناس بدأت تسأل انا عايز اتعلم واتعلم فين وازاى واعمل ايه وعدد الحضور فى السكوب بيزيد كل سنة دى كلها من ثمار الخمس سنين
متحاولش تبظر للجانب السىء اللى حصل بس لأن فى ايجابيات كتير حصلت فعلا
برضو يا سارة انا مش بتكلم و بقول مفيش ناس طلعت ، بالعكس انا اعرف ناس و كتير كمان لكن مش ده هدفي اصلاً مش هدفي اني اعلم ناس عشان تبقى كويسة و تمشي! لأ الهدف الموضوع يبقى عبارة عن صدقة جارية يعني المتعلم يعلم و يفيد الباقي يعني exponential
لكن اوضع دلوقتي مش كدة خالص و دة اللي مخلى الكفاءة قليلة جداً و انا مش بقول ان الموضوع سلبيات لكن انا بقول ان الكفاءة قليلة جداً و ان من الممكن تغيير الفكرة او الطريقة او حتى الناس
أولا مش هتعرف تلاقي الناس اللي متظبطه على مزاجك .. , لكن هتلاقي ناس تنفع تبدأ بيها
في ناس أنا أعرفهم ومش عارف ممكن أذكر أساميهم ولا لاء .. بس هم أصحابك وأثبتوا جدية معاك في الشغل .. منهم اتنين كانوا ماسكين الكات أثناء ما انت موجود وبعد ما اتخرجت
موضوع “الأمواج المنحسرة” ده طبيعي .. ان موجة جديدة من الشباب المفعم بالحماس يبدأ يحضر , وبعدين تنحسر – تتراجع – أغلب الموجة , وتبدأ موجة جديدة بعدها وهكذا
لكن دي سنة الكون .. “فأما الزبد فيذهب جفاءا وأما ما ينفع الناس فيمكث في الأرض”" .. يعني القرءان عايز يقول إن في حالة الفيضان المياه بتغمر الأرض , جزي من المياه بيكون طمي مفيد وده اللي بينفع ويركز ويرقد في الأرض وينفعها , وجزي منها بيكون قش خفيف وده بيروح لحاله
ممكن مجموعة في الكات تطلع منها بواحد أو اتنين متميزين .. ممكن مجموعة ما تطلعش منها بحاجة .. بس النماذج الموهوبة موجودة وانت ربنا اداك قدرة التحفيز واستخراج المواهب
بس استعن بالله ولا تعجز وشوف مين جدير يحمل معاك الرسالة ومستعد للتضحية
بمناسبة عمرو خالد هو ما نجحش برة مصر .. هو كان مضطر للخروج , لكن نجاحه بدأ في مصر الأول ومازال تأثيره في مصر أكبر من أي مكان
عموما أنا متفائل بيك وإن شاء الله في يوم الناس هتتلف حواليك وهيكون ليك دور مؤثر .. انت عندك المقومات الأساسية والفكرة الجديدة ..
يمكن لسه برده ما طلعناش بحل , بس ادينا بنفكر مع بعض وانا لو جت لي فكرة هدخل أكتبها هنا على طول
سلام
السلام عليكم
وعارف ان انت معاك حق فى كل الى قلته وانت اكلمت معايا فى حاجات شبه كده كتير ولسه كان من قريب . وعارف ان انا مثلا اختفيت تماما بعد الشغل فى لينكس بلس .
ازيك يا باشا . انا طول الموضوع بتاع اشرف الرفاعى وانا متوقع ان انت هتوصل للمرحله دى بعدها وان هيكون فيه موضوع شبه كده تكتبه . ده بسبب ان احنا اصدقاء ويعتبر فهمنا بعض كويس قوى وعارف ان انت نفسك تشوف الدنيه نضيفه والناس متعلمه ….وكل الى اكلم عليه اشرف الرفاعى . وعلشان انت طموحك اعلى مننا اوى على الاقل اعلى منى فكنت حاسس انه هيقلب عليك بحاله احباط
جزء كبير فى الكلام الى انت كتبته كنت حاسس فى اكتر من مره انك هتقول زى ايمن طاهر
الفكره يا احمد ان انا مش عايز اطلع اعذار لاكن انا عايز اوضح الاسباب الى متعلقه بالناس الى انت قلت عليها انها كانت كويسه وبعدين اختفت . مع العلم انى والله عمرى ما اكلمت مع حد الى واذكر فضل احمد سليمان والكات عليا واقول ان احمد سليمان هو الى علمنى واكلم على الفترات الى كنت شغال معاك فيها فى الهاكرز واكلم على الدعم الى انت اديتهولى . والكلام فى الموضوع ده ما بينقطعش لحد اليوم ده وللناس الى بديها الكورسات كمان . لاكن انت يا احمد لا يخفى عليك البلد النيله الى احنا شغالين فيها ووضع شغل القطاع الخاص فى مصر وازى انه بيستعبد الناس الى فيه فى الشغل لحد الساعه 10 بليل الى بيخليك تروح تنام مش قادر تشوف قدامك . وعلشان ترجع الخميس بلدك بتقعد 6 ساعات او اكتر على ما توصل . ويرد عليك بتعب فى الويك اند يخليك مش قادر تعمل حاجه غير انك تنام . انا مش عايز اكلم فى التفاصيل اكتر لاكن فكرتى بس ان حقيقى البهدله الى الواحد بيشوفها خاصه فى الشغل مش بتدى له اى متنفس انه حتى يذاكر حاجه لنفسه
عارف انك هتقول ما انا كمان بشتغل وبيطلع عينى . لاكن انت نفسك قلتها ان ربنا يحميك انت سريع فى تنفيذ الحاجات وده الى بيسبب فرق كبير فى الاداء
وكمان معاك ان الواحد المفروض ما ينجرش لدائره الشغل اوى كده ويفوق لنفسه . لاكن والله يا احمد الواحد بيحاول لاكن المعادله بنت لذينه . لو ما اشتغلتش اوى مش هتاخد فلوس وهيبقى مستواك المادى وحش . وده هيخليك تبقى حاجه من اتنين . يا اما مدايق ماديا وده اسوأ الحاجات الى فى الحياه ومش هيخليك تنتج اصلا . او انك تسافر برد وكده نرجع نقرأ البوست بتاع مهندس اشرف من الاول
للاكن الجود نيوز ان الواحد بيشوف حاجه زى كورس البايثون دى تجمع عدد من الناس تانى الى ممكن يدى دفعه شويه للامام . وبعدها يجى دفعه تانيه وكده . يعنى احساسى ان العربيه مش هتمشى بسرعه لاكن ممكن انا تزق حبه حبه . وحاسس ان النتيجه دى فى البلد دى مرضيه جدا مع الوضع المنيل الى احنا فيه
فى النهايه . انا مش بعفى نفسى بل بالعكس انا بغلط نفسى انى المفروض متعلم وواقف عن كم كتير من المشاكل بتخنق فيا ومش عارف احلها . لاكن حاسس ان طول ما احنا مع بعض والناس كلها بتشجع بعض والى عند فضل تفائل يجود على من لا فضل له هنحاول ان احنا نعمل ولو شئ بسيط من غير الافراط فى التفاؤل علشان الى ما يشوفش من الغربال يبقى اعمى
ربنا يحميك يا احمد ويسوق ليك الخير دايما لانك كنت ولازلت ليك فضل عليا
سلام
جميل ..
مبدأيا الناس اللي ردوا قبلي كلهم ذكروا أسباب ظاهريا هي أسباب تخليك تستمر في نفس المكان في نفس الجو ,, لكن طبعا مع صعوبة تنفيذ ده فعليا فده بيقلب الأسباب والنقاط اللي إتكلمتوا فيها للعكس تماما ! ورد الأخ أيمن طاهر كلام واقعي ومبرر في النقطة دي بالتحديد
مبدأيا برضه فيه سؤال بسأله دايما للناس في مصر ,, هو ليه وجهة النظر عن اللي بييسب مصر ويسافر أي مكان برة إنه كاره ليها ويمكن بيتبصلوا نظرة خيانة من بعيد ؟! هو مينفعش حد يسافر ويبقى في نفس الوقت عايز يفيد دينه ووطنه الأم بطريقة ما ؟؟
أنا مش عايز أتكلم عن نفسي بشكل خاص ,, لكن في مجتمع المصريين اللي شوفته في الغربة وأنا منهم ,, أنا شوفت ناس قد أيه بتحب مصر وبتساعدها كل واحد على قدر طاقته ,, فيه اللي شوفته رسالة حياته وهدف حياته الوحيد إنه يدرس ويدخل الحياة السياسية بفكر إصلاحي ,, وفيه اللي شوفته بيحوش وبيقرص على نفسه عشان يعمل بيزنس في مصر وينفع بيه الناس بطرق مختلفة مش مجرد شغلانة تجيب فلوس ,, وشوفت بعيني ناس بتبتكي بالدموع لما تكون مصر في أزمة وهما مش قادرين يغيروا لإن ظروفهم متسمحش ,, مش هنسى كلام واحد كان بمثابة أخويا الكبير هنا في السعودية وهو قبل ما يسافر بيوصينا إننا مننساش أهلنا في مصر والحياة تاخدنا ,, وفيه اللي شوفته حاطط هدف حياته من غربته إنه يكمل دراسة تقنية ويدرس علوم إدارسة يرجع مصر يفتح مدرسة وجامعة صغيرة تعلم الناس تيكنيكال بأسعار مخفضة قدر الإمكان ويتبني عليها مؤسسة تكسب وتصرف على الكيان التعليمي ده وتدعمه والكيان التعليمي بالعكس يمدها بالخبرات والأيد اللي تشتغل ,,
الأمثلة اللي فاتت دي أنا شوفتها بعيني ويمكن المثل الأخير ده بيوصف هدف غربتي وخروجي من مصر شخصيا ..
دي النقطة الأولى اللي كنت أحب أوضحها إن مش معنى إن حد خرج من مصر كدة يعني مش عايز يصلح أو يساعد أو ده يحطه في محل شك لحبه لدينه ولبلده .. يمكن إن ده يكون العكس تماما في بعض الأحيان !!
النقطة التانية اللي عايز أحطها قدامكم في الحقيقة ,, هي عدم ظلم الناس اللي حاولت تشتغل وهي طلبة وأول ما خلصت الدنيا خدتها لسببين ,, أولا الكلام اللي تفضل بيه أخي أيمن طاهر
ثانيا تعليم الناس دول شخصيا وثقافتهم وبيئتهم المحيطة ,, بمعنى إن إحنا عمرنا ما إتعلمنا يعني أيه فريق عمل ,, يعني إيه ثقافة عمل تطوعي ,, يعني أيه أساعد غيري مش النظرة السائدة إن كله بياكل وببيجري ! بمعنى تاني يا أحمد إن فيه سؤال بسمعه على طول في أي حاجة بتحاول تساعد بيها حد ,, وإنت أيه مصلحتك في حاجة زي كدة ؟؟!!!! أعتقد السؤال ده بيبين العقلية اللي قدامك ,, بالتالي واحد بيتردد في ذهنه السؤال ده مع كل فعل بيعمله مستحيل ننتظر منه إنه يعمل حاجة لحد
الخلاصة إن اللي عايز يساعد ويصلح لازم يعلم يعلم يعلم نفسه بنفسه أولا وحط في ذهنه إن الأمور عمرها ما هتكون سهلة ولا هتمشي صح لإن فيه بشر تانية !! وفيه بعضهم ضد ! مش مجرد مش بيساعدك في إنك تصلح
بالنسبة لأستاذ عمرو خالد ,, فدي أكتر خطوة فعالة إتعملت في مجتمعنا في السنين اللي فاتت إن الراجل بدأ يكلم العقول ,, ويخليهم يجاوبوا على نفسهم في سؤال ,, هو أنا ليه لازم أساعد ؟ وليه لازم أصلح ؟ لما الإجابة بتيجي من النفس ,, إضمن 100% إن النتائج مبهرة ,, طبعا بصرف النظر عن ال 100% السياسية اللي وصلت ال 100% الأولى لـ 0% بس اولا وأخيرا الراجل ده ساب فكرة ,, والفكرة عمرها ما بتموت
بالنسبة للخروج من مصر في قرار أي شخص مش إنت لوحدك يا أحمد ,, مبدأيا ياريت نطلع العاطفة من الكلام لإن كدة الكلام مش هايبقي فيه منه داعي
ياريت لو أي حد عنده فرصة يسأل نفسه ,, هو عايز أيه بالظبط ,, يعني مثلا لو في الحالة دي عايز أصلح بلدي وأطبق ديني كدة دي النقطة الأولى
التانية ودي الأهم جدا جدا جدا .. إزاي؟؟!! لو معندكش خطة واضحة وصريحة وأفكارك هي محور تطبيقها ,, يبقى مفيش داعي تعمل أي خطوة كبيرة زي كدة ,, لكن لو عندك خطة وبقول تاني لو عندك خطة وطريقة ,, سواء بطريقة مادية أو بطريقة علمية أو أو أو ,, والسفر هايساعد ولو بنسبة بسيطة أعتقد إن المفروض الواحد ميضيعش خطوة زي كدة لإن الفكر الصافي اللي بيتوفرلك برة مصر والنظام والراحة العقلية اللي بتلاقيها بتوفر فرص أكبر للتفكير والإنتاجية والتخطيط السليم ,, ويمكن التنفيض في بعض الحالات.. لإني شخصيا بتمنى إنه ميجيش اليوم اللي أقول فيه ,, ياريتني كنت ولما أقابل ربنا وكان قدرلي إني مقدرش أنفذ اللي بحلم بيه ,, يبقى على الأقل أقوله إني سعيت في الأرض
welcome to the club…
think about Egyptians mentality and u will get it ..
هو فعلا عندك حق الناس ناسية جزء علم ينتفع به بعد موت الانسان ده نهائى بس السبب فى ده انى بصراحة مش شفت ناس متدينة كتير متفوقة فى المجال ده
للأسف الناس واخدة التدين من ناحية واحدة بس صوم وصلاة فقط ولو كل انسان بص على العلم اللى متعلمه انه هيتحاسب عليه انه معلمهوش لحد وانه مش نافع به حد انا شايفة ان المشكلة دى هتتحل فعلا والكفاءة هتزيد
بسم الله الرحمن الرحيم
هقولك حاجة يا أبوحميد بالنسبة لحكاية انك زعلان ان الناس بيبقى مثلا في الكورسات او في المشاريع عددهم كبير في البداية فتلاقي دايما ان عقلية البني آدم منهم يقولك طب ما انا اروح أجرب ما أشوف هو هيقولنا ايه و في الأول و في الآخر انا مش خسران حاجة و دا طبعا في حالة الكورسات اللي بتبقى من غير فلوس وبالنسبة للمشاريع الناس بتقول اما نروح نشوف هو المشروع ايه بس ممكن زي ما الزميل قال انهم بعد شوية يلاقوا ان انت حلمك او اللي انت عايزه اكبر من قدراتهم دا ممكن يكون تفكيرهم بس فعليا هو مفيش حاجة اسمها ان الشيء دا صعب او يفوق قدراتي لأن لو كان الشيء دا يفوق طاقات البشر ماكنش ربنا خلقه او اوجده من البداية
من اللي فات نقدر نقول ان اساسا في ناس كتير رايحة من البداية من غير اهتمام أو بمعنى آخر رايحين يروشوا و طبعا دا شيء غير مقبول لأنك انت بادئ الكورس او المشروع و عايز يبقى في إنجاز و دا بيتعارض مع فكرهم اساسا و لذا بتلاقيهم بعد شوية يخلعوا
نيجي بقى لنقطة ان البني آدم لما يتعلم شيء و يبتدي يمسك فلوس في ايده يبطل يتعلم دا هتلاقيه طبيعي لسبب ان البني آدم دا اصلا من البداية عامل زي لمؤاخذه الصنايعي اللي بيتعلم له صنعة عشان يجيب بيها فلوس و طالما هو مكفي نفسه و بياكل و بيشرب و وبيصرف يبقى يزود نفسه او يتعلم اكتر او يطور نفسه ليه ؟
نيجي بقى لنقطة انك بتلاقي ان الناس دايما قليلة دا ليه بعد تاني و هو ان اغلبية الناس اللي انت بتحاول تساعدهم هما ناس عايزين يتعلموا و خلاص بس معندهمش الطموح اللي يخليهم يقفوا قدام الناس و يعلموهم و جايز معندهمش الملكة الخاصة بتوصيل المعلومة بس أكيد لو في ناس من اللي انت بتعلمهم عنده الثقة و الملكة الكافية انه يقف قدام الناس اكيد رسالتك هتنتشر من خلال الناس اللي اتعلموا تحت إيدك
وبالنسبة لحكاية السفر برا فدا مش حل أبدا و هقولك حاجة لو كل بني آدم موهوب ساب بلده و راح حتة تانية يبقى البلد دي هتبقى مفرغة و دا شيء يتنافى مع سمو رسالتك
و في النهاية أقدر أقولك ان سبب اللي بيحصل دا ثقافة شعب ليس إلا
انا اشتغلت فى قلب فكر صناع الحياة تقريباً 4 سنين أيام ماكانت شاده حيلها
وبقالى فى الكات سنتين ونص والفرق بين الناس الى شغاله فى صناع والى فى الكات
ان الفرق الأول كل فرد فيه مؤمن بنفس الرسالة والمبادىء والرغبة فى التحسين المستمر والأهم رفع شئن المسلمين
الناس الى فى الكات للأسف قلة قليله منها هيا الى عندها رسالة وحاسة بواجبها تجاه دينها ووطنها وإفادة الآخرين
لكن على فكرة القلة القليلة دى بدأت تزيد ببطىء الفترة االى فاتت
وبصراحة أنا شايفة ان دورنا لتوحيد الرسالة هيا ان كل من يتولى منصب قيادة فى الفريق عليه تذكير الناس بهذه القيم أول بأول وتغذية الناس بها فعلاً قبل القول
وان الكات نفسها محتاجة تحدد ده فى أهدافها
وأنا شايفه ان الهاكرز وتحديداً البورد دلوقتى فيه اتفاق على المبادىء دى الحمدلله وأنا متأكده اننا لو قدرنا ننظم إدارة بقيت الأعضاء هنكون فريق كويس جداً
ومفيش حاجة بتحصل بسرعة البذرة لو اتزرعت بصدق قد تأخد مئات السنين ولكن تطرح شجرة كبيرة جداً جداً
ومن النقط السلبية فى الكات عموماً ان مفيش نظام محدد للأعضاء وده بيخليهم ميحسوش بالانتماء ودى نقطة مهمه ومحفزة جداً
ليه الناس اللي بتبدأ بتكون متحمسه ومش بتكمل ؟ .. ليه لغاية دلوقت مفيش الشخص اللي يبقى Dedicated ومكرس حياته لفكرة إصلاحية , على الرغم من إنه هيستفيد برده لو كان إنسان صاحب رسالة إصلاحية لمجتمعه
يمكن علشان الظروف الصعبة في البلد حاليا .. قرأت لكاتب بيقول إن الناس زمان كانت عايشه في زمن سعيد , لأن كل اللي كان عليك تعمله علشان تحقق طموحك هي إنك تتعب بس
دلوقت الجري ورا لقمة العيش بقى الهدف الأساسي , احرم الشاب من الشقة والعمل والزواج وكلمه بعد كده عن إنه يعمل عمل تطوعي .. أكيد مش هيكون متحمس أوي
وهم في كده معذورين إلى حد ما
مش قصدي أزود الإحباط , لكن انا حبيت أبدأ كده علشان أقول إن رغم الظروف دي في ناس رجاله بتعيش مش لنفسها بس , بتشيل رسالة وبتشتغل علشانها , بس هم ناس من نوع خاص وعاوزين حد يفتش عليهم .. وجودهم نادر بس مش مستحيل
أنا أعرف ناس وشوفتهم بعيني عايشين علشان رسالة .. حتى لو الفلوس هتقل شوية , وحتى لو هيكون متغيب عن البيت وزوجته وأولاده شوية , والله أعرف ناس كتير كده .. فإن شاء الله في أمل أنا خبرني محدودة ومقدرش أعرف إيه هي الآليات العملية بالظبط , ممكن واحد أكثر مني خبرة يقولنا الخطوات العملية , بس أنا متأكد إن في أمل وممكن مشروع أحمد سليمان ينجح
,
مرحباً
لقد قام أحد المعجبين بمدونتك بإضافتها إلى تدوينة دوت كوم، بيت المدونات العربية.
قام فريق المحررين بمراجعة مدونتك و تصنيفها و تحرير بياناتها، حتى يتمكن زوار الموقع و محركات البحث من إيجادها و متابعتها.
يمكنك متابعة مدونتك على الرابط التالى:
http://www.tadwina.com/feed/566
يمكنك متابعة باقى مدونات تدوينة دوت كوم على الرابط التالى:
http://www.tadwina.com
لعمل أى تغييرات فى بيانات مدونتك أو لإقتراح مدونات أخرى لا تتردد فى الإتصال بنا من خلال الموقع.
و لكم جزيل الشكر،
فريق عمل تدوينة دوت كوم.
http://www.tadwina.com
شوف يأ أحمد, عندك حق, و حقك تزعل
بس إعتبر نفسك دكتور بتعالج مرض, في ناس هتلتزم بالعلاج و تستجيب و تنقذ نفسها … و في ناس أكتر مش هتعمل كده و هتضيع
تخيل قد أيه هيكون الوضع أسوأ لو أنت و القلائل اللي زيك وقفتوا محاوله البحث عن علاج و مداواة المرضى … ساعتها مش هيكون في أمل و الوباء يوصل للمرحله السادسه و عوضنا على الله
كمل, خلي عندك أمل و ماتحبطش, حتى لو التغير مش واضح بس أكيد في تأثير … علي الأقل الناس النايمه دي هنقلق منامهم لما يشوفوا زمايلهم الناجحين أحسن منهم
السلام عليكم يا بشمهندس ,
أولا بس انا عاوز أقول لحضرتك حاجة , وهى انك فعلا أثرت و ” مازلت ” تؤثر فى ناس كتير جدا , و يمكن الناس دول بقى عندهم دافع و حافز أكبر انهم يكونوا احسن من مجرد انهم حضروا سيشن ليك , او سمعوا كلامك اللى بتقوله وسط السيشن واللى فعلا بيكون مؤثر جدا .
فى بعض الناس كمان كانت لفترة عاملة ال homepage
بتاعتها البلوج بتاع حضرتك , وتقريبا مكنش فى مكان الا ولازم يذكر اسمك فيه و بنحس فعلا بالفخر واحنا بنتكلم عليك , ودا يدل ان حضرتك نجحت فعلا انك تؤثر فى كمية هائلة من البشر ,بطرق مباشرة و غير مباشرة.
انا عارف ان مش ده هدف حضرتك و فاهم كويس الاحساس اللى جواك , و عارف الانطباع اللى اى حد بيحسه لما بيلاقى استهتار من ناس متوقع منهم شئ كويس , لأنى فعلا حسيت الاحساس ده مع دفعتنا كتيييييييييير جدا..
يمكن رأيى هيكون مختلف شوية عن معظم الناس , لكن انا من رايى انك تسافر يا بشمهندس و تدور فعلا على ناس تقدر وقتك و مجهودك و تحترمك بالشكل المناسب…
وحتى لما تسافر , هتفضل برضه مثل أعلى لناس كتير ..