Ashraf Elrefaey says:

أنا كنت فى القاهرة من حوالى سنة وكان الجو حنقة صحيح بس الخنقة العادية اللى بقالها خمسين سنة يبدو ان ده موضوع جديد فعلاً ؛ أو يمكن انت ابتدا يجيلك حساسية ياأحمد ؛ لو مافيش ناس تانية حاسة بالموضوع ده روح اكشف عند دكتور.

أنا عن نفسى عندى حساسية من التراب لو حد بيكنس مثلاً وشوية تراب طلعوا فى الهوا بتحنق ومابقدرش آخد نفسى ودى حاجة أنا مش مولود بيها ولاحاجة يمكن انت عندك حاجة مشابهه الله أعلم

بس على فكرة ده أحد الأسباب اللى مخليانى مش عاوز أرجع مصر ؛ إن مجال شغلى موجود فى القاهرة فقط وأنا مستحيل أعيش فى القاهرة

فكر فى خيار انك تسيب البلد ليه لأ ؛ صدقنى تفكيرك هيتغير كتير لما تقضى فترة من حياتك برة مصر ؛ أو فى بلاد مختلفة بصفة عامة

كريم says:

بالنسبة إن فيه ناس متعودة على موضوع الدخان والتلوث ده فـ شخصيا “وللأسف” كنت واحد منهم وكلامك صحيح مبدأيا في إن الناس مش حاسة لإنهم إتعودوا .. مستني أيه غير كدة مننا “نحن سكان القاهرة اللي نشأنا وترعرعنا فيها” .. بس حسيت بكلامك ده لما رجعت مصر في أول أجازة ومع إنها كانت بعد 3 شهور بس من السفر ! لكن أول ما نزلت مطار القاهرة وخرجت برة المطار بجد معرفتش أتنفس وحسيت إن نبضي سرعته ذادت وشوية حاجات مصاحبة للموضوع ومع إني بعدها قعدت في مصر شهرين بس كان عزاب عزاب من نقمة على كل حاجة وأولهم الجو والتلوث ..
ولسة من كام يوم كنت بفكر إني لما أرجع مصر أعيش في أي مكان تاني غير القاهرة .. بس للأسف أنا كل أهلي وأصحابي فضلا عن شغلي في القاهرة!

ه

Mohammed Azmy says:

الحقيقه واللى انا اعتقده ان الحل ان احنا نسيب البلد لأنها مش بلدنا
دى بلد ناس تانيين واحنا يدوبك عندنا حق استغلال الشوارع وده مش فى القاهره بس دى فى مصر كلها روح كده حاول تسوق فى المنصوره اللى انا كنت بقول عليها واحده من اجمل مدن مصر

المهم انا من كام يوم رمانى حظى التعس انى اسوق ورا عربيه من بتوع القطاع العام
والله العظيم العربيه دى بتنشع دخان من كل حته ويمكن الحته الوحيده اللى مش بتطلع دخان هى الشكمان
لكن لما تشوفها تحس ان الدخان طالع من الصاج نفسه لونه اسود قاتم خانق واعتقدت ساعتها ان دى سبب السحابه السوده مش حرق الرز

دى يا سيدى عربيه القطاع العام .. يعنى بتاع الحكومه .. نفسى اعرف فين وزاره البيئه اللى هى بتاع الحكومه برده

Ashraf Elrefaey says:

فيه بلاد كتير بتحترم المسلمين بس المسلمين مابيحترموش نفسهم

يعنى مثلاً الغربيين عندهم استعداد يحترموا ثقافة الغير جداً ولو راحوا بلد إسلامية لقوا ان الخمرة ممنوعة مافيش عندهم أى مشكلة ورغم ذلك تروح الأماكن السياحية فى تركيا ومصر وتونس والمغرب تلاقيها غرقانة خمرة بل انهم بيعرضوا الخمرة عليك عرض

أنا بقالى فى انجلترا فترة كويسة والحقيقة ناس محترمة جداً وده شىء تكتشفة من أول أسبوع ليك فى البلد ده غير ان المسلمين هنا كتير ووضعهم كويس بفضل الله. مافيش مكان فى انجلترا يبعدً عن المسجد أكتر اربعة خمسة ميل ده غير فية بلاد مليانة مسلمين زى لوتن وبرمنجهام وبرادفورد ومانشستر ده غير طبعاً لندن اللى فيها دلوقتى تقريباً مليون مسلم يعنى تقريباً كل عشرة أشخاص فى الشارع منهم واحد مسلم

لو لقيت فرصة تيجى انجلترا أو أى دولة أوربية بصفة عامة توكل على الله ولاتتردد فى التفكير لحظة واحدة ؛ على الأقل بعد كام سنة هيبقى معاك جواز سفر محترم بدل الجواز المصرى اللى مالوش أى احترام فى أى مكان فى العالم حتى فى بلاد العرب والمسلمين

والله أنا ببقى متألم وأنا رايح مصر أو الامارات فى المغرب أو أى بلد عربى أو مسلم بروحة وداخل بجوازى البريطانى بس غصب عنى الجواز المصرى فعلا بهدلة ومسخرة.

يكفى إنك لو داخل مصر بجواز المصرى وشنطة ضاعت منك هتدوخ السبع دوخات علشان تاخدها تانى وتحتاج أسبوع أجازة من الشغل على ماتعرف تجيبها أما لو داخل بأى جواز محترم تجيلك الشنطة لحد البيت ومعاها جواب اعتذار كمان

حتى فى السعودية لما كنت بحج الشرطة فى منى كانت بتعامل الناس بكل احتقار وقلة أدب واحنا كانوا مدييننا كل واحد شارة بلاستيك فى ايدة مكتوب عليها اننا حجاج أوربيين ؛ بقى العسكرى السعودى ييجى يشوفها يروح معدى علينا ولا كإنة شايفنا خالص ويخش على الناس اللى بعدنا يهزق فيهم لإنة عارف انة لو قالنا بم الحكومة البرطانية هتديلة هو واللى مشغلة بالجزمة على دماغة أما لو حاجة حصلت لمواطن مصرى الحكومة المصرية زى منتوا فاهمين هتشجب وتستنكر وتندد ويمكن بالكتير أوى تعلن عن عدم رضاءها عن اللى حصل

وعلى فكرة فية أماكن نضيفة جداً فى مصر بس دى زى منت فاهم معمولة للأثرياء اللى معاهم فلوس يعيشوا فيها من غير مايحتاجوا يشتغلوا لذلك متلاقيش فيها فرص عمل غير فى مطاعم أو فنادق أى أى أماكن من اللى بتخدم الأثرياء دول يعنى مستحيل هتلاقى فيها شغلانة تناسبك

لو مافيش فرصة فى انجلترا أو فى دولة أوربية دلوقتى فية دول عربية كويسة ؛ أقل من الدول الأوربية ولكن أحسن من مصر كتير ولكن أنا رأيى لو طلعت دولة عربية تبقى دى مرحلة انتقالية استعداداً للانتقال لدولة أوربية

وهذا رأيى من خلال خبرتى المحدودة فى هذه الحياة الصعبة ؛ والله من وراء القصد ؛ والسلام عليكم ورحمة الله وبركاتة

Ashraf Fouda says:

أنا لسه قارى كام من كام يوم فى الجرايد إن شبكات المياة تؤدى إلى الموت المبكر وده كان عنوان بحث اتناقش فى جامعة القاهرة من كام أسبوع
يعنى بقى الهوا والمايه ويا عالم إيه اللى جاى

Dina Abdul Wahab says:

أنا برضه مش مع اننا نسيب البلد
أنا على فكرة متربية في السعودية من الابتدائي لحد الثانوي لكن طول الفترة دي كان نفسي دايما أرجع بلدي و أشوفها صحيح اللي شفاه سيء لكن أعتقد ان ربنا هيحاسبنا و يسألنا عملتوا ايه لبلدكم
بالنسبة للتلوث في حلول كتير بس لو اطبقت زي مثلا زراعة الأشجار خاصة في أنواع بتمتص كميات أكبر من الغازات عن غيرها و أكيد دا حل واحد من حلول كتير العلماء أثبتوها لكن للأسف اللي قلبهم على البلد من اللي ماسكينها تقريبا معدومين

ربنا يهديهم و يقوينا عليهم