بقالي فترة مكتبتش هنا و السبب ان حياتي فعلاً ملخبطة و مضطربة بسبب عدد كبير من المشغوليات لكن ان شاء الله الأمور تبقى اكثر تنظيما و يرجع الاستقرار و النظام لحياني قريباً ، المهم ان كان فيه افطار جماعي للكات امبارح و انا كنت سعيد جداً و حزين جداً جداً ، سعيد لأني قابلت اصحابي اللي بقالي فترة كبيرة ماقابلتهمش زي احمد بكر و ابراهم عبد الفتاح و السيد جمال و كمان المفاجئة ايهاب عبد الرحمن و اللي بقالي تقريباً اكتر من سنه و نص ماشفتوش و معرفش عنه اخبار و كان ليه راجع من كندا بقالو يومين. و كمان قابلت زمايل في الكات بعتز اني في يوم اشتغلت معاهم و شاركونا الحلم و بذلوا مجهود كبير زي احمد مدكور و محمد صفوت و محمود متولي )ميتو ( و  ناس كتير مش عايز انسى اساميهم لكن كل الحضور كانوا ناس محترمين بصراحة.

كنت حزين لأسباب كتير و اهمها ان العدد كان قليل ، حوالي 25 واحد بس من كل الكات و ده بيعكس حاجات كتير قوي و برضو انشغال الناس من الحاجات دي لكن كان نفسي احتفل باتحاد الكات اجتماعياً و اشوف الناس كلها اصدقاء و عايزين يشوفو بعض مهما كانت الظروف لكن للأسف الحقيقة ان الوضع الحالي للكات اكتر من مذري و ده اتناقشنا فيه في جلسه ثقافيه جميله بعد الفطار و اللي كان بيتزعمها السيد جمال بخطابه الحماسي المتفائل و ردودي المحطمة للآمال و كان فيه جزء من النقاش عن اسباب مشاكل الكات الحالية و ليه في انهيار سريع في المستوى و ازاي الجامعه مش بتساعدنا و الناس مش متعاونة و حاجات كتير عايزه مقاله منفصلة

المهم كان فيه تكريم بسيط لأبرز اعضاء الكات و اللي تشرفت اني اكون على اول القائمة مع السيد جمال و ابراهيم عبد الفتاح و اللي بنعتبر حاليا اقدم اعضاء في الكات تقريبا اللي لسه نشطاء و متواجدين و اخدت هديه ظريفه و هي “كأس” الكات

اتمنى اني اشوف جيل تاني زي الجيل اللي عمل الكات و كبرها و وصل بيها للنجاح ياخد الرايه و يبهرنا و يخليني اقول انا بجد فخور بالعمل ده و اتمني اني اشوف الجامعة و الشركات في المنصورة بيدعموا العمل ده بدون انتهازية او سلبيه

و كل عام و انتم طيبين

• Previous Entry: Cloud Computing
• Next Entry: اجازة رسميه