طبعاً الوضع مشتعل تماما تماما تماماً في الاعلام و فى قلوب المصريين و السودانيين و حتى الجزائريين و رأي الناس متضارب تماماً و اللي بره مصر حاسس بتضارب و مش قادر يفهم و كل الناس في حاله حيره و عشان كده انا قلت اوضح الموضوع لكل الناس عشان كله يفهم وجهه نظر كله.
طبعاً انا معلوماتي في الكوره مش كبيرة لكن دايماً عندي معلومه ان مباريات مصر مع الجزائر فيها خشونه و الخشونه هنا معناها خشونه في اللعب و ضرب و كده لكن الحقيقه عمر ما كان عندي معلومة ان الجزائريين متعصبين للكورة لدرجه ان الشغب عندهم طبيعي بعد المباريات و مش بس في الجزائر لأ ده في كل حته في العالم هما موجودين فيها ، لكن تظل دي معلومة قديمة و مفيش جديد لكن اللي حصل المره دي جديد و انا عايز افصل الموضوع من وجهة نظرى الشخصية
الموضوع عايز اننا نرجع بالزمن شويه قبل مباراه ١٤ نوفمبر ، المشجعين المصريين عارفين ان لاعبين مصر اتسمموا في الجزائر و ناس بتقول ان مقصود و لازم نوريهم لما ييجوا مصر و هما فعلاً جم مصر و اللي حصل ان زجاج الاتوبيس بتاعهم اتكسر و فيه كام لاعيب اتعورو و الاعلام بتاعنا زائد عدد كبير جداً جداً من الناس مقتنعين ادي تمثيليه و ان مفيش اي حاجه من دي حصلت و بعد المباراه ماسمعناش عن اي حاجة حصلت لكن في المقابل هناك في الجزائر الموضوع ماكانش كده خالص ، تحديداً صحيفه الشروق الجزائرية كانت مولعاها و الاتوبيس اللي اتكسر اصبح هجوم مصري على اللاعبين و الجهاز الفني و حتى الطبيب الصاحب للفريق و بعد المباراة بيقولوا حصلت مجازر و الناس اتعاملت معامله مهينه و اتضربوا و في ناس ماتت من الضرب و جايبين صورهم كمان و فيديوهات بالهبل و كمان الجريدة قعدت تتكلم بالهبل عن علاقة مصر بأسرائيل و عشان كدة هما اصبحوا حاسين اننا اليهود و استمرت الجريده في الهجوم الشرس و المبتذل بصراحة و النتيجة كانت ان الجريدة حققت رقم قياسي في مبيعاتها “واحد و نص مليون نسخة” و ده يفسر واحد من اسباب هجوم الجريدة بالطريقة دي و ماجبتش سيرة اي نفي حصل للضحايا اللي حصل على لسان السفراء في مصر و الجزائر.
فلك ان تتخيل حالة الناس هناك ، في ذهنهم ان مصر قتلت و ضربت و اهانت كرامة الجزائريين و عشان هما عصبيين فحلفوا ليلقنوا المصريين درس ماينسهوش لما يقابلوهم في الخرطوم و بصراحة لو المصريين كانوا عايشين الاحداث من وجهة النظر دي كان زمان المصريين عملوا نفس الحكايه و لو مش مصدقني افتكر حالتك بعد ماسمعت اخبار الاعتداء على الفنانين المصريين او بعد ما تقرا المقال اسخيف و الحقير ده هذه رموز أبناء جميلة بوحيرد فأين رموزكم يا أبناء فيفي عبده؟ فلو الدم فار في عروقك فاعرف انك وقعت في الفخ الاعلامي ده و لو تصفحت الجريدة عموماً هاتلاقي ٩٠٪ من الاخبار عن مصر و شتائم و سباب لم يسلم منها احد و لا حتى علاء مبارك
و الناس اللي سافرت الخرطوم من الجانب المصري وقعوا في الفخ فالجزائريين رايجين للأنتقام نتيجة الشحن الرهيب من الاعلام (او المفروض نسميه الاهدام؟) الجزائري و هما كمان عشان فنانين فليهم مصداقية عالية جداً يعني كل الناس بتسأل (طب هما هايكدبوا ليه؟) وعندهم برضوا وصول اعلامي فكلامهم مسموع في كل الاعلام المصري و ده سبب احتقان رهيب عند المصريين و اللي وصل الناس للأحساس بالأهانه الرهيب ده.
طيب انا عندي كمية كبيره من علامات الاستفهام و اللي عايزكم تفكروا في الاسئلة كويس و بعمق و ممكن يكون عندكم نتيجة و اجابات مثيرة:
١- ايه السبب ان الاعلام العالمي مطنش اللي حصل للمصريين في السودان و كله بيقول ان حصل مناوشات من الطرفين؟
٢- كان فين دور المخابرات العامه و اجهزة الامن المصريه من استشعار الشحن المبالغ ضد المصريين عند الجزائرين و توقع نتايجة و اللي من رأيي كانت واضحة وضوح الشمس؟
٣- ليه السفارة المصريه في السودان مانبهتش مصر بأن الجزائريين اشتروا اسلحه و سكاكين؟ و ليه الشرطه السودانيه نفت ان يكون حصل اي اعتداء بالسكاكين؟
٤- ليه كل وسائل الاعلام المصريه بتهاجم قناة الجزيرة تحديداً و صراحةً في كل البرامج و ليه مش بتهاجم باقي القنوات العالمية اللي اهملت الاحداث؟
٥- ليه ماوصلناش اي احساس ان فيه اي مسئول جزائري اعتذز بالنيابة عن الشعب؟
٦- ليه فجأه كل الناس بقت بتشتم في العروبة؟ و كأن كل الناس متفقة على انها السبب في اللي حصل؟! ايه العلاقة من اساسة؟
٧- ليه ماحصلتش نفس الثورة الاعلاميه دي لما اسرائيل بتقتل في المسلمين كل يوم و ليه الفلسطينين ماطلعوش يقولوا طز في العروبه زينا؟ مع اننا خذلناهم يجي مليون مرة
٨- ليه المصريين ماحسوش ان كرامتهم اتهانت بنفس الطريقة لما اسرائيل اعلنت اول محطة كهرباء تعمل بالغاز المصري في حين ان الفلسطينيون مقطوع عنهم الكهرباء اغلب الوقت؟
وسط الهيصه دي في ناس كانت بتبني افكارها على الفيديو ده
و بعدها طلع من المصريين كتير يردوا و يشتموا و بعد اللي حصل طلع نفس الولد و قال الكلام ده
بصراحة وسط العبث الاعلامي اللي حاصل في مصر و الجزائر اليومين دول فعلاً عرفت اللي بيفهم من اللي مابيفهمش من الاعلاميين و الصحفيين و مين الاساتذة و مين التلاميذ و اثار انتباهي الذكاء الشديييييد لبرنامج منى الشاذلي (العاشرة مساءاً) و اللي تعامل مع الموقف بمنتهى الذكاء و الحرفيه و العبقرية لأنه وازن بعبقرية خالصه و بدون افراط او تفريط
by Sinar
22 Nov 2009 at 14:39
انا فعلا تعبت جدا من الكلام والشحن اللي بشوفه من يوم المباراه المشئومه دي
و كل ماشوف حاجه في التليفزيون ، او اتفرج على فيديو او اقرا خبر له علاقه بالموضوع ،،، دمي يغلي اوي
بس كنت ارجع اقول ، طيب ماحنا بنتشحن من الاعلام ، و هما كمان بيحصل ده معاهم
بس هما اسلوبهم و ردود افعالهم عنيفه و همجيه و اعلامهم مستفز فعلا….
بس بعيدا عن ده كله بقه ، الاسئله اللي انت سالتها هي الحاجه اللي لازم نقف عندها
و منهم سؤال من امبارح شاغلني جدا
الدنيا قامت و مقعدتش عشان اهانه كرامه المصريين ، و وصلت المطالب لطرد السفير و قطع العلاقات ،
مش هقولك عايزين يعملوا كده مع دوله شقيقه و عربيه و كلام من ده، لا هقولك عايزين يعملوه عشان شويه همج ضربوا ناس مسالمه عشان ماتش كوره
امال ليه ماسحبناش اي سفير اسرائيل !!!!!
ولا عشان مش احنا اللي بنتضرب ، ولا عشان الجزائر مش بقوه اسرائيل
ولا عشان التجمع اللي اول مره احسه و اشوفه من الناس على الكوره مش موجود على اي حاجه تانيه !!
سؤال آخر برئ
الناس المحروقه من الاهانه، او بالاصح الناس اللي كانت شايله العلم و ملونه البلد كلها بالاعلام المصريه، مش هي دي نفسها اللي بتشتم في حال البلد و عايزه تهج منها و تسيبها !
انااحده من الناس اللس بكيت فلا من المناظر اللي شوفتها واللي حصل في السودان ، عشان تخيلت الرعب و الشعور الحقيقي بالاهانه وعدم الامان
بس الرد يكون ازاي ، اني اشتمهم و اسب و العن فيهم و في حكومتهم و علمهم ؟؟
اني افكر ياترى اي جزائري هشوفه هعمل فيه اييه؟؟
الموضوع كبر اوي اوي ، و الخوف ان في كتير من الناس هتتطرف في افكارها و ردود افعالها
والشحن الاعلامي لا يتوقف ، لكن والغريب ان مافيش اي حد خارج مصر ، متفق او مهتم اصلا برد لكرامتها
ربنا يستر
by Ahmed S. Farghal
22 Nov 2009 at 14:56
انا عايز اعلق على جزئيه واحدة و هي ان كل المصريين مش عاجبهم حالهم لكن الحاله هنا هي
“ادعي على ابني و اكره اللي يقول آمين”
by Sinar
22 Nov 2009 at 15:02
U R RIGHT
by Ibrahim
22 Nov 2009 at 17:03
اولا السلام عليكم ورحمة الله وبركاته
انا حزين بجد ان الامور وصلت لكده بينا وبين الجزائر … مش علشان هما ناس كويسين واننا المفروض نحبهم .. لا .. انا الي يحبني احبو والي يكرهني اكرهوا .. دا المنطق خصوصا لما يكون فيه اجماع عليه من الدولة كلها .. مش من مجموعة من الجزائريين وبس
المهم اني عاوز اضيف اني بجد شايف وحاسس وانا في الغربة بكرهة الشعوب الاخرى لينا .. مش بس الجزائر الي بتكرهنا … دا الشعب السعودي بيكرهنا .. والشعب الكويتي بيكرهنا .. والسوريين جزء كبير منهم بيكرهنا …
يعني في السعوديين الكره واضح وصريح وبتصرفات ..مش بس بالكلام
في السوريين ومعظم الجنسيات التانية بيكون الكره باين في محاولة كسب بنط عند السعوديين عن طريق الذم فينا ..
انا كل كلامي على فئة منمهم الي قابلتها هنا في الغربة.
لكن الي شايفوا ان فيه اجماع على كرهنا .. والاجماع دا اكيد ليه سبب
على فكرة انا عندي وجهات نظر على كل الاسئلة الي انت سالتها او اغلبها لكن مش هوه دا سبب المشاركة النهارده .. لكن انا بشارك علشان اضيف سؤال
ليه احنا بالذات بيحصل فينا كده .. ليه احنا مكروهينن اوي كده من اغلب الدول العربية والاسلامية !!!؟؟
by mahmoud metwally
22 Nov 2009 at 17:19
معلش ايدى بتكلنى ارد عليك
ابويا كان حكالى يوم ان سال السؤال ده لواحد عراقى لما كان فى الغربة سنة 88 , قاله انت منين من مصر , قاله سريعا انا من بلد فلاحين , قاله تصور بقا فى واحدة فلاحة مكنتش لاقية تاكل والناس اللى حواليها ادولها اكل ولبس وساعدتها و الست دى خدت الاكل وعملت بيه احسن اكل لا وبقت بتبيعه وبقت بتعمله وبقت بتبيع للقرى اللى جمبها
وخدت اللبس وغسلته وظبطته ولبسته واتعلمت ازاى تعمل زيه وازاى تصنعه وعندها احلى قطن وقماش و و و .. ابويا للاسف سكت
فا مش على الجزاير بس ولا السعودية والكويت و سوريا وتونس وليبيا و و و اكيد جزر القمر بتحبنا
by Ahmed S. Farghal
22 Nov 2009 at 17:42
انت قصدك ان الناس بتكرهنا عشان احنا احسن؟
لو قصدك كده يبقى انا مش موافقك نهائياً لأننا مش احسن بأي شكل من الاشكال
by Wael
22 Nov 2009 at 17:46
محاولة لإجابة بعض التساؤلات
1-بصراحة نقطة طناش الإعلام دي محيراني حتى الآن ولم أتخذ موقف فكري مؤكد منها .. لكن الحاصل إنه حدثت إعتداءات .. شكل هذه الإعتداءات إية .. تقريبا متنوعة لأني سألت واحد صاحبي باثق فى كلامه حضر الماتش وقال لي كلام كتير مشابه للإعتداءات اللي الناس لما رجعت قالوا عنها
4-مهاجمة الإعلام لقناة الجزيرة .. دي أهم نقطة بصراحة تهمني لأني كنت محتار في موقف القناة وهل هي منهجية فعلاً أم متحيزة لبلدها مثلها مثل باقي القنوات العالمية .. أحداث ما بعد المباراة في السودان تعمدت الجزيرة عدم تغطيتها أو الحديث عنها إلا بتصريحات أو أخبار تنتقيها بعناية كمن ينفخ الكير بين البلدين بشكل متعمد .. وهذا أحد الأمثلة
الشريط الإخباري لقناة الجزيرة من يوم الجمعة فجراً وحتى السبت الساعة 3:30 عصرا بتوقيت القاهرة (وهذا هو آخر توقيت كنت أرصد فيه أي خبر لتغيير الشريط الإخباري بعدها سافرت إلى الإسكندرية) .. الشريط الإخباري كان متضمناً الآتي: مصر تستدعي السفير المصري بالجزائر للتشاور ، السودان تستدعي السفير المصري بالخرطوم لتبليغه بإساءة “الإعلام المصري” لشعب وحكومة السودان
الشريط كان متضمن حاجات تانية عن مصر أنا مش فاكرها لكن المهم هو أنها لم تذكر أبداً طوال هذا الوقت أن وزارة الخارجية المصرية إستدعت السفير السوداني بالقاهرة لتبلغه شكر وتقدير حكومة وشعب مصر للأمن والدور السوداني
على الرغم من رد الفعل السريع لوزارة الخارجية المصرية ولم تنتظر حتى الصباح لتوجيه الدعوة أصدرت بياناً أنها تدعو السفير السوداني بالقاهرة لشكره صباحاً
الخبر دة والخبر بتاع بيان وزير العدل السوداني لم يكتب في الشريط الإخباري بتاع قناة الجزيرة طوال هذه الفترة .. حتى برنامج ماوراء الخبر اللي إتذاع بليل وإتعاد تاني يوم كان مستفز جداً في نفس النقطة إتناقش فى الحدث وأهمل بيان الخارجية وبيان وزير العدل لكن ذكر فقط إستدعاء السفير المصري بالجزائر وإستدعاء السودان للسفير المصري بالخرطوم
فكان باين إصرار القناة إنها تدخل السودان فى مشكلة مع مصر بالرغم من إعتذار الخارجية المصرية عن فعل وسائل الإعلام وشكرها للدور السوداني ودة بان فعلاً بعدها في تحول الإعلام فى مصر بتقدير الدور السوداني
نفس الموضوع المتعمد بالظبط كان على موقع البي بي سي وموقع جريدة القدس العربي وقناة الجزيرة الرياضية في الشريط الإخباري ،، معرفش باقي القنوات كان شكلها إية لكن دول اللي قدرت اتابعهم
آسف إني طولت عليك لكن فعلا الموضوع فيه أحداث كتير مش عارف أكتبها في التعليق
by Ibrahim
22 Nov 2009 at 18:05
اقولك رايي .
احنا مكناش محبوبين الاول علشان نكون مكروهين دلوقتي
احنا زمان كنا بنتعامل مع الشعوب دي بنظرية العصا والجزرة .. وكان عندنا ادواتنا الي نتعامل بيها
كان كلها شعوب فقيرة وجاهلة .. علمناهم واديناهم مساعدات فكانو بيحترمونا غصب عنهم .. وفي نفس الوقت الي كان بيتجرا علينا كان النظام وقتها بيعاقبوا بالعصا
لكن دلوقتي اصبح الشعب المصري بيتشتغل عندهم … احنا بناخد قوتنا منهم ..حتى اننا كنا هنصدرلهم خادمات .. فيحق لهم ان يستعبدونا .. وان يجلدوا اطباء مصريين للتستر على ادمان زوجة سيادة الامير
ولم يتحرك النظام المصري للرفع من كرامة ابناءه ولما قولنا هنمنع الاطباء قالولك طز .. لان فيه البدائل دلوقتي بفلوسهم
حتى ان النظام المصري مقلش الكلمتين الي قالهم وقال انو هيبدا يحافظ على كرامة المصريين الا بعد ان اهان صفوة الحزب الوطني وانضربوا في الشوارع
تخيل دول لو جمهور عادي .. والله كنا هنقعد نقول العروبة وعلشان خاطر الاخوة .. ودي شرزمة .. والكلام الي ياما سمعناه قبل كده
لازم نلاقي لنفسنا عصايا وجزرة تاني .. علشان يبقى لينا احترامنا .. ومش مهم انهم يحبونا
by Ibrahim
22 Nov 2009 at 18:41
بسم الله الرحمن الرحيم السؤال الاول .
1-ايه السبب ان الاعلام العالمي مطنش اللي حصل للمصريين في السودان و كله بيقول ان حصل مناوشات من الطرفين؟
الاجابة تبدا من مباراة مصر والجزائر في مصر .. والي اترمت فيه طوبة وتم تصويرها من مصور فرنسي الجنسية صور اللقطة الي ضرب فيها المشجعين المصريين الباص بالطوب وارسلها الى محطة فرنسية وبعد كده خدتها الجزيرة وبقت الحملة ضد مصر فكان الكلام الي بدا الهجوم على مصر مش بلسان الجزائر دا بلسان آخرين
بعد كده لما جينا نقول احنا انضربنا و اتبهدلنا في السودان قولنا بلسانا احنا وكمان بشوية كميرات موبايل .. والمطلوب من المجتمع الدولي انو يصدقنا
٢- كان فين دور المخابرات العامه و اجهزة الامن المصريه من استشعار الشحن المبالغ ضد المصريين عند الجزائرين و توقع نتايجة و اللي من رأيي كانت واضحة وضوح الشمس؟
هما فعلا كانو عارفين ان الي حصل دا هيحصل .. فطبعا بقلب الام القيادات قالت لا احنا هنبقى احسن منهم .. وهنبعت صفوة المجتمع المصري ومش هنبعت جماهير عادية خالص .. ولو تاخد بالك مكنش فيه ولا واحد من الجمهور الحقيقي الي تعب فعلا مع المناخب وكان المفروض انو هوه الي يروح السودان على نفقة الدولة..
واعتقد ان القيادات الرشيدة كانت فاهمة انها بكده بتهزم الفكر الجزائري على اساس انهم مش هيقدروا يهاجمو نجوم مجتمع .. فيبقى كل الي عملوه طلع على فشوش
٣- ليه السفارة المصريه في السودان مانبهتش مصر بأن الجزائريين اشتروا اسلحه و سكاكين؟ و ليه الشرطه السودانيه نفت ان يكون حصل اي اعتداء بالسكاكين؟
))))
يا عم احمد سعادة السفير المصري وقت حدوث المشكلة اتصل على البرامج وقال انا ماشي في الشوارع ومفيش اي حاجة من الي انتو بتقولوها .. الشوارع في حالة هدوء تام
اما بالنسبة للسودانين فبرنامج العاشرة مساء خد من بق اللواء الطيب حسن تقريبا كلام ان فعلا حصل اعتداء على الجمهور المصري وعلى الشعب السوداني الي كان بيحمل العلم المصري لكن وقت الجد هيقولوا لا محصلش لان دا يعتبر فشل ليهم في تنظيم ماتش كورة واحد … امال لو حبوا يتقدموا لاستضافة حدث رياضي باه هيعملوا ايه ..
٤- ليه كل وسائل الاعلام المصريه بتهاجم قناة الجزيرة تحديداً و صراحةً في كل البرامج و ليه مش بتهاجم باقي القنوات العالمية اللي اهملت الاحداث؟
لان فيه عداء بين النظام المصري وبين النظام القطري .دا اولا
ثانيا الجزيرة ساحبة البساط من تحت رجل القنوات المصرية . فدي فرصة باه نقلب عليها شوية .. خلي المشهاد يكرها
٥- ليه ماوصلناش اي احساس ان فيه اي مسئول جزائري اعتذز بالنيابة عن الشعب؟
اولا لان شعبوا هيزعل منو جدا .. وهتبقى سقطة سياسية ليه في بلدو لانو المفروض انو بيمثل الناس الي بتكره مصر
ثانيا لانوا وبكل بساطة متواطئ في الي حصل على مصر لو الكلام صحيح انو خرج المساجين ونقلهم في طيرات عسكرية
٦- ليه فجأه كل الناس بقت بتشتم في العروبة؟ و كأن كل الناس متفقة على انها السبب في اللي حصل؟! ايه العلاقة من اساسة؟
لاننا ياما عملناها لبانة في بقنا علشان نسكت عن اهانات سابقة .. فلما جه الوقت الي واحد رفع صوتوا وقال مش عاوزين العروبة والاخوة دي الكل قال وراه آآآآآمين
ثانيا لان العروبة وقت عبد الناصر كان فيه تطوير في البلد ومشاريع نهضوية داخليه زي السد العالي وزي مشروع من الابرة للصاروخ .. مكنتش سياسة خارجية فقط .. لكن دلوقتي تتغنى بالعروبة والشعب جائع .. اقل حاجة هتتقال خلينا في نفسنا بس بلا عرب بلا بتاع
٧- ليه ماحصلتش نفس الثورة الاعلاميه دي لما اسرائيل بتقتل في المسلمين كل يوم و ليه الفلسطينين ماطلعوش يقولوا طز في العروبه زينا؟ مع اننا خذلناهم يجي مليون مرة
دي باه انا مش معاك فيها .. لان اعلاميا محدش سكت .. لكن سياسيا دا الي نتحاسب عليه لاننا معملناش المطلوب مننا على الرغم اننا جنب الدول العربية التانية عملنا الواجب وزيادة
اما بالنسبة لفلسطين .. ميقدروش يقولوا كده لانهم في اشد الحاجة لاي حد يقف جنبهم حتى لو اخرس وابكم واعمى بس يفضل جنبهم .. دي ناس بتموت
٨- ليه المصريين ماحسوش ان كرامتهم اتهانت بنفس الطريقة لما اسرائيل اعلنت اول محطة كهرباء تعمل بالغاز المصري في حين ان الفلسطينيون مقطوع عنهم الكهرباء اغلب الوقت؟
اخر سؤال بقة مش قادر اجوابك عليه .. لاني مخوق بجد من حكومتنا .. خصوصا ان طلع حكم قضائي يمنع بيع الغاز لاسرائيل
لكن ولا حد اهتم
by mahmoud metwally
22 Nov 2009 at 21:36
احنا احسن من ناس كتيرة على رائى جورج عزمى احنا عالم تالت اه لكن فى عالم رابع وعالم …… وعالم…. احنا احسن من دول عربية كتير افرقياا بلتحديد
هو اه فى حاجات كتيييييييييييييييير فاشلين فيها بس برده بص على ربع الكباية المليان
by رفيق من الجزائر
23 Nov 2009 at 17:26
أنا أهنئك على موضوعية الطرح يا صديقي، وما أحوجنا إلى أناس مثلك من الطرفين، يحاولون فهم الأسباب التي أدت إلى كل هذا الاحتقان
أنا لحد الآن لم أجد أي جزائري شك ولو لحظة في أن المشجعين المصريين اعتدوا على حافلة المنتخب الوطني و أنا واحد منهم، لأن عقلي لا يقبل أن أشك مع وجود تسجيلات فيديو للأحداث، و أنا تفسيري لذلك أنه حدث بالفعل تواطؤ من رجال الأمن المصريين إما ثقة منهم بأن الجمهور المصري خارق للعادة في ضبط أعصابه بعد كل التصعيد الإعلامي الذي حصل و إما أنهم تخيلوا بأن الأمر لن يتعدى السب و الإهانات لإزعاج اللاعبين لكنهما فوجئوا بالأحداث فلم يجدوا وسيلة للخروج من المأزق سوى الإدعاء بأن الأمر مجرد تمثيلية … بالنسبة للجزائري المتشبع بروح الإنتقام و فكرة أنه الإنسان الوحيد الذي لديه كرامة فإن الأمر لا يسكت عنه، أضف إلى ذلك مرارة خسارة المباراة و أنباء عن اعتداءات على الأنصار الجزائريين من المصريين رغم ربحهم فالنتيجة طبعا ذهول شامل في الجزائر واستغراب للعداء المصري غير المبرر و فوران دم لا يهدئه سوى رد الاعتبار للكرامة الجزائرية ( وهي طبعا حال معظم المصريين اليوم، لذلك أنا أعذرهم تماما) … في الجهة المقابلة كان المصريون مقتنعين بأنهم أبرياء من حادث الحافلة و الإعتداء على جزائريين و هو أمر لا جدال فيه لأنهم لو كانوا فكروا في أنهم الطرف المعتدي لفكروا في انتقام الطرف الآخر وأعدوا العدة لمجابهته ( كنت حزينا في الليلة التي سبقت المباراة الأخيرة و كنت قد تشاجرت مع أكثر من زميل بسبب قناعتهم بأنه حصل قتل بالفعل بدليل أن مصدرا موثوقا أكد أنه ينتظر وصول ستة جثث لجزائريين قتلوا في القاهرة، و ظللت أدعو الله أن يحدث ما يمنع المجزرة التي توشك أن تحدث و الحمد لله أن المصريين لم يكونوا على علم بتحركات المتعصبين الجزائريين … ).
المشجعون الجزائريون كان يجب أن يكونوا من الفئات الأكثر همجية في المجتمع لأنه من المفترض أن يواجهوا مصريين أكثر عددا منهم، ولكن ما حصل أن السلطات المصرية لم تحسب حسابا لتأثير استفزازات عمرو أديب و أمثاله لجمهور كرة القدم الجزائرية الذي هو عدائي بطبيعته فأرسلت بإعلاميين و فنانين مرهفي الإحساس (من أمثال إيهاب توفيق و محمد فؤاد الذان يحضيان بشعبية لا بأس بها في الجزائر) و”الجماهير الجزايرية ما صدقت” … وحدث الاعتداء النذل الذي لا يشرف أحدا في الجزائر … و أنا لو كان لي من الأمر شيء لاعتذرت لجميع المصريين و لكن للأسف فإن صناع القرار هنا في الجزائر إما وقعوا في الفخ الإعلامي و إما هم صامتون لغاية يصعب علي إدراكها ( ردا على حسني مبارك و أبنائه الذين حاولوا تسييس المباراة و الإستفادة مما أعقبها)
أحببت فقط أن أقول بأن هناك كثيرا من الجزائريين الذين يشعرون بالعار مما حدث في الخرطوم بيننا كمسلمين و عرب خصوصا عندما تستغل إسرائيل أحداثا مثل هذه “عشان تثريق على العقلية العربية اللي لس ما نسيتش حرب داحس و الغبراء”
تحيا الجزائر بلد المليون ونص المليون شهيد و تحيا مصر أم الدنيا
والسلام على كل إخوتي في مصر
by Ahmed Ali Mbrouk
23 Nov 2009 at 23:05
كلام موضوعي وجميل جدا جدا
لازم نحكم العقل ولا نتحرك خلف العواطف فقط
ولماذا لا يتحرك الاعلام للمهازل التي تحدث
في المعتقلات وغيره في اغلب الدول العربيه
ولا اشك ان الصهاينه (واتباعهم) خلف هذا كله
والسؤال الاهم من المستفيد ؟؟
by Ahmed S. Farghal
24 Nov 2009 at 10:52
انا بصراحة اشك ان الصهاينه ورا الكلام ده و هي دي الشماعة اللي بنعلق عليها فشلنا في السيطرة على اي حاجة لكن لا شك انهم مستفيدون
لكن جت معاهم بالصدفة
by Ahmed Ali Mbrouk
25 Nov 2009 at 04:49
لا طبعا يا باشا الحكايه مش اننا بنعلق فشلنا عليهم ابدا
من مصلحتهم ان العالم يعرف اننا همجيين و بنكره بعض رغم كل الي بينا
يعني لتحسين صورتهم امام العالم بعد ما اتفضحوا
و زي ما رايس فرنسا قال وغيره عن العرب
والله بكره الايام هتثبت (ههه والله اعلم)
يعني لو الحكومه(وطبعا الي عايزهم يكملوا) ملهاش مصالح اعتقد
مكنش الموضوع طول كده مع اعتبار تاني ان اغلب
الماتيريل المستخدمه من كل من الطرفين لا تثبت قطعا
اي شيء بس اهو الناس تتلهي شويه ويحسوا بحب …والساده
العاملين ويكسب شعبيه والا مش معقول المخابرات مش فاهمه ايه
الي حصل ولا هيحصل من قبل الماتش اضف الي ذلك موضوع الجمهور الي راح
السودان ؟؟؟؟ الممثلين والناس كانت بتضرب ولا بتصور؟؟
فكروني ب11 سبتمبر والله العظيم
وطبعا من الاول معني ان السياسه احتكت بالموضوع
ان فيه تفاصيل الله اعلم بها
ودي بعض من وجهات النظر مش كلها
واسف علي الاطاله
by Fouad
24 Nov 2009 at 15:10
السلام عليكم
غريب جدا ما حدث وهناك فعلا الكثير من الاسئله التى لا نجد من يجيب عنهاه ومنهاه
موقف المسؤولين مع الاعلام الجزائرى الى شحنوا الناس هناك على المصريين لدرجه تصويرهم للمصريين بانهم يهود وقتله قتلوا الجزائريين…المفروض ان الناس دى تتحاسب قانونا على الاخبار الكاذبه التى اطلقوهاه والتى صدقهاه الجزائريون..
كان فين سفير مصر فى السودان والاستخبارات المصريه لما يعد للمصريين فى السودان ولم يحزر اى حد الناس الى مسافره هناك..احنا بلد عيال ولا اه..معقوله يعدى علينا كل ده…
اذا كان حصل فعلا اعتداءات على الجزائريين فى مصر عقب المباراه الاولى..لماذا لم يوضح لنا الاعلام ما حدث..ولا صحفى واحد يقول ان حصل اعتداءات؟! عشان كده لحد دلوقت انا مش مصدق ان حصل عليهم اعتداءات.
اه سر كره جمهور الكره الجزائرى للمصريين…الى انا شايفه من زمان بصراحه انهم بيكرهونا فعلا وبيضربونا سواء غلبناهم او غلبونا على ارضهم او على ارضنا…طيب ما احنا غلبنا واتغلبنا من كل دول افريقيا…اشمعنا شمال افريقيا وخاصه الجزائر بيحصل معاهم كده
انا ما سمعتش عمرو اديب قال اه لانى مقاطعه من ساعه ما شتم المنتخب المصرى….نفسى اعرف فين القضاء والقانون المصرى من الى بيحصل..لماذا لا يحاسب الناس على مخالفتهم للقانون؟؟
اكيد عمرو اديب بعد فوز مصر على الجزائر فى مصر قعد يهين المنتخب والشعب الجزائرى…ده الى باين من الفديو والتعليقات فى هذه الصفحه
المفروض ان المنتصر يفرح بنصره بدون اهانةالطرف الاخر وخاصه ان دى مباراة كره قدم..
اخيرا يبدوا ان الاعلام وراء كل مصيبه تحدث فى اى مكان
by اخبار الرياضة
15 Dec 2009 at 11:18
I could not agree more!