كل سنه و انتم طيبين جميعاً ، النهاردة هاكلمكم عن حاجة غريبة و مستفزة كالعاده و هي موضوع الاجازات الرسمية ، الأجازات الرسمية دي يعني مجلس الوزراء اللي بيحددها للأحتفال بموضوع معين و في اجازات دينية و رسمية برضو زي اجازة عيد الفطر و عيد الأضحي للتحديد و دول الاجازتين اللي ربنا حددهم عشان المسلم يحتفل مع اهله و عائلته و يحس بالسعادة لكن سبحان الله تلاقي في اختراع طلع اسمه ان الاجازات الرسمية دي للقطاع العام بس و القطاع الخاص بيعمل اللي هو عايزو

يعني مثلاُ عيد الفطر ربنا شرعة تلات ايام لكن الشركات )اغلبها( قرر انه يومين بس و تالت يوم ده شغل!! يعني السنه دي لقيت ان الاجازة في الشغل هي يوم الاحد و الاثنين بس على الرغم من ان الاجازة الرسمية من مجلس الوزراء اربع ايام تبدأ السبت و اخر يوم فيها هو الثلاثاء ، الشئ الاظرف ان في اجازات زي عيد العمال مثلاً الحكومة عملت الاجازة السبت عشان عيد العمال كان موافق يوم جمعة اصلاً و الشركات طنشت تماماً و ماقلتش مثلاً ندي احنا الاحد بداله. بس مااااشي السبت اصلاً اجازة في الشركات و مش هانتكلم لكن عيد الفطر؟؟؟ اللي الواحد كان بيستناه هو و عيد الاضحى عشان يشوف اهله و اصحابه و يخرج او يسافر؟!

السنه دي انا قررت اني اعرف حقي اللي قانون العمل بيحدده و لقيت الماده 52 اللي لازم كل الناس تشوفها

للعامل الحق في إجازة بأجر كامل في الأعياد التي يصدر بتحديدها قرار من الوزير المختص بحد أقصى ثلاثة عشر يوما فى السنة .

ولصاحب العمل تشغيل العامل في هذه الأيام إذا اقتضت ظروف العمل ذلك ، ويستحق العامل فى هذه الحالة بالإضافة إلى أجره عن هذا اليوم مثلى هذا الأجر .

يعني ببساطة شديدة كل واحد فينا من حقه على اليوم التالت ده ضعف مرتبة في هذا اليوم عشان الشركة شغلنه يوم الاجازة ا لرسمية

تفتكروا هانعرف ناخد حقنا في البلد دي؟